សិល្បៈជាតិ៖ ជាថ្មីម្ដងទៀត តារាចម្រៀង Rap ដ៏ពេញនិយមរបស់ព្រះរាជាណាចក្រកម្ពុជា ទទួលបាននូវការសរសើរពីចាស់ទុំមួយរូបដែលជាមន្ត្រីជាន់ខ្ពស់នៅក្រសួងមហាផ្ទៃចំពោះសមត្ថភាពនិងជំនាញវិជ្ជាជីវៈរបស់តារាចម្រៀងវ័យក្មេងរូបនេះ។
ថ្មីៗនេះមានការចាប់អារម្មណ៍វីដេអូមួយរបស់ឯកឧត្តម សក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ ដែលបានលើកសរសើរដល់ម្ចាស់បទ «Time To Rise» ដោយឯកឧត្តមមានក្រើនរំលេចពីវណ្ណដាថាដូច្នេះ៖ «សូម្បីតែអ្នកចម្រៀង មិនមែនអ្នកចម្រៀងទាំងអស់សុទ្ធតែល្បីទេ ឥឡូវនេះមានអ្នកចម្រៀងម្នាក់ ស្អី Rap វណ្ណដា ប៉ុន្មានរយលានឥឡូវនេះ? អ៊ីចឹង អ៊ីចឹងវណ្ណដា គឺជាឧទាហរណ៍មួយ នៃយុវជនសម័យថ្មី គេរកឱកាស អ៊ីចឹងអ្នកមើលនៅក្នុងផេកគាត់ ១០០លាន ខ្ញុំថ្ងៃមុន ស្ដាប់បទចម្រៀងរបស់គេមួយ យើងចាស់យ៉ាងម៉េចក៏ដោយ ក៏ប្រឹងធ្វើម៉េច ឱ្យដឹងថា យុវវ័យសព្វថ្ងៃ គេ enjoy ម៉េច អ៊ីចឹងយើងត្រូវដឹងដែរ ចូលទៅមើលនឹងគេទៅ កាលខ្ញុំចូលពីព្រឹក ម្ដុំប្រហែល១លានជាង ចូលទៅរសៀលតិច ជិត៥លាន ជិត៥លាននាក់ អ៊ីចឹងយើងចាត់ទុកថាជាអ្នកដែលមានជោគជ័យ ប៉ុន្តែ ជោគជ័យយ៉ាងណាក៏ដោយ ដែលខ្ញុំបញ្ជាក់ថាជំនាញត្រូវបូកនឹងគេហៅថា សីលធម៌ បូកនឹងវិន័យ បូកនឹងចរិយាធម៌ នៅក្នុងសង្គម។»
ការលើកឡើងរបស់ឯកឧត្តម សក់ សេដ្ឋា ដែលលើកយកតារាចម្រៀងវណ្ណដា មកធ្វើជាឧទាហរណ៍នៃការចាប់យកឱកាសការងាររបស់យុវជនសម័យថ្មី ឱ្យស្របទៅតាមចំណេះជំនាញរៀងៗខ្លួន។
ប្រសិនបើក្នុងវិស័យបាល់ទាត់កម្ពុជាមានកុមារពេជ្រ សៀង ចន្ធា នៅក្នុងវិស័យចម្រៀងនិងតន្ត្រី កម្ពុជាមានកុមារពេជ្រដូចគ្នា គឺ វណ្ណដា ព្រោះតារាចម្រៀងវ័យក្មេងមានដើមកំណើត នាខេត្តជាប់ផ្ទៃសមុទ្ររូបនេះហើយ គឺជាអ្នកបើកទ្វារទំព័រប្រវត្តិសាស្ត្រថ្មីក្នុងវិស័យតន្ត្រី Rap នៅកម្ពុជា និងជាអ្នកដែលឆក់ដួងចិត្តអ្នកគាំទ្របរទេសជាច្រើនជាតិសាសន៍ឱ្យស្រលាញ់ចូលចិត្តបទចម្រៀងចង្វាក់ Hip Hop និងស្ដាប់បទចម្រៀងខ្មែរ៕