ក្រុមបាល់ទាត់ Tampines Rovers FC បានធ្វើដំណើរត្រឡប់ដល់ប្រទេសកំណើតសិង្ហបុរី វិញហើយនៅថ្ងៃពុធ សប្ដាហ៍នេះ ក្រោយបញ្ចប់បេសកកម្មប្រកួតក្នុងវគ្គជម្រុះតាមពូលនៃពានរង្វាន់បាល់ទាត់ទ្វីបអាស៊ី AFC Champion League 2021 នៅទីក្រុង Tashkent ប្រទេសអ៊ូបេគីស្ថាន។
បើតាមការបញ្ជាក់របស់វិបសាយលីគកំពូលសិង្ហបុរី spl.sg លើកឡើងថា សមាជិកក្រុម Tampines Rovers FC បានរកឃើញករណីវិជ្ជមានកូវីដ-១៩ ក្រោយធ្វើដំណើរត្រឡប់មកដល់ប្រទេសវិញ នៅអាកាសយាន្តដ្ឋានអន្តរជាតិ Changi Airport។ បុគ្គលវិជ្ជមានបានយកទៅព្យាបាលហើយ ខណៈសមាជិកក្រុមផ្សេងទៀតបានយកទៅដាក់ឱ្យធ្វើចត្តាឡីស័កនៅសណ្ឋាគារមួយកន្លែង ឱ្យស្របតាមវិធានការសុខាភិបាលរបស់រដ្ឋាភិបាលប្រទេសខ្លួន។
អត្ថបទពាក់ព័ន្ធ៖ACL៖ក្រុមមកពីចិន ធ្លាក់ត្រឹមវគ្គចែកពូលជាលើកដំបូងក្នុងរយៈពេល១២ឆ្នាំចុងក្រោយ
សហព័ន្ធកីឡាបាល់ទាត់សិង្ហបុរី នឹងចាត់វិធានាការចាំបាច់ទាំងអស់ដើម្បីធានាសុខភាពនិងសុវត្ថិភាពរបស់កីឡាករនិងមន្ត្រី Tampines Rovers FC ដើម្បីបញ្ជាក់ឱ្យកាន់តែច្បាស់មុនពេលពួកគេចាប់ផ្ដើមហ្វឹកហាត់និងប្រកួតក្នុងលីគកំពូលប្រទេសខ្លួនក្រោយពីធ្វើចត្តឡីស័ក។
ក្រុម Tampines Rovers FC បានបញ្ជាក់លើ Twitter របស់ខ្លួនថាកីឡាករទាំងអស់សុទ្ធតែត្រូវបានធ្វើតេស្តគ្រប់ការប្រកួតទាំងអស់នៅប្រទេសអ៊ូបេគីស្ថាន ហើយសុទ្ធតែអវិជ្ជមានគ្រប់ពេល។
អត្ថបទពាក់ព័ន្ធ៖ក្រុមកូរ៉េខាងត្បូង ជប៉ុន និងថៃ ឡើងទៅវគ្គ១៦ក្រុមចុងក្រោយពាន Champion League ទ្វីបអាស៊ី
ក្រុម Tampines Rovers FC បានប្រកួតនៅក្នុងពូល H ក្នុងទឹកដីទីក្រុង Tashkent ដែលជាតំបន់កណ្ដាលមួយ ហើយជាលទ្ធផលក្រុមនេះបានប្រកួតចាញ់ក្រុម Gama Osaka របស់ជប៉ុន ក្នុងជើងទី១ ដោយលទ្ធផល ២ទល់០ បន្តចាញ់ក្រុម Chiangrai United របស់ថៃ ១ទល់០ ចាញ់ក្រុម Jeonbuk Hyundai Motors របស់កូរ៉េខាងត្បូង ៩ទល់០។ ចូលដល់ជើងទី២ ក្រុមសិង្ហបុរី មួយនេះបានបន្តចាញ់ក្រុម Jeonbuk Hyundai Motors ដោយលទ្ធផល៤ទល់០ ហើយចាញ់ក្រុម Gamba Osaka ៨ទល់១ និងចុងក្រោយចាញ់ Chiangrai United ៣ទល់០៕
