កាលពីឆ្នាំ២០១៤ តារាសម្ដែងចិនហុងកុង លោក Andy Lau បានសម្ដែងជាតួអង្គឯកក្នុងភាពយន្តចិនដោយមិនយកប្រាក់ ថែមទាំងក្រុមហ៊ុនលោកបានចេញសាច់ប្រាក់ផ្ទាល់ក្នុងដំណើរការរៀបចំមុនការផលិតដើម្បីឱ្យរឿងនេះមានកញ្ចប់យកទៅប្រើប្រាស់ក្នុងការថតថែមទៀតផង។ កាលណោះ លីវ តឺហួរថែមទាំងនិយាយទៀតថា បើសិនជារឿងនោះខាត សូមឱ្យយើងខាតទាំងអស់គ្នា។
«Lost and Love» ភាពយន្តស្ដែងចេញពីសាច់រឿងពិតរបស់បុរសនៅខេត្តសានតុង ឈ្មោះ គួរ កាងតាង ដែល លីវ តឺហួរ សម្ដែងគឺជាឪពុកម្នាក់ដែលបានធ្វើដំណើរជុំវិញប្រទេសចិនដោយម៉ូតូរបស់ខ្លួនរយៈពេល១៥ឆ្នាំ ដើម្បីស្វែងរកកូនប្រុសដែលបានព្រាត់គ្នាកាលពីអាយុ២ឆ្នាំ។
រឿងនេះផលិតឡើងដើម្បីបង្កើនការយល់ដឹងពីបញ្ហាដែលគ្រួសារលោក គួរ ក៏ដូចជាគ្រួសារជនជាតិចិនជាច្រើនទៀតជួបប្រទះ ត្រូវបាត់បង់កូនដោយសារតែអំពើជួញដូរមនុស្ស។។ ប៉ុន្មានឆ្នាំនោះ លោក គួរបានធ្វើដំណើរជាង ៥០ម៉ឺនគឺឡូម៉ែត្រ ខ្ទេចម៉ូតូអស់១០ គ្រឿង ហើយបានជួយឱ្យគ្រួសារចំនួន ៧ បានជួបជុំកូនៗដែលបានបាត់របស់គេឡើងវិញតាមរយៈវែបសាយដែលលោកបង្កើត។
កាលពីឆ្នាំ ២០១៥ នៅពេលដែលរឿងនេះចាក់បញ្ចាំងទទួលបានការគាំទ្រយ៉ាងខ្លាំង ហើយរកចំណូលបានយ៉ាងច្រើនផងដែរនៅក្នុង Box Office យ៉ាងណាមិញពានរង្វាន់ដ៏អស្ចារ្យដែលភាពយន្តស្ដីពីជីវិតពិតមួយនេះគួរទទួលបានទើបតែមកដល់នៅរយៈពេលប៉ុន្មានថ្ងៃមុននេះប៉ុណ្ណោះ
នៅថ្ងៃទី១១ ខែកក្កដា មានសេចក្ដីប្រកាសមួយបានបង្ហាញថា កូនប្រុសរបស់លោកគួរ ដែលមានឈ្មោះថា ស៊ីនជិន បានរកឃើញឡើងវិញហើយ ក្រោយពីព្រាត់គ្នាអស់រយៈពេល២៤ឆ្នាំ តាមរយៈការធ្វើតេស្ដ DNA បញ្ជាក់ថាជាការពិត។
លោក គួ បានថ្លែងលើបណ្ដាញសង្គមថា ថ្ងៃនេះគឺជាថ្ងៃដ៏សំខាន់បំផុតក្នុងជីវិតខ្ញុំ។ ក្រុមគ្រួសាររបស់លោកបានរៀបចំពិធីជួបជុំគ្នានៅក្នុងថ្ងៃនោះ ខណៈដែលរូបថតជួបជុំគ្រួសារត្រូវបានអាជ្ញាធរទម្លាយចេញមកខាងក្រៅនាថ្ងៃទី១៣ ខែកក្កដា ឆ្នាំ២០២១ ដោយក្នុងនោះបានបង្ហាញរូបភាពលោក គួរ និងភរិយាឱបកូនប្រុសដែលបច្ចុប្បន្នមានវ័យ២៦ឆ្នាំ របស់ពួកគេដោយទឹកភ្នែក។
រឿងរ៉ាវរំជួលចិត្តនេះបានឮដល់លោក Andy Lau ដូច្នេះតារាវ័យ ៥៩ឆ្នាំ បានចេញមកបង្ហាញពីចំណាប់អារម្មណ៍លោកយ៉ាងដូច្នេះថា៖ «ខ្ញុំស្គាល់បងប្រុសគួរ ព្រោះតែភាពយន្ត Lost and Love ។ ខ្ញុំមានអារម្មណ៍រំភើបឥតឧបមា និងមានកម្លាំងចិត្តណាស់ ព្រោះថ្ងៃនេះកូនប្រុសបងគួ ទីបំផុតបានជួបជុំគ្រួសារ ក្រោយបាក់បែកគ្នារយៈពេល ២៤ឆ្នាំ ដោយសារតែការខិតខំប្រឹងប្រែងរបស់អាជ្ញាធរមានសមត្ថកិច្ច។» លោកក៏បាននិយាយបន្តនៅក្នុងវីដេអូនោះដែរថា «ខ្ញុំចង់ប្រាប់បងប្រុសគួថា ខ្ញុំពិតជាកោតសរសើរចំពោះការប្រឹងប្រែងរបស់គាត់ ហើយក៏សូមអរគុណចំពោះអាជ្ញាធរដែលបានជួយជ្រោមជ្រែងរយៈពេលជាច្រើនឆ្នាំមកនេះ។ ខ្ញុំសង្ឃឹមថាអ្នកគ្រប់គ្នាអាចចូលរួមជាមួយនឹងចលនា គាំទ្រការប្រឆាំងនឹងអំពើជួញដូរមនុស្ស ដែលជួយឱ្យគ្រួសារជាច្រើនទៀតបានជួបជុំគ្នាឡើងវិញ»។
សារព័ត៌មាន Xinhua (ស៊ីនហួរ) បានរាយការណ៍បន្ថែមទៀតដែរថា បុរសម្នាក់ និងស្ត្រីម្នាក់ត្រូវបានចាប់ខ្លួនពាក់ព័ន្ធនឹងករណីចាប់ពង្រត់ ហើយកំពុងស្ថិតក្នុងការសាកសួរពីសមត្ថកិច្ច។
យោងតាមប្រសាសន៍របស់លោក Peng Sanyuan ជាអ្នកដឹកនាំរឿង «Lost and Love» បានឱ្យដឹងថា Xinzhen ត្រូវបានយកទៅចិញ្ចឹមនៅកន្លែងមួយដែលមិនឆ្ងាយពីទីតាំងរស់នៅរបស់គ្រួសារលោក គួ ប៉ុន្មាននោះទេ សំណាងណាស់ដែលក្មេងប្រុសរូបនេះធំធាត់បានយ៉ាងល្អ។ លោកក៏បានប្រាប់ទៅកាន់អ្នកសារព័ត៌មានដែរថា «នៅក្នុងជីវិតមនុស្សយើងមានរឿងកើតឡើង មិនច្រើននោះទេ ដែលនាំឱ្យយើងរីករាយនិងមានសុភមង្គល ដូចជាប្រឡងបានពិន្ទុខ្ពស់ជាងគេក្នុងសាលា រាត្រីរៀបអាពាហ៍ពិពាហ៍ ជួបជុំមិត្តភក្ដិចាស់ និងក្ដីប្រាថ្នាបានក្លាយជាការពិត»៕
ទស្សនាវីដេអូជួបជុំខាងក្រោម ប្រភពពី Asiaone៖