សិល្បៈអន្តរជាតិ៖ កាលពីឆ្នាំ២០១៨ រូបភាព Jet Li បានធ្វើឱ្យអ្នកគាំទ្រពិសេសជនជាតិចិនកង្វល់ពីបញ្ហាសុខភាពរបស់លោកជាខ្លាំង ខ្លាចថាលោកអាចនឹងកំពុងតែមានជំងឺ ព្រោះរូបភាពដែលថតបាននៅក្នុងវត្តមួយនៅទីបេមើលទៅលោកទ្រុឌទ្រោម គួរឱ្យបារម្ភ។ យ៉ាងណាមិញរូបភាពចុងក្រោយដែលទើបតែបញ្ចេញមកខាងក្រៅកាន់តែធ្វើឱ្យអ្នកគាំទ្ររឹតតែបារម្ភព្រោះនៅក្នុងឃ្លីបវីដេអូថ្លែងអំណរគុណ Jet Li មើលឃើញថាលោកដូចជាល្ហិតល្ហៃនិងទ្រុឌទ្រោមជាខ្លាំងក្នុងវ័យ៦០ឆ្នាំ។
សូមអាន៖ ល្បីថាតារាក្បាច់គុនដ៏ល្បី លី លានជា ជាប់ក្នុងបញ្ជីខ្មៅរបស់រដ្ឋបាលប្រទេសចិន!
អ្នកលេងបណ្ដាញសង្គមដែលបានឃើញវីដេអូបានលើកឡើងថា Jet Li តារាសម្ដែងក្បាច់គុនដ៏ល្បីហុងកុងមើលទៅចាស់ជាងវ័យ ចំណែកសុខភាពរាងកាយក៏មិនសូវរឹងមាំ ដែលប្រការនេះធ្វើឱ្យមនុស្សជាច្រើនចម្លែកចិត្តជាខ្លាំងព្រោះបច្ចុប្បន្នលោកទើបតែមានវ័យត្រឹម៦០ឆ្នាំប៉ុណ្ណោះ។
«រន្ធត់ណាស់» «Jet Liចាស់លឿនខ្លាំងណាស់» «ប្រថុយជីវិតគ្រប់ពេលដែលសម្ដែងឈុតឆាកគ្រោះថ្នាក់ ការងារធ្វើឱ្យប៉ះពាល់ដល់សុខភាពរបស់គាត់ច្បាស់ណាស់»
យ៉ាងណាមិញអាការៈមួយដែលបង្កឱ្យមានបញ្ហាសុខភាពគឺបណ្ដាលមកពីជាតិពុលអ័រម៉ូនក្នុងក្រពេញទីរ៉ូអ៊ីត ដែលគេបានពិនិត្យឃើញកាលពីគេអាយុ៤៧ឆ្នាំ ទោះជាលោកខំព្យាបាលនិងពិនិត្យសុខភាពរាងកាយយ៉ាងណា តែរាងកាយលោកហាក់ទ្រុឌទ្រោមរឿយៗ។
មួយរយៈចុងក្រោយនេះJet Li មិនទទួលការងារសម្ដែង ចំណែកការបង្ហាញខ្លួននៅកន្លែងសាធារណៈក៏មិនសូវញឹកញាប់ដែរ ការបង្ហាញខ្លួនលោកភាគច្រើនក្នុងការងារមនុស្សធម៌និងសង្គម ដូច្នេះធ្វើឱ្យអ្នកគាំទ្រសន្មតថាពេលនេះលោកស្ថិតក្នុងដំណាក់កាលពាក់កណ្ដាលចូលនិវត្តន៍។
ទោះជាបច្ចុប្បន្នអាការៈលោកកាន់តែមើលទៅចាស់ទ្រុឌទ្រោមក្ដី ប៉ុន្តែអ្នកគាំទ្រនៅតែចង់ឃើញលោកត្រលប់មកសម្ដែងវិញ ព្រោះពួកគេមើលឃើញថា ឈិន ឡុង ដែលបច្ចុប្បន្នមានវ័យរហូត៦៩ឆ្នាំ នៅតែអាចសម្ដែងភាពយន្តបានដដែល៕
ប្រភព៖ បរទេស