កីឡាករចំបាបជម្រើសជាតិកម្ពុជា លោក ស៊ូ បាលី បានឈ្នះមេដាយសំរឹទ្ធ ហើយក៏ជាលើកដំបូងសម្រាប់កីឡាករចំបាប់កម្ពុជា នៅក្នុងការប្រកួតកីឡាចំបាប់ជើងឯកអាស៊ីអាយុក្រោម ២៣ឆ្នាំ (U23) (U-23 Asian Championship2023) កាលពីថ្ងៃទី១៨ មិថុនា ក្រោយយកឈ្នះកីឡាករម៉ុងហ្គោលី នៅប្រទេសកៀហ្ស៊ីស៊ីស្ថាន។
ស៊ូ បាលី យកឈ្នះលើកីឡាករម៉ុងហ្គូលី TSONG TBAYAR.M ដោយលទ្ធផល ៦-១ លើវិញ្ញាសាចំបាប់សេរី Freestyle ទម្ងន់១២៥គីឡូក្រាម។ ក្រោយឈ្នះមេដាយកីឡាករចំបាប់ជម្រើសជាតិកម្ពុជារូបនេះ បានឆ្លងកាត់ប្រកួតដ៏ស្វិតស្វាញ ដោយប្រកួតដំបូង បានឈ្នះម្ចាស់ផ្ទះកៀហ្ស៊ីស៊ីស្ថាន ១០-០ពិន្ទុ តែសោកស្ដាយ នៅវគ្គពាក់កណ្ដាលផ្ដាច់ព្រ័ត្រ បាលី បានប្រកួតចាញ់កីឡាករ ទួកមេនីស្ថាន មុនយកឈ្នះកីឡាករម៉ុងហ្គោលី ៦-១ពិន្ទុ ដើម្បីទទួលបានមេដាយសំរឹទ្ធ។
រំលឹកថា កីឡាករចំបាប់កម្ពុជា ស៊ូ បាលី ក៏ជាម្ចាស់មេដាយមាស នៅក្នុងព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ នៅកម្ពុជា។ ដោយឡែកសម្រាប់លើកនេះ គឺជាមេដាយដ៏សំខាន់សម្រាប់លោក ក្នុងការប្រកួតកីឡាចំបាប់ជ្រើសរើសជើងឯកអាស៊ីអាយុក្រោម ២៣ឆ្នាំ (U-23 Asian Championship2023)។
គួរបញ្ជាល់ថា កាលពីថ្ងៃទី១៧ ខែមិថុនា ឆ្នាំ២០២៣ កម្ពុជា បានបញ្ជូលកីឡាករចំបាប់ ៤រូបពេឪទៅប្រកួតកីឡាចំបាប់ជើងឯកអាស៊ី U23 នៅប្រទេសកៀហ្ស៊ីស៊ីស្ថាន មានដូចជា៖
- កីឡាការិនី ជា កញ្ញា 65 kg ម្ចាស់មេដាយមាសស៊ីហ្គេម
- កីឡាករ ម៉ូ សារី 97 kg ម្ចាស់មេដាយមាសស៊ីហ្គេម
- ចំណែកកីឡករ ស៊ូ បាលី 125 kg ម្ចាស់មេដាយមាសស៊ីហ្គេម
- កីឡាការិនី ជឿន ស្រីឡែន 62 kg ម្ចាស់មេដាយសំរឹទ្ធស៊ីហ្គេម
ដែលបានបានដឹកនាំដោយគ្រូបង្វឹករបស់យើង គឺលោកស្រី ចូវ សុធារ៉ា ដែលបានចូលរួមប្រកួតកីឡាអូឡាំពិកឆ្នាំ ២០១៦។ ពួកគេក៏ត្រូវបានចូលរួមដោយគ្រូបង្វឹករបស់យើងគឺលោក Komeil Ghasemi ដែលបានឈ្នះមេដាយមាសក្នុងព្រឹត្តិការណ៍អូឡាំពិកឆ្នាំ២០១២៕