សម្រាប់ស្ថានភាពប្រទេសថៃបច្ចុប្បន្នឃើញថាកំពុងតែក្ដៅគគុកព្រោះមេរោគកូវីដ១៩ មានការឆ្លងរីករាលដាលខ្លាំង ចំណែកអ្នកជំងឺដែលបាត់បង់ជីវិតព្រោះតែមេរោគឆ្លងមួយនេះក៏កើនឡើងខ្ពស់ជាបន្តបន្ទាប់ដែរ អាចនិយាយបានថាស្ថិតក្នុងវិបត្តិដ៏ធំមួយ រហូតប្រជាជនមួយចំនួន និងតារាក្នុងវង្វង់សិល្បៈខ្លះបានចេញមកបង្ហាញរិះគន់ចំពោះចំណុចខ្សោយនៃការគ្រប់គ្រងប្រទេសរបស់រដ្ឋាភិបាលលោកប្រាយុទ្ធ ចាន់អូចា។
តារាខ្លះទៀតត្រូវបានប្រជាជនស្នើសុំឱ្យចេញមកបញ្ចេញមតិដើម្បីជាសំឡេងជំនួសឱ្យប្រជាជនដែលកំពុងតែជួបការលំបាក ប៉ុន្តែទោះជាមានការទាមទារពីមហាជនក្ដី ក៏មានតារាមួយចំនួននៅស្ងៀមមិនបានបញ្ចេញសកម្មភាពអ្វីទាំងអស់ រហូតធ្វើឱ្យតារាទាំងនោះរងនូវការរិះគន់យ៉ាងខ្លាំងលើបណ្ដាញសង្គមអនឡាញ ខណៈអ្នកខ្លះបានប្រើវិធីគៀបសង្កត់តារាដែលនៅស្ងៀមដោយវិធីសាស្ត្រ Unfollow IG ដើម្បីបង្ហាញពីការឈប់គាំទ្រតារាទាំងអស់នោះទៀត។ យោងតាមសារព័ត៌មាន The Bangkok insight ថ្ងៃនេះត្រយងសូមលើកយកតារាស្រីលេចធ្លោរ៣ រូបដែលស្ថិតិ Follow នៅលើ IG ធ្លាក់ចុះខ្លាំងដល់ចំណុចក្រហមព្រោះតែហ្វេន គៀបសង្កត់ចង់ឱ្យចេញមក Call Out យ៉ាងខ្លាំងរហូតកើតជារឿងដ្រាម៉ាលើអនឡាញ។
១. Aum Patcharapa
តារាស្រីល្បីដែលទើបតែអបអរចំនួន Follow លើ IG គ្រប់ ១៣លានគណនី កាលពីពេលថ្មីៗនេះ ស្រាប់តែមកចុងក្រោយនេះ ចំនួន Follow នៅសល់ត្រឹម ១២.៩ លានគណនី យោងតាមស្ថិតិនេះបង្ហាញឱ្យឃើញថា ចំនួន Follow គិតត្រឹមថ្ងៃទី១៤ ខែកក្កដា ឆ្នាំ២០២១ បាត់អស់ ១៤,៣៦៦ គណនី ខណៈដែលថ្ងៃទី១៣ ខែកក្កដា ធ្លាក់អស់ ២,៨៧៣ ហើយថ្ងៃតី១២ ខែកក្កដា បាត់អស់ ៨,៧៦៣ យោងតាមស្ថិតិនេះចាត់ទុកថាស្ថិតក្នុងតួលេខក្រហមជាប់ៗគ្នាតែម្ដង។
២. Chompoo Araya
នៅខណៈដែល Chompoo Ariya ដែលមានចំនួនអ្នក Follow IG រហូតដល់១០លានគណនី ក៏ស្រាប់តែបាត់អស់ចំនួន follower ចាប់តាំងពីថ្ងៃតី៣០ ខែមិថុនា ឆ្នាំ២០២១ កន្លងទៅ រហូតមកដល់ត្រឹមថ្ងៃទី១៤ ខែកក្កដា ឆ្នាំ២០២១ ចំនួន Follow ធ្លាក់ចុះយ៉ាងគំហុករហូតចេញពណ៌ក្រហមធ្លោ។
៣. Poo Praya
ចំណែកតារាសម្ដែង Poo Praya បើប្រៀបជាមួយនឹងរៀមច្បងតារាសម្ដែងទាំងពីរខាងលើដូចជារាងធ្ងន់ធ្ងរជាងគេបន្តិចព្រោះដោយសារតែមានតំណែងជា ទូតសុច្ឆនៈរបស់អង្គការ UNHCR ធ្វើឱ្យមហាជនគៀបសង្កត់ឱ្យចេញមកស្រែកទាមទារ (Call Out) រហូតមក ចំណែកករណីបាត់ចំនួន Follow រាប់ចាប់តាំងពីខែមិថុនាកន្លងមក ចំនួន Follow ធ្លាក់ដល់ចំណុចក្រហមជាប់ៗគ្នារហូតមកដល់បច្ចុប្បន្ននេះ។
ប្រភព៖ thebangkokinsight
