នៅព្រឹកថ្ងៃទី២២ ខែមិថុនា ឆ្នាំ២០២៣នេះ អ្នកស្រី កែ ឡេង បានបង្ហាញសារនៅលើគណនីហ្វេសបុកអ្នកស្រីថា នឹងត្រឡប់ទៅផ្ទះវិញនៅថ្ងៃស្អែក ក្រោយពីសម្រាកព្យាបាលជំងឺឈាមកកក្នុងខួរក្បាល ដែលបានទទួលការវះកាត់ដោយជោគជ័យនៅមន្ទីរពេទ្យព្រះកេតុមាលា (ពេទ្យ 1.79) ។
យោងតាមការបញ្ជាក់នៅលើហ្វេសបុករបស់អ្នកស្រី កែ ឡេង នៅព្រឹកនេះថា៖ «បន្ទាប់ពីទទួលការវះកាត់ទទួលបានជោគជ័យ នៅមន្ទីរពេទ្យព្រះកេតុមាលា 1.79 ហើយនៅថ្ងៃស្អែកនេះ បងស្រីបាន អញ្ជើញទៅផ្ទះវិញហើយ ខ្ញុំបាទតំណាងឲ្យក្រុមគ្រួសារសូមថ្លែងអំណរគុណយ៉ាងជ្រាលជ្រៅចំពោះ ថ្នាក់ដឹកនាំក្រុមលំដាប់ថ្នាក់លោកគ្រូ ពេទ្យនិងបងប្អូនទាំងអស់គ្នា ដែរយកចិត្តទុកដាក់លើបងស្រីខ្ញុំបាទ ដែលកុំឡុងពេលកំពុងសម្រាកព្យាបាលជំងឺ»។
គួរបញ្ជាក់ថា វីរកីឡាការិនី កែ ឡេង គឺជាកីឡាការិនីប៉េតង់ដ៏ឆ្នើមរបស់កម្ពុជា ដែលដែលជាម្ចាស់មេដាយមាសកម្រិតពិភពលោក ៤ជំនាន់ជាប់គ្នា លើវិញ្ញាសាវាយយកពិន្ទុ ឆ្នាំ២០១៣ ២០១៥ ២០១៧ និងឆ្នាំ២០១៩ បំបែកកំណត់ត្រាពិភពលោក មិនទាន់មានកីឡាការិនីអន្តរជាតិណាម្នាក់ធ្វើបានឡើយ៕