សិល្បៈអន្តរជាតិ៖ ក្រុម Fifty Fifty បានក្លាយជាក្រុមចម្រៀងស្រីកូរ៉េដែលឈរលើតារាងតន្ត្រី Billboard Hot 100 របស់អាមេរិកបានយូរជាងគេជាប្រវត្តិសាស្ត្រ ដោយបានជាប់ឈ្មោះលើតារាងតន្ត្រីនេះបន្តកន្ទុយគ្នារយៈពេល១៣សប្ដាហ៍។ នេះបើយោងតាមការធ្វើបច្ចុប្បន្នភាពដោយ U.S. Time បានបញ្ចេញទិន្នន័យឱ្យដឹងថាតាមរយៈបទចម្រៀង «Cupid» ក្រុមនេះបានឈរនៅលេខរៀងទី២៤ ពោលគឺធ្លាក់ចុះ៣លេខរៀងពីសប្ដាហ៍មុន។
កាសែត Yonhap បានផ្សាយថាក្រុមចម្រៀងថ្មោងថ្មីរបស់កូរ៉េនេះបានបង្កើតកំណត់ត្រាជាក្រុមចម្រៀងស្រី K-pop ដំបូងដែលអាចឈរលើតារាង Billboard Hot 100 រយៈពេល១៣សប្ដាហ៍ជាប់ៗគ្នា បំបែកកំណត់ត្រាចាស់របស់ក្រុមចម្រៀងស្រីដ៏ល្បី Blackpink ធ្លាប់ឈរលើតារាងនេះជាប់ៗគ្នារយៈពេល១២សប្ដាហ៍។
បច្ចុប្បន្ន Blackpink គឺជាក្រុមចម្រៀងស្រីដ៏ធំជាងគេក្នុងពិភពលោក ដែលធ្លាប់បានបង្កើតកំណត់ត្រាបែបនេះកាលពីឆ្នាំ២០១៩ តាមរយៈបទចម្រៀង «Kiss and Makeup» ជាបទច្រៀងរួមជាមួយនឹងតារាចម្រៀង-អ្នកនិពន្ធអង់គ្លេស Dua Lipa។
ក្រុម Fifty Fifty បានឈរលេខរៀងទី១០០នៅលើតារាង កាលពីថ្ងៃទី២៨ ខែមីនា ក្លាយជាក្រុមចម្រៀងក្មេងខ្ចីដែលបានឈរលើតារាង ក្រោយប្រឡូកចូលក្នុងសិល្បៈត្រឹមរយៈពេល៥ខែប៉ុណ្ណោះ។ ថ្វីត្បិតរបូតពីចំណុចកំពូលនៃលេខរៀងទី១៧ លើតារាងកាលពីខែមុន ប៉ុន្តែក្រុមនេះនៅតែឈរយ៉ាងរឹងមាំមិនធ្លាក់ចេញពីតារាងចម្រៀងខាងលើនេះដដែល។
នៅលើតារាង Billboard 200 ក្រុមចម្រៀងបុរស Stray Kids បានឈរនៅលើកំពូល ឬ Top10 ក្នុងលេខរៀងទី៦ រយៈពេល២សប្ដាហ៍ជាប់គ្នា តាមរយៈបទចម្រៀង «5-Star»៕
ប្រភព៖ បរទេស
