យោងតាមគណនីហ្វេសប៊ុករបស់បវរកញ្ញចក្រវាឡឆ្នាំ ២០២០ កញ្ញា រ៉េត សារីតា បានវិលត្រលប់មកដល់មាតុភូមិកំណើតប្រកបដោយសុខសុវត្ថិភាពវិញហើយកាលពីថ្ងៃទី ១៥ ខែ កក្កដា ឆ្នាំ ២០២១។
ទោះជាកម្មវិធីប្រកួតបវរកញ្ញាចក្រវាឡពិភពលោក (Miss Universe 2020) បានបញ្ចប់ជាស្ថាពរតាំងពីថ្ងៃទី ១៧ ឧសភា ឆ្នាំ២០២១ កន្លងមកក្ដី ប៉ុន្តែនារីស្រអែមស្រស់ រ៉េត សារីតា បានបន្តស្នាក់នៅ និង ធ្វើដំណើរកម្សាន្តជួបជុំបងប្អូនខ្មែរដែលកំពុងរស់នៅសហរដ្ឋអាមេរិករយៈពេល៣ខែទើបកញ្ញាធ្វើមាតុភូមិនិវត្តន៍មកកាន់ព្រះរាជាណាចក្រកម្ពុជាវិញ។
ជារឿយៗ រ៉េត សារីតា ដែលនៅឯនាយសមុទ្រ តែងតែបង្ហាញពីសកម្មភាពខ្លួនមួយចំនួននៅលើបណ្ដាញសង្គមដើម្បីចែករំលែកចំពោះបងប្អូនខ្មែរដែលនៅឯស្រុកកំណើត ហើយភាគច្រើនសង្កេតឃើញថាទាំងបងប្អូនខ្មែរ ដែលនៅស្រុកគេនិងជនជាតិបរទេសបានទទួលស្វាគមន៍បវរកញ្ញាចក្រវាឡរបស់កម្ពុជារូបនេះយ៉ាងកក់ក្ដៅនៅគ្រប់រដ្ឋ ឬទីកន្លែងដែលកញ្ញាបានធ្វើដំណើរទៅដល់ បន្ថែមពីលើនោះក៏មានរៀបចំជាពិធីជប់លាងទទួលយ៉ាងកក់ក្ដៅផងដែរ។
យ៉ាងណាមិញដំណើរកម្សាន្តនៅទឹកដីសហរដ្ឋអាមេរិកបានបញ្ចប់ កញ្ញា រ៉េត សារីតា បានធ្វើដំណើរមកដល់ទឹកដីសុវណ្ណភូមិតាមរយៈបក្សាស្លាបដែរ ដោយសុខសុវត្ថិភាព ប៉ុន្តែដោយសារតែបញ្ហាការរីករាលដាលនៃមេរោគកូវីដ-១៩ កញ្ញាត្រូវតែឃុំខ្លួនធ្វើចត្តាឡីស័ក ១៤ ថ្ងៃដើម្បីតាមដានអាការៈបើសិនមិនមានរោគសញ្ញាគួរឱ្យសង្ស័យណាមួយទេ កញ្ញា នឹងបានវិលមកជួបជុំបងប្អូននិងមិត្តវិញហើយ។
នៅក្នុងសំណេររៀបរាប់ដែលប្រើប្រាស់ជាភាសាអង់គ្លេសនោះកញ្ញាក៏បានចែករំលែកពីបទពិសោធ ព្រមទាំងអនុស្សាវរីយ៍ល្អនៅក្រៅប្រទេសផងដែរ។ ត្រយងសូមធ្វើការបកប្រែមិនផ្លូវការ ដូចខាងក្រោម ៖
«ហ៊ឺម តើគួរចាប់ផ្ដើមពីចំណុចណា? អរុណសួស្ដី? ហាសៗ… ខ្ញុំដឹងថារកអ្វីឱ្យរីករាយជាងការដែលបានមកដល់ទឹកដីនៃប្រទេសកម្ពុជាដ៏អស្ចារ្យ! គ្រប់យ៉ាងផ្លាស់ប្ដូរយ៉ាងរហ័ស ខ្ញុំគ្មានអារម្មណ៍សោះថាជិត៣ខែហើយ។ មិនថាលទ្ធផលបែបណា ការប្រកួតកម្មវិធី Miss Universe បានផ្លាស់ប្ដូរជីវិតខ្ញុំជាច្រើនយ៉ាង ដែលពិបាកនឹងពិពណ៌នាជាពាក្យសម្ដី។ បន្ទាប់ពីទៅដល់កន្លែងជាច្រើន បានជួបនិងរាប់អានមិត្តច្រើននៅ US ខ្ញុំបានត្រលប់មកវិញជាមួយនឹងភាពស្រស់ថ្លា ពេញដោយការជំរុញទឹកចិត្ត គំនិតថ្មីៗ ដែលបានបំពេញក្នុងខ្លួនខ្ញុំ។ ខ្ញុំពិតជាចង់ជួបគ្រួសារខ្ញុំ និង មិត្តភក្ដិខ្ញុំណាស់។ តែពេលនេះ ចាប់ផ្ដើមចត្តាឡីស័ក១៤ថ្ងៃសិន។»