សារព័ត៌មានត្រយង បានចុះអនុសារណៈយោគយល់គ្នា (MOU) ជាមួយក្លិបបាល់ទាត់វិសាខា ដែលជាក្លិបបាល់ទាត់អាជីពមួយនៅកម្ពុជា និងកំពុងមានឈ្មោះបោះសម្លេងក្នុងការអភិវឌ្ឍវិស័យ កីឡាទាំងក្នុងស្រុក និងក្រៅស្រុក។ ពិធីចុះកិច្ចព្រមព្រៀងនេះធ្វើឡើង នាព្រឹកថ្ងៃសុក្រទី២៣ ខែមិថុនា ឆ្នាំ២០២៣ នៅកីឡដ្ឋានព្រីនស៍។
ការចុះអនុសារណៈយោគយល់គ្នា (MOU) នេះ ធ្វើឡើងដោយមានការចូលរួមពីលោក ប៊ិន ប៊ុណ្ណា អគ្គនាយកសារព័ត៌មានត្រយង លោក សំ នឿន អគ្គនាយករងសារព័ត៌មានត្រយង និងលោក ម៉ឺន រស្មី នាយកផ្នែក កីឡា តំណាង សារព័ត៌មានត្រយង។ ចំណែកភាគីខាងក្លិបបាល់ទាត់វិសាខាវិញ មាន លោកជំទាវ កែ សួន សុភី ប្រធានក្លិបបាល់ទាត់វិសាខា និងកញ្ញា អ៊ូ បញ្ញាសុកិត្យា អគ្គនាយិកាគ្រប់គ្រងក្លិបកីឡាបាល់ទាត់ វិសាខា រួមជាមួយគណៈគ្រប់គ្រងក្លិប គ្រូបង្វឹក និងកីឡាករជាច្រើន។
កញ្ញា អ៊ូ បញ្ញាសុកិត្យា អគ្គនាយិកាគ្រប់គ្រងក្លិបកីឡាបាល់ទាត់ វិសាខា បានថ្លែងអំណរគុណដៃគូសហការទាំងអស់ ដែលបានសហការ និងឧបត្ថម្ភគាំទ្រដល់ក្លិបរបស់យើងនាពេលកន្លងមក ក្នុងនោះមានសារព័ត៌មាន ត្រយង ដែរ ដែលបានរួមចំណែកយ៉ាងសំខាន់ ក្នុងការជួយផ្សព្វផ្សាយ និងធ្វើឲ្យមហាជនស្គាល់ក្លិបកីឡាបាល់ទាត់ វិសាខា កាន់តែទូលំទូលាយ ។
កញ្ញាបន្ដថា៖ «ក្នុងបទពិសោធន៍ នៃកិច្ចសហការនាពេលកន្លងមក យើងឃើញថា សារព័ត៌មាន ត្រយង ពិតជាបានរួមចំណែកជួយផ្សព្វផ្សាយរាល់ព័ត៌មានពាក់ព័ន្ធក្លិបរបស់យើងច្រើន ប្រកបដោយវិជ្ជាជីវៈ និងច្បាស់លាស់ ។ មិនតែប៉ុណ្ណោះ ត្រយង ក៏បានផ្សាយផ្ទាល់(Live) រាល់ការប្រកួតរបស់យើង ប្រកបដោយគុណភាព និងស្ដង់ដារទៀតផង ។ ទាំងអស់នេះហើយ ដែលនាំឲ្យពួកយើងសម្រេចបន្ដកិច្ចសហការជាមួយសារព័ត៌មាន ត្រយង ហើយសង្ឃឹមថា ភាគីទាំងពីរ នឹងពួតដៃគ្នា ដើម្បីជំរុញការផ្សព្វផ្សាយពីកិត្យានុភាពរបស់ក្លិប និងធ្វើឲ្យអន្ដរជាតិស្គាល់ពីក្លិបកាន់តែច្រើន»។
លោក ប៊ិន ប៊ុណ្ណា អគ្គនាយកសារព័ត៌មាន ត្រយង បានលើកឡើងថា សារព័ត៌មាន ត្រយង មានបទពិសោធន៍ផ្សព្វផ្សាយលើវិស័យសារព័ត៌មានជាច្រើនឆ្នាំមកហើយ ហើយការចាប់ផ្ដើមដំបូង ដែលនាំឲ្យមានការគាំទ្រច្រើន ក៏កើតចេញពីវិស័យកីឡាដែរ ។
លោកបន្តថា៖ «ការចាប់ដៃគ្នាកន្លងមកនេះ យើងឃើញថា សន្ទុះវិស័យកីឡាកម្ពុជាពិតជាមានការរីកចម្រើន ក្នុងនោះក្លិបកីឡាបាល់ទាត់ វិសាខា គឺជាក្លិបអាជីបមួយ មានការចាប់អារម្មណ៍ពីមហាជនច្រើន តាមរយៈអ្នកគាំទ្រ ។ រីឯសារព័ត៌មាន ត្រយង គឺជាទីផ្សារមួយ នៅពេលមានផលិតផលល្អ ហើយយកទៅផ្សព្វផ្សាយ ធ្វើឲ្យមានការគាំទ្រច្រើនមែនទែន ជាក់ស្ដែងក្នុងមួយខែមានអ្នកតាមដានជាង ១៤លាននាក់ឯណោះ» ។
អគ្គនាយកសារព័ត៌មាន ត្រយង បានបង្ហាញសុទិដ្ឋិនិយមទៀតថា៖ «ការចាប់ដៃបន្ដទៀតនេះ នឹងធ្វើឲ្យវិស័យកីឡា ពិសេសធ្វើឲ្យក្លិបកីឡាបាល់ទាត់ វិសាខា និងសារព័ត៌មាន ត្រយង កាន់តែល្បីរន្ទឺ ហើយគេស្គាល់កាន់តែទូលំទូលាយថែមទៀត ទាំងក្នុង និងក្រៅប្រទេស» ។
ការចាប់ ដៃសហការគ្នាដែរ គឺដើម្បីធ្វើជាដៃគូក្នុងការផ្សព្វផ្សាយ ព័ត៌មាន កីឡានៅកម្ពុជាក៏ដូចជា ជួយ លើកកម្ពស់វិស័យកីឡា និងឆ្លុះបញ្ជាំងពីសារៈសំខាន់នៃសន្ដិភាពសម្រាប់ ការអភិវឌ្ឍវិស័យ កីឡានៅកម្ពុជានាពេលបច្ចុប្បន្នឱ្យកាន់តែទូលំទូលាយទៅកាន់សាធារណជនទាំងក្នុងប្រទេសក្នុង តំបន់ និងសកលលោក។
គួរបញ្ជាក់ថា កិច្ចព្រមព្រៀង រវាងសារព័ត៌មាន និងក្លិបដែលជាសមាជិកពានរង្វាន់លីគកំពូល កម្ពុជា នេះដើម្បីចូលរួមធ្វើកិច្ចសហប្រតិបត្តិការជាមួយគ្នាក្នុងការផ្សព្វផ្សាយព័ត៌មាន និងការផ្សាយបន្ដ ផ្ទាល់ផ្សេងៗទាក់ទងនឹងកីឡាបាល់ទាត់និងកម្មវិធីផ្សេងៗដែលរៀបចំដោយក្លិបបាល់ទាត់វិសាខា។ ក្នុងនាមជាដៃគូសហការ ក្រុមហ៊ុនទាំ២ រំពឹងថានឹងជួយពង្រីកនូវវិសាលភាពព័ត៌មានកីឡាបាល់ ទាត់នៅកម្ពុជាឲ្យកាន់តែទូលំទូលាយបន្ថែម ទៀតនៅលើកឆាកអន្រជាតិ៕