ដោយសារជួបបញ្ហាខ្វះខាតថវិកាជាច្រើនក្នុងការចំណាយទៅលើការរៀបចំការប្រកួត ការហូបចុក ស្នាក់នៅ និងធ្វើដំណើរក្លឹបបាល់ទាត់សន្តិភាពខេត្តកំពង់ធំ បានប្រកាសស្វែងរកការឧបត្ថម្ភគាំទ្រ ដើម្បីដឹកនាំក្រុមបាល់ទាត់តំណាងខេត្តកំពង់ធំចូលរួមប្រកួតក្នុងពានរង្វាន់ សម្តេចអគ្គមហាសេនាបតីតេជោ ហ៊ុន សែនលើកទី១៧ ឆ្នាំ២០២៣-២០២៤ (ថ្នាក់ខេត្ត)។
តាមរយ:ទំព័រហ្វេសបុកផ្លូវការរបស់ក្លិបបានសរសេររៀបរាប់កាលពីថ្ងៃទី២១ មិថុនា ថា៖ «ជាថ្មីម្តងទៀតដូចជា សម្តេច ទ្រង់ ឯកឧត្តម លោកឧកញ៉ា លោក-លោកស្រី និងសប្បុរសជនទាំងអស់បានជ្រាបហើយថា ក្លឹបបាល់ទាត់សន្តិភាពខេត្តកំពង់ធំយើងខ្ញុំ បានទទួលសិទ្ធិពីមន្ទីរអប់រំយុវជននិងកីឡាខេត្តកំពង់ធំ ក្នុងការរៀបចំដឹកនាំក្រុមបាល់ទាត់តំណាងខេត្តកំពង់ធំចូលរួមប្រកួតក្នុងពានរង្វាន់ សម្តេចអគ្គមហាសេនាបតីតេជោ ហ៊ុន សែនលើកទី១៧ឆ្នាំ២០២៣-២០២៤(ថ្នាក់ខេត្ត) ទន្ទឹមនឹងការទទួលខុសត្រូវរៀបចំដឹកនាំនេះយើងខ្ញុំក៏ជួបនៅបញ្ហាខ្វះខាតថវិកាជាច្រើនក្នុងការចំណាយទៅលើការរៀបចំការប្រកួត ការហូបចុក ស្នាក់នៅ និងធ្វើដំណើរចេញទៅប្រកួតនៅខេត្តឆ្ងាយៗផ្សេងៗដូចជា ខេត្តសៀមរាប ព្រះវិហារ មណ្ឌលគីរី និងខេត្តរតនៈគីរី ជាដើម»។
ក្លឹបបាល់ទាត់សន្តិភាពខេត្តកំពង់ធំ បានសរសេររៀបរាប់បន្តថា៖«អាស្រ័យដូចបានជម្រាបជូនខាងលើ យើងខ្ញុំសូមអំពាវនាវដល់សម្តេច ទ្រង់ ឯកឧត្តម លោកឧកញ៉ា លោក-លោកស្រី និងសប្បុរសជនព្រមទាំងថ្នាក់ដឹកនាំគ្រប់មន្ទីរ ស្ថាប័ន-អង្គភាព ទាំងអស់ មេត្តាជួយឧបត្ថម្ភគាំទ្រដល់យើងខ្ញុំ ដើម្បីដោះស្រាយបញ្ហាខ្វះខាតនេះដោយសេចកី្តអនុគ្រោះផងចុះ »។
ក្លឹប បានបន្ថែមថា៖ «យើងខ្ញុំក៏សូមថ្លែងអំណរគុណយ៉ាងក្រៃលែងចំពោះថ្នាក់ដឹកនាំខេត្តកំពង់ធំគ្រប់ជាន់ថ្នាក់ និងលោកប្រធានមន្ទីរអប់រំយុវជននិងកីឡាខេត្តកំពង់ធំព្រមទាំងសហការី ព្រមទាំងសប្បុរសជននានា ដែលបានជួយជ្រោមជ្រែង និងឧបត្ថម្ភគាំទ្រដល់កីឡាករបាល់ទាត់ខេត្តកំពង់ធំ ក្នុងរៀបចំការប្រកួតកន្លងមកបានរលូន ក្នុងន័យនិងគោលដៅពង្រឹងរួមជាមួយការលើកស្ទួយឲ្យវិស័យកីឡាបាល់ទាត់ខេត្តកំពង់ធំមានការផុសផុលនិងរីកចម្រើនឡើងវិញ»។
ប្រសិនសម្តេច ទ្រង់ ឯកឧត្តម លោកឧកញ៉ា លោក-លោកស្រី និងសប្បុរសជនទាំងអស់ មានបំណងចង់ជួឧបត្ថម្ភគាំទ្រ តាមរយៈ៖
BA: VEN VOUNGPISETH
- 012914940(USD)
- 070995565(KHMER)
សម្រាប់ ពានរង្វាន់ សម្តេចអគ្គមហាសេនាបតីតេជោ ហ៊ុន សែនលើកទី១៧ឆ្នាំ២០២៣-២០២៤(ថ្នាក់ខេត្ត) ក្លឹបបាល់ទាត់សន្តិភាពខេត្តកំពង់ធំ ស្ថិតនៅក្នុងពូល ឃ មានដូចខាងក្រោម៖
កាលវិភាពប្រកួតមានដូចខាងក្រោម៖
គួរបញ្ជក់ថា សម្រាប់ក្រុមបាល់ទាត់សន្តិភាពកំពង់ធំ ក្នុងរដូវកាលឆ្នាំ២០២២ កន្លងទៅក្នុងពានរង្វាន់បាល់ទាត់សម្តេចតេជោ ហ៊ុន សែន ជើងឯកថ្នាក់ខេត្ត ជាក្រុមលេខ១ក្នុងពូល D ក្រោយប្រកួតឈ្នះ៣លើក និងស្មើ៣លើក ដឹកដៃក្រុមអធិរាជដំរីឦសាន ឡើងទៅវគ្គ៨ក្រុមចុងក្រោយ តែចាញ់ក្រុមជើងឯករងឧត្តរមានជ័យ នៅវគ្គនេះដោយបាល់ប៉េណាំងទីកាត់សេចក្តី៤-៣ ក្រោយប្រកួតស្មើគ្នាទាំង២ជើង ២-២៕