ក្រុមបាល់ទាត់ភ្នំពេញក្រោន នឹងត្រូវជួប PSIS Semarang សមាជិកលីគកំពូលរបស់ឥណ្ឌូនេស៊ី Liga 1 នៅថ្ងៃទី២៤ ខែមិថុនា វេលាម៉ោង ៦:៣០នាទីល្ងាច (ម៉ោងនៅកម្ពុជា) នៅកីឡដ្ឋាន Jatidiri ជំនួបមិត្តភាពអន្តរជាតិ Pre-Season 2023 នៅប្រទេសឥណ្ឌូនេស៊ី។
មុនប៉ះគ្នាល្ងាចនេះលោក Oleg Starynskyi ថ្លែងពីចំណាប់អារម្មណ៍របស់ដូច្នេះថា៖ «យើងពិតជារីករាយណាស់ដែលទទួលការអញ្ជើញមកទីនេះ យើងសង្ឃឹមថាវានឹងក្លាយជាការប្រកួតដ៏ល្អ ដើម្បីឲ្យអ្នកទាំងអស់គ្នាមានភាពរំភើប ព្រោះយើងមានដៃគូប្រកួតល្អ។
គ្រូបង្វឹកខាងលើបន្តទៀតថា៖«ខ្ញុំសង្ឃឹមថាអ្នកគាំទ្រមកគាំទ្រច្រើន ព្រោះពួកគេមានអ្នកគាំទ្រច្រើននៅ Semarang ដូច្នេះខ្ញុំគិតថាទាំងភាពតានតឹងក្នុងការប្រកួត បរិយាកាសអ្នកគាំទ្រ នឹងធ្វើឲ្យការប្រកួតមានកម្រិតមួយដែលខ្ពស់ជាលក្ខណៈអន្តរជាតិតែម្តង»។
ដោយឡែកក្រុមបាល់ទាត់ភ្នំពេញក្រោន គឺជាម្ចាស់ជើងឯកពានរង្វាន់លីគកំពូលកម្ពុជា Cambodian Premier League 2022 នឹងតំណាងឱ្យកម្ពុជា ចូលរួមប្រកួតពានរង្វាន់ជើងឯកកម្រិតទី២ប្រចាំទ្វីបអាស៊ី គឺ AFC Cup រដូវកាលឆ្នាំ២០២៣-២៤ ក្នុងកូតាវគ្គជម្រុះបឋម។
វគ្គជម្រុះបឋមប្រចាំតំបន់អាស៊ាន នេះហៅថា Preliminary ដែលមាន២គូ ត្រូវប្រកួតនៅថ្ងៃទី ១៦ ខែសីហា ឆ្នាំ២០២៣ ក្នុងនោះ៖
គូទី១៖ ភ្នំពេញក្រោន (កម្ពុជា) ប៉ះ Young Elephants (ឡាវ)
គូទី២៖ Yangon United (មីយ៉ាន់ម៉ា) ប៉ះ Kasuka (ប្រ៊ុយណេ)
វគ្គជម្រុះ Play Off Round នឹងធ្វើឡើងនៅថ្ងៃទី២៣ ខែសីហា ឆ្នាំ២០២៣ ដោយ៖
គូទី១៖ Tampines Rovers (សិង្ហបុរី) ប៉ះ អ្នកឈ្នះរវាង ភ្នំពេញក្រោន និងYoung Elephants
គូទី២៖ PSM Makassar (ឥណ្ឌូណេស៊ី) ប៉ះ អ្នកឈ្នះរវាង Yangon United និង Kasuka៕