តារាចម្រៀង ម៉េង កែវពេជ្ជតា នៅថ្ងៃសុក្រនេះ (១៦ ខែកក្កដា ២០២១) បានចេញមកបង្ហោះអួតរូបគំនូរមួយសន្លឹកដែលជាស្នាដៃគូររូបដោយកូនស្រីពៅរបស់ខ្លួនតាមរយៈបណ្ដាញសង្គម។
សូមចុចអាន អ្នកនាង ម៉េង ពេជ្ជតា រំភើបខ្លាំងពេលទៅចាក់វ៉ាក់សាំង បានជួបមនុស្សពិសេសនៅទីនោះ!
អ្នកមេម៉ាយកូនពីរអ្នកស្រី ម៉េង កែវពេជ្ជតា ដែលមិនត្រឹមតែមានទឹកដមសំឡេងល្អ បកស្រាយបទចម្រៀងបានពីរោះ តែក៏មានសមត្ថភាពអាចច្នៃ និង ដេរម៉ូដសំលៀកបំពាក់បាននោះ ហាក់រំភើបព្រោះតែកូនស្រីមានដុងស្រដៀងនឹងខ្លួន ទើបបានបង្ហោះចែករំលែកស្នាដៃគំនូរដ៏ស្អាតមួយដែលកូនស្រីពៅ កុមារី សង្វារពេជ្រ បានគូររូបឱ្យអ្នកស្រី។
ថ្វីត្បិតតែស្នាដៃនោះមើលទៅមិនអាចនិយាយបានថាដូច១០០ភាគរយ តែបើពិនិត្យពីសិល្បៈនៃការច្នៃប្រឌិតខ្ពស់របស់ម្ចាស់ស្នាដៃ ធ្វើឱ្យមហាជនមិនអាចប្រកែកបានទេថា មានលក្ខណៈប្រណិត ប្លែក និង ទាន់សម័យ ខុសពីគំនូរទូទៅ។
ទឹកចិត្តជាម្ដាយម្នាក់ពិតជារីករាយដែលកូនស្រីខ្លួនមានដុងនិងទេពកោសល្យល្អតាំងពីកំណើតអាចគូររូបអ្នកស្រីពេញដោយភាពច្នៃប្រឌិតខ្ពស់ ប៉ុន្តែផ្ទុយមកវិញបើទោះជារូបមិនស្អាត ក៏ក្នុងនាមជាម្ដាយម្នាក់ អ្នកស្រីរំភើបរួចស្រេចទៅហើយចំពោះទឹកចិត្តរបស់កូនដែលមានចំពោះអ្នកស្រី។
តារាចម្រៀងជើងចាស់នៅតែមានការគាំទ្រច្រើន ហើយក៏ជាអ្នកម្ដាយដ៏ឆ្នើមរបស់កុមារារតនៈ និង កុមារីសង្វារពេជ្រ បានបង្ហាញពីក្ដីរីករាយរបស់ខ្លួន តាមរយៈសំណេរយ៉ាងខ្លីមួយ ហាក់និយាយជាមួយនឹងកូនប្រុសស្រីរបស់អ្នកស្រីថា ៖
«ស្អាតហួសកូនហ្អេីយ 
រតនៈមេីលប្អូនកូនឯងនេះចេះណាស់ អរគុណកូនស្រីពៅ កូនពូកែណាស់ ពេជ្ជតាសង្វាពេជ្រ 
Pich Pinkiepie Neak Slasher»
ខណៈអ្នកគាំទ្រជាច្រើនបានចូលមកកោតសរសើរចំពោះស្នាដៃគូរគំនូររបស់កូនស្រីពៅអ្នកស្រី ម៉េង កែវពេជ្ជតា ថាពូកែប៉ិនប្រសប់ដូចជាអ្នកម្ដាយ ដោយមានអ្នកខ្លះទៀតបានឆ្លៀតសរសើរពីសម្រស់របស់អ្នកមេម៉ាយចាយរាងរូបនេះថានៅតែស្អាត ហើយកាន់តែស្អាតនិងក្មេងពីមួយថ្ងៃទៅមួយថ្ងៃថែមទៀតផង។
គួរដឹងដែរថាកូនស្រីពៅរបស់អ្នកស្រី កុមារី សង្វារពេជ្រ ក្រៅពីមានសមត្ថភាពគូររូបច្នៃម៉ូដ ដេញហ្គីតា បានហើយនោះ ថែមទាំងអាច កូដទ្រ ចេញជាចង្វាក់បទចម្រៀងបានយ៉ាងពីរោះថែមទៀតផង៕
