កុមារី សរពេជ្ញ ម៉ានីកា ដែលប្រិយមិត្តអ្នកទស្សនាធ្លាប់ស្គាល់ស្នាដៃសម្ដែងនៅក្នុងភាពយន្ត «នាឡិកាដាស់វិញ្ញាណ» និងរឿងភាគ «អ្នកម៉ាក់វ័យក្មេង វគ្គ១&វគ្គ២» រួចមកហើយ រឹតតែទទួលបានការសរសើរច្រើនពីអ្នកគាំទ្រនិងអ្នកតាមដានទស្សនាខ្លាំងថែមទៀត បន្ទាប់ពីក្មួយស្រីបានបញ្ចេញថ្វីដៃសម្ដែងជាតួអង្គកូនភ្លោះដែលមានចរិតលក្ខណៈផ្ទុយគ្នាមួយកាច និងមួយទៀតស្លូតហើយមានជំងឺតាំងពីកំណើត។
សូមចុចអាន ស៊ីន យូប៊ីន ដើរតួកូនភ្លោះដំបូងលេងទឹកមុខឡើងសាហាវ អ្នកណាឃើញក៏គ្រឺតនិងខ្នាញ់!
កុមារីវ័យត្រឹមតែ ៩ឆ្នាំរូបនេះ ពិតជាមានសមត្ថភាពសម្ដែងបានល្អព្រោះមិនថាក្មួយស្រីត្រូវបានអ្នកដឹកនាំផ្ដល់ឱកាសឱ្យសម្ដែងតួអង្គកូនក្មេងមានចរិតបែបណាក្មួយស្រីសម្ដែងបានសមត្រូវចិត្តអ្នកដឹកនាំ និងអ្នកទស្សនាទាំងអស់។ និយាយដល់រឿងការសម្ដែង តួក្មេងសម្បូរហាងឆេង និង ឧស្សាហ៍បង្ហាញវត្តមានច្រើននៅលើកញ្ចក់ទូរទស្សន៍ PNN បានទទួលការសរសើរយ៉ាងខ្លាំងសម្រាប់ការសម្ដែងជាតួអង្គវ័យក្មេងរបស់កញ្ញា ស៊ីន យូប៊ីន នៅក្នុងរឿង «ព្រហ្មលិខិតលម្អៀង» រហូតអ្នកទស្សនាលាន់មាត់សរសើរគ្រប់គ្នាសម្ដែងល្អមិនចាញ់តារាចាស់ៗប៉ុន្មាននោះទេ។
ពិសេសតាមរយៈវីដេអូមួយនៅលើផេក PNN Drama Live ដកស្រង់ចេញពីក្នុងសាច់រឿងដែលក្មួយស្រី សម្ដែងពីអាការៈអន់ចិត្តចំពោះឪពុកម្ដាយបារម្ភចំពោះតែបងប្អូនភ្លោះរបស់ខ្លួន ទាំងទឹកមុខខឹង អន់ចិត្ត និងទឹកភ្នែកបញ្ជាឱ្យហូរដូចទឹកបាក់ទំនប់ រហូតធ្វើឱ្យឃ្លីបដែលមានរយៈពេលត្រឹមជាង១នាទីនោះមានចំនួនទស្សនាជាង១លានដង។
យ៉ាងណាមិញវគ្គរបស់កុមារី សរពេជ្ញ ម៉ានីកា ដែលសម្ដែងជាតួអង្គកូនភ្លោះ នូ និង នុត ជាតួអង្គវ័យក្មេងរបស់កញ្ញា ស៊ីន យូប៊ីនបានអស់ត្រឹមថ្ងៃពុធទី១៤ ខែកក្កដា ឆ្នាំ២០២១ ហើយ ព្រោះនៅភាគក្រោយៗមកទៀតតួអង្គ នូ និង នុត ធំដឹងក្ដីគឺកញ្ញា យូប៊ីន។
កុមារី ម៉ានីកា ក៏ផុសសំណេរថ្លែងអំណរគុណចំពោះផលិតកម្ម PR និង PNN ដែលបានផ្ដល់ឱកាសឱ្យក្មួយបានសម្ដែងក្នុងរឿងភាគខាងលើនេះ។
«យប់នេះ នុតនិងនូ ធំហើយ 
នុតនិងនូតូច សូមអរគុណស្ថានីយ៍ទូរទស្សន៍PNN ក៏ដូចជាផលិតកម្ម PR Production និងអរគុណបងៗពូមីងយាយតាទាំងអស់គ្នា សម្រាប់ក្តីស្រលាញ់ និងការគាំទ្រភាពយន្តខ្មែរ សូមជូនពរបងៗពូមីងយាយតា មានសុខភាពល្អ និងមានសុភមង្គលគ្រប់ក្រុមគ្រួសារ 
»
គួរដឹងដែរថាការសម្ដែងរបស់កុមារី សរពេជ្ញ ម៉ានីកា អាចធ្វើឱ្យទស្សនិកជនចូលតួ ស្រលាញ់ អាណិតស្អប់ទៅតាមសាច់រឿងដែលក្មួយសម្ដែងដូចជា ម៉ានីកា សម្ដែងជាកុមារី នីរ័ត្ន ក្នុងរឿង «អ្នកម៉ាក់វ័យក្មេងវគ្គ១&វគ្គ២» មានអត្តចរិតជាក្មេងឆ្លាតគួរឱ្យស្រលាញ់ ចំណែកសម្ដែងជាតួអង្គនូវិញ ជាក្មេងកាចឆ្នាស់គ្មានហេតុផល ខណៈសម្ដែងតួអង្គកុមារីនុត ជាក្មេងសុភាពស្លូតបូតតែឈឺច្រើននៅក្នុងរឿង«ព្រហ្មលិខិតលម្អៀង»៕
