យោងតាមការចុះផ្សាយរបស់លោក Fabrizio Romano បានឲ្យដឹងថាក្លិបបាល់ទាត់ Paris Saint-Germain ត្រៀមប្រកាសតែងតាំងលោក Luis Enrique ជាគ្រូបង្គោលថ្មី សម្រាប់រដូវកាល ២០២៣-២៤ ខាងមុននេះ។
បច្ចុប្បន្នការចរចារវាងភាគី PSG និងលោក Luis Enrique បានឈានដល់ចំណុចចុងក្រោយហើយ ពោលគឺភាគីទាំងសងខាងកំពុងចរចារឿងប្រាក់ឈ្នួល និងរឿងលម្អិតមួយចំនួនទៀត។ បើតាមសេចក្ដីរាយការណ៍ដដែល ការតែងតាំងនឹងធ្វើឡើងនៅឆាប់ៗនេះ បើគ្មានអ្វីប្រែប្រួលនោះទេ។
លោក Luis Enrique បានចាកចេញពីតំណែងក្នុងនាមជាគ្រូបង្វឹកក្រុមជម្រើសជាតិអេស៉្បាញ បន្ទាប់ពីមិនអាចដឹកនាំក្រុមឆ្លងផុតវគ្គ១៦ក្រុមចុងក្រោយនៃពានរង្វាន់ FIFA World Cup ២០២២ នៅប្រទេសកាតាបាន។
ក្រុមជម្រើសជាតិអេស៉្បាញ បានប្រកួតស្មើគ្នាជាមួយម៉ារ៉ុក ក្នុងលទ្ធផល ០-០ និងទាត់បាល់ ១១ម៉ែត្រចាញ់ក្រុមម៉ារ៉ុកក្នុងលទ្ធផល ៣-០។ នេះគឺជារឿងដ៏គួរឲ្យភ្ញាក់ផ្អើលយ៉ាងខ្លាំងសម្រាប់អ្នកគាំទ្ររបស់អេស៉្បាញក្រោយជ្រុះចេញក្នុងព្រឹត្តិការណ៏ដ៏ធំនៅប្រទេសកាតា។
ខណ:លោក Luis Enrique ធ្លាប់ដឹកនាំក្រុមអ្នកមានបុណ្យ FC Barcelona ឈ្នះពានរង្វាន់ UEFA Champions League រដូវកាល ២០១៤-១៥ ជំនាន់ MSN (Messi, Neymar និង Suarez)៕