ក្រោយប្រកួតជម្រុះអស់រយ:ពេលកន្លះខែរួចមក ព្រឹត្តិការណ៍ប្រកួតពានរង្វាន់យុវជនអាស៊ី AFC U-17 Asian Cup ឆ្នាំ 2023 បានរកឃើញក្រុមដែលត្រូវជួបគ្នានៅវគ្គផ្ដាច់ព្រ័ត្ររួចរាល់ គឺក្រុមយុវជនអាយុក្រោម ១៧ឆ្នាំ ជម្រើសជាតិរ៉េខាងត្បូង ត្រូវជួបយុវជនអាយុក្រោម ១៧ឆ្នាំ ជម្រើសជាតិជប៉ុន នៅវគ្គផ្ដាច់ព្រ័ត្រនៅរាត្រីនេះ។
ខាងក្រោមនេះជាទិន្នន័យត្រួសៗពីក្រុមទាំង ២ ក្នុងការប្រកួត ព្រឹត្តិការណ៍ពានរង្វាន់យុវជនអាស៊ី AFC U-17 Asian Cup ឆ្នាំ 2023
វគ្គជម្រុះក្នុងពូល៖
ក្រុមយុវជនអាយុក្រោម ១៧ឆ្នាំ កូរ៉ែខាងត្បូង ស្ថិតនៅក្នុងពូល B ឆ្លងកាត់ ៣ប្រកួត ឈ្នះកាតា ៦-១, ឈ្នះអាហ្វហ្គានីស្ថាន ៤-០ និងចាញ់អ៊ីរ៉ង់ ២-០ ឈរលេខ ២ក្នុងតារាងពូល B មាន៦ពិន្ទុ។
ក្រុមយុវជនអាយុក្រោម ១៧ឆ្នាំ ជប៉ុន ស្ថិតនៅក្នុងពូល D ឆ្លងកាត់ ៣ប្រកួត ស្មើជាមួយ អ៊ូសបេគីស្ថាន ១-១ ឈ្នះវៀតណាម ៤-០ និងឈ្នះឥណ្ឌា ៨-៤ ឈរលេខ ១ក្នុងតារាងពូល D មាន៧ពិន្ទុ។
វគ្គ ៨ក្រុមចុងក្រោយ៖
ក្រុមយុវជនអាយុក្រោម ១៧ឆ្នាំ កូរ៉ែខាងត្បូង បានយកឈ្នះក្រុមយុវជនអាយុក្រោម ១៧ឆ្នាំ ថៃ ក្នុងលទ្ធផល ៤-១ កាលពីថ្ងៃទី២៥ មិថុនា នៅកីឡដ្ឋាន Pathum Thani។
ក្រុមយុវជនអាយុក្រោម ១៧ឆ្នាំ ជប៉ុន បានយកឈ្នះ ក្រុមយុវជនអាយុក្រោម ១៧ឆ្នាំ អូស្រ្តាលី ក្នុងលទ្ធផល ៣-១ កាលពីថ្ងៃទី២៦ មិថុនា នៅកីឡដ្ឋាន Pathum Thani។
វគ្គ ៤ក្រុមចុងក្រោយ៖
ក្រុមយុវជនអាយុក្រោម ១៧ឆ្នាំ កូរ៉ែខាងត្បូង បានយកឈ្នះក្រុមយុវជនអាយុក្រោម ១៧ឆ្នាំ អ៊ូសបេគីស្ថាន ក្នុងលទ្ធផល ១-០ កាលពីថ្ងៃទី២៩ មិថុនា នៅកីឡដ្ឋាន Pathum Thani។
ក្រុមយុវជនអាយុក្រោម ១៧ឆ្នាំ ជប៉ុន បានយកឈ្នះ ក្រុមយុវជនអាយុក្រោម ១៧ឆ្នាំ អ៊ីរ៉ង់ ក្នុងលទ្ធផល ៣-០ កាលពីថ្ងៃទី២៩ មិថុនា នៅកីឡដ្ឋាន Pathum Thani។
វគ្គផ្ដាច់ព្រ័ត្រ៖
ក្រុមយុវជនអាយុក្រោម ១៧ឆ្នាំ របស់កូរ៉េខាងត្បូង នឹងត្រូវជួបយុវជនអាយុក្រោម ១៧ឆ្នាំ របស់ជប៉ុន នៅវគ្គផ្ដាច់ព្រ័ត្រ ដែលនឹងធ្វើឡើងនៅថ្ងៃទី០២ កក្កដា វេលាម៉ោង ៧:០០នាទីយប់ នៅកីឡដ្ឋាន Pathum Thani ប្រទេសថៃ។
ក្នុងព្រឹត្តិការណ៍ប្រកួតពានរង្វាន់យុវជនអាស៊ី AFC U-17 Asian Cup កន្លងមក៖
យុវជនអាយុក្រោម ១៧ឆ្នាំជម្រើសជាតិជប៉ុន គឺជាក្រុមការពារតំណែងជើងឯកឆ្នាំចាស់ នឹងជាក្រុមដែលជោគជ័យជាងគេក្នុងពានរង្វាន់មួយនេះផង ពោលគឺពួកគេធ្លាប់ឈ្នះបានចំនួន៣ លើករួចមកហើយ នៅឆ្នាំ(១៩៩៤, ២០០៦ និងចុងក្រោយនៅឆ្នាំ២០១៨) ។
យុវជនអាយុក្រោម ១៧ឆ្នាំជម្រើសជាតិកូរ៉េខាងត្បូង គក៏ជាក្រុមដែលធ្លាប់ជោគជ័យច្រើផងដែរនៅក្នុងពានរង្វាន់មួយនេះ ពោលគឺពួកគេធ្លាប់ឈ្នះជើងឯកបានចំនួន២ លើក គឺនៅឆ្នាំ(១៩៨៦ និងនៅឆ្នាំ២០០២) ខណ:នៅឆ្នាំ២០១៨ បានត្រឹមវគ្គពាក់កណ្ដាលផ្ដាច់ព្រ័ត ។
គួរបញ្ជាក់ថា ព្រឹត្តិការណ៍ប្រកួតពានរង្វាន់យុវជនអាស៊ី AFC U-17 Asian Cup ឆ្នាំ 2023 មាន ១៦ក្រុមចូលរួម ដែលថៃបានធ្វើជាម្ចាស់ផ្ទះ និងបានប្រព្រឹត្តិទៅចាប់ពីថ្ងៃទី១៥ ខែមិថុនា ឆ្នាំ២០២៣ គ្រោងនឹងស្វែងរកឃើញម្ចាស់ជើងឯកនៅថ្ងៃទី០២ ខែកក្កដា ឆ្នាំ២០២៣ នែះ៕
