ក្រុមយុវជនអាយុក្រោម ១៧ឆ្នាំជម្រើសជាតិជប៉ុន គ្រងជើងឯក ២លើកជាប់គ្នា ក្នុងព្រឹត្តិការណ៍ប្រកួតពានរង្វាន់យុវជនអាស៊ី AFC U-17 Asian Cup ឆ្នាំ 2023 ក្រោយយកឈ្នះក្រុមយុវជនអាយុក្រោម ១៧ឆ្នាំជម្រើសជាតិ កូរ៉េខាងត្បូង ក្នុងលទ្ធផល ៣-០ កាលពីរាត្រីថ្ងៃទី០២ កក្កដា នៅកីឡដ្ឋាន Pathum Thani ប្រទេសថៃ។
ជ័យជម្នះលើកនេះ គឺជាការគ្រងជើងឯក ២ឆ្នាំជាប់គ្នាផងដែរ ក្រុមយុវជនអាយុក្រោម ១៧ឆ្នាំ ជម្រើសជាតិជប៉ុន ដោយនៅឆ្នាំ២០១៨ គ្រងជើងឯក ក្រោយយកឈ្នះ តាជីគីស្ថាន ក្នុងលទ្ធផល ១-០ នៅកីឡដ្ឋាន Bukit Jalil នៅប្រទេសម៉ាឡេស៊ី (នៅឆ្នាំ២០២០ ខកខាន)។
រំលឹកដែរថា បន្ទាប់ពីការពារតំណែងជើងឯកឆ្នាំចាស់ U-17 ជប៉ុន លើកនេះជាការឈ្នះលើកទី៤ ហើយក៏ជាក្រុមដែលជោគជ័យជាងគេក្នុងពានរង្វាន់មួយនេះផង ពោលគឺពួកគេធ្លាប់ឈ្នះបានចំនួន ៣លើករួចមកហើយ នៅឆ្នាំ(១៩៩៤, ២០០៦ និងឆ្នាំ២០១៨) និងចុងក្រោយនៅឆ្នាំ២០២៣ នេះ។
ព្រឹត្តិការណ៍ប្រកួតពានរង្វាន់យុវជនអាស៊ី AFC U-17 Asian Cup ឆ្នាំ 2023 មាន ១៦ក្រុមចូលរួម ដែលថៃបានធ្វើជាម្ចាស់ផ្ទះ និងបានប្រព្រឹត្តិទៅចាប់ពីថ្ងៃទី១៥ ខែមិថុនា ឆ្នាំ២០២៣ គ្រោងនឹងស្វែងរកឃើញម្ចាស់ជើងឯកនៅថ្ងៃទី០២ ខែកក្កដា ឆ្នាំ២០២៣ នែះ។
គួរបញ្ជាក់ថា ព្រឹត្តិការណ៍ប្រកួតពានរង្វាន់យុវជនអាស៊ី AFC U-17 Asian Cup ធ្វើឡើងរយ: ពេល ២ឆ្នាំម្ដង ដោយជប៉ុនជាក្រុមឈ្នះជើងឯកច្រើនជាងគេ ចំនួន ៤លើក កូរ៉េខាងត្បូង, កូរ៉េខាងជើង, ចិន, អារ៉ាប៊ីសាអូឌីត និងអូម៉ង់ ចំនួន ២លើក ខណ:កាតា, អ៊ីរ៉ង់, អ៊ូសបេគីស្ថាន, ថៃ និងអ៊ីរ៉ាក់ ចំនួន ១លើក៕
