កាលពីពេលថ្មីៗនេះ មានលេចលឺដំណឹងថា ក្លិបនៅលីគកំពូលកម្ពុជា ដែលជាសមាជិកពានរង្វាន់ Cambodian Premier League កំពុងបង្ហាញការចាប់អារម្មណ៍នាំយកកីឡាករជម្រើសជាតិឡាវ ២នាក់ ដើម្បីមកចូលរួមជាមួយក្លិប ត្រៀមរដូវកាលថ្មីឆ្នាំ២០២៣-២៤ ខាងមុខ។
បើតាមប្រភពមកពីមន្រ្តី១រូបរបស់សហព័ន្ធកីឡាបាល់ទាត់ឡាវ បានប្រាប់ក្រុមការងារសារព័ត៌មានត្រយង នៅដើមសប្ដាហ៍នេះថាកីឡាករជម្រើសជាតិឡាវ ដែលសមាជិកលីគកំពូលកម្ពុជា កំពុងតាមប្រមាញ់នោះមាន Bounpthachan Bounkong និង Chony Wenpaserth។
សម្រាប់កីឡាករ Bounpthachan Bounkong បច្ចុប្បន្នកំពុងប្រកបអាជីពនៅក្លិប YOUNG ELEPHANTS FC ក្នុងលីគកំពូលឡាវ បង្ហាញខ្លួនឲ្យក្រុមបានចំនួន ១៣លើក ក្នុងរដូវកាលឆ្នាំ២០២៣ នេះ ដោយជួយក្រុមឈ្នះបាន ១១លើក និងរកគ្រាប់បាល់បាន ១៦គ្រាប់។ កីឡាករវ័យ២២ឆ្នាំរូបនេះធ្លាប់បានកោះហៅចូលក្រុមជម្រើសជាតិខ្លួនតាំងពីឆ្នាំ២០១៨មក ព្រមទាំងបានគ្រាប់បាល់៤គ្រាប់ផងដែរ។
ចំណែកកីឡាករទី២នោះគឺខ្សែបម្រើប្រយុទ្ធវ័យ២០ឆ្នាំ Chony Wenpaserth ដោយបច្ចុប្បន្នកំពុងប្រកបអាជីពនៅក្លិប EZRA FC ក្នុងលីគកំពូលឡាវ។ រដូវកាលនេះ រូបគេបានបង្ហាញខ្លួនឲ្យក្រុមបានចំនួន ១២លើក ជួយក្រុមឈ្នះបាន ៥លើក និងរកគ្រាប់បាល់បាន ៩គ្រាប់។
Chony ត្រូវបានគ្រូបង្វឹកក្រុមជម្រើសជាតិកោះហៅចូលក្រុមឈុតធំពីខែធ្នូ ឆ្នាំ២០២១ កន្លងទៅ ដោយគិតត្រឹមពេលនេះបង្ហាញខ្លួនបាន១៣លើកផងដែរ។
សូមរំលឹកថា យោងតាមកំណែទម្រង់ថ្មីរបស់ ក្រុមហ៊ុន Cambodian Premier League ដើម្បីជំរុញការប្រកួតឲ្យកាន់តែទាក់ទាញ បានអនុញ្ញាតឲ្យក្លិបនីមួយៗ ប្រើប្រាស់កីឡាករបរទេសរហូតដល់ ៦នាក់ ដោយក្នុងចំណោម ៦នាក់ នោះដាច់ខាតត្រូវមាន១នាក់ជាកីឡាករក្នុងទ្វីបអាស៊ី និងម្នាក់ទៀតជាពលរដ្ឋក្នុងតំបន់អាស៊ាន។
ដោយឡែកគិតត្រឹមថ្ងៃនេះ សម្រាប់កីឡាករកូតាអាស៊ាន ដែលបានចូលរួមជាក្លិបលីគកំពូលកម្ពុជាមានចំនួន ៤នាក់ ដូចខាងក្រោម៖
១. ខ្សែបម្រើ Jhon Frith សញ្ជាតិ ទីម័រខាងកើត របស់ ISI Dangkor Senchey
២. ខ្សែប្រយុទ្ធ Zenivio សញ្ជាតិ ទីម័រខាងកើត របស់ Kirivong Sok Sen Chey
៣. ខ្សែបម្រើប្រយុទ្ធ Thiha Zaw សញ្ជាតិ មីយ៉ាន់ម៉ា របស់ ព្រៃវែង
៤. ខ្សែប្រយុទ្ធ Mouzinho សញ្ជាតិ ទីម័រខាងកើត របស់ វិសាខា
គួរបញ្ជាក់ថា សម្រាប់ការប្រកួតក្របខណ្ឌលីគកំពូលកម្ពុជា Cambodian Premier League រដូវកាលថ្មី នឹងចាប់ផ្ដើមការប្រកួតពីថ្ងៃទី០៥ ខែសីហា ឆ្នាំ២០២៣ រហូតដល់ថ្ងៃទី១២ ខែឧសភា ឆ្នាំ២០២៤ ដែលមានសមាជិកចំនួន១០ក្រុមចូលរួម មានភ្នំពេញក្រោន ,វិសាខា, ព្រះខ័នរាជស្វាយរៀង, បឹងកេត, ណាហ្គាវើលដ៏, កងយោធពលខេមរភូមិន្ទ, អង្គរថាយហ្គឺរ, គិរីវង់សុខសែនជ័យ និង ២ក្រុមទើប ឡើងមកពីលីគទី២ គឺក្រុម ISI ដង្កោសែនជ័យ និងក្រុមព្រៃវែងអេហ្វស៊ី៕
នេះជាកាលវិភាគប្រកួតក្របខណ្ឌលីគកំពូលកម្ពុជា សម្រាប់សប្ដាហ៍ទី១៖