សិល្បៈអន្តរជាតិ៖ កាលពេលយប់មិញនេះ រង្វង់សិល្បៈថៃមានការជ្រួលច្របល់ជាខ្លាំងដោយសារតែទទួលបានដំណឹងថាតារាសម្ដែងស្រីល្បីឈ្មោះកញ្ញា Ice Preechaya វ័យ៣៣ឆ្នាំ បានសន្លប់បាត់ស្មារតីក្នុងបន្ទប់គេងហើយម្ដាយរបស់កញ្ញាបាន Call ហៅរថយន្តសង្គ្រោះបន្ទាន់ដឹកទៅសង្គ្រោះនៅមន្ទីរពេទ្យកាលពីយប់ថ្ងៃទី៤ ខែកក្កដា ឆ្នាំ២០២៣ កន្លងទៅ។
យោងតាមសារព័ត៌មានថៃបានបញ្ជាក់ពីករណីនេះថាម្ដាយរបស់តារាស្រីរូបនេះគឺជាមនុស្សដំបូងដែលបានឃើញកូនស្រីសន្លប់និងខលហៅរថយន្តសង្គ្រោះ ហើយនៅពេលទៅដល់មន្ទីរពេទ្យក្រុមគ្រូពេទ្យបានបញ្ជូនកញ្ញាចូលសង្គ្រោះក្នុងបន្ទប់ ICU ដោយមានឧបករណ៍ជំនួយដង្ហើមរណែងរណោង។ ករណីនេះអ្នកតាមដានបានសន្មតថាអាចកើតឡើងមកពីកញ្ញាស្មុគស្មាញបណ្ដាលមកពីកញ្ញាកំពុងមានបញ្ហាជាមួយនឹងសង្សារ ព្រោះមុនកើតមានហេតុការណ៍នេះកើតឡើង សាមីខ្លួនបានផុសរូបភាពពណ៌ខ្មៅ ហើយបន្តមកទៀតកញ្ញាបានផុសរូបដៃកាន់ដបថ្នាំបូរាណភ្ជាប់ជាមួយនឹងសំណេររៀបរាប់ថា «ថ្នាំកែរោគគ្រាំ» និង «កែរោគគ្រាំក្នុងមែនទេ?»។ តាមដឹងតារាស្រីនេះកំពុងតែស្ថិតក្នុងអាការៈសោកសៅ ព្រោះតែជួបរឿងដ្រាម៉ា «ថ្នាំ Cyanide» ដែលកំពុងផ្ទុះការចាប់អារម្មណ៍នៅក្នុងសង្គមថៃនាពេលបច្ចុប្បន្ននេះ។
នៅព្រឹកថ្ងៃទី៥ ខែកក្កដានេះ តាមរយៈ IG របស់កញ្ញា បាន Update អាការៈរបស់ខ្លួនដោយបញ្ជាក់ថាកញ្ញាបានឆ្លងផុតគ្រោះថ្នាក់ហើយដោយថតរូបដៃព្រមទាំងអក្សរថា «Ice យើងនឹងតស៊ូជាមួយគ្នាណា Ice»៕
