កីឡាការិនី ឈិត សាភឿន សមាជិកក្រុមជម្រើសជាតិនារី អាយុក្រោម១៩ឆ្នាំ កម្ពុជា នឹងជាម្ចាស់គ្រាប់បាល់ទាំង ២គ្រាប់ ដែលជួយឲ្យកម្ពុជាឈ្នះឡាវ ក្នុងលទ្ធផល ២-១ កាលពីថ្ងៃទី០៥ កក្កដា ប្រកួតពានរង្វាន់បាល់ទាត់នារី AFF U19 Women’s Championship 2023។
កីឡាការិនី ឈិត សាភឿន មកពីក្លិបព្រះខ័នរាជស្វាយរៀង បានរងរបួសបាក់ឆ្អឹងស្លាបប្រជៀវស្មាខាងឆ្វេង ក្រោយស៊ុតបញ្ចូលទី២គ្រាប់ ជួយឲ្យក្រុមជម្រើសជាតិនារីអាយុក្រោម១៩ឆ្នាំទទួលជ័យជំនះលើក្រុមជម្រើសជាតិនារីឡាវកាលពីម្សិលមិញ ក្រោយពីបានវះកាត់ទទួលបានជោគជ័យ ពេលនេះរូបនាងកំពុងសម្រាកព្យាបាលរបួស។
ជ័យជម្នះរបស់ក្រុមជម្រើសជាតិនារីអាយុក្រោម១៩ឆ្នាំ កម្ពុជា ឈ្នះ ក្រុមជម្រើសជាតិនារីអាយុក្រោម ១៩ឆ្នាំ ឡាវ ក្នុងលទ្ធផល ២-១ រកបានដោយកីឡាការិនី ឈិត សាភឿន បន្ទាប់ពីឡាវបានបើកការនាំមុខមុន នៅនាទី៣’ ខណៈកម្ពុជា វាយបកសងមកវិញបាននៅនាទី២១’ រហូតដល់វគ្គទី២ បន្ថែមគ្រាប់ជ័យជម្នះបានសម្រេចនៅនាទី៦២’ មុនពេលបញ្ចប់ការប្រកួត។
ភារកិច្ចបន្ទាប់របស់ក្រុមជម្រើសជាតិនារីអាយុក្រោម១៩ឆ្នាំ កម្ពុជា ជម្រុះក្នុងពូល៖
- ថ្ងៃទី០៧ កក្កដា៖ កម្ពុជា ប៉ះ ទីម័រ ឡេស្តេ នៅកីឡដ្ឋាន Gelora Sriwijaya ទីក្រុម Palembang
- ថ្ងៃទី០៩ កក្កដា៖ កម្ពុជា ប៉ះ ឥណ្ឌូនេស៊ី នៅកីឡដ្ឋាន Gelora Sriwijaya ទីក្រុម Palembang
គួរបញ្ជាកក់ថា ក្រុមជម្រើសជាតិនារីអាយុក្រោម១៩ឆ្នាំ កម្ពុជា ស្ថិតនៅក្នុងពូល A មានដូចជា៖ ម្ចាស់ផ្ទះ ឥណ្ឌូនេស៊ី, ឡាវ និងទីម័រ ខាងកើត ក្នុងការប្រកួតពានរង្វាន់បាល់ទាត់នារី AFF U19 Women’s Championship 2023 ដែលប្រទេសឥណ្ឌូនេស៊ី ទទួលរៀបចំធ្វើជាម្ចាស់ផ្ទះ ចាប់ផ្តើមប្រកួតពីថ្ងៃទី០៥ ដល់ ថ្ងៃទី១៥ ខែកក្កដា ឆ្នាំ២០២៣៕