សិល្បៈអន្តរជាតិ៖ កាលពីថ្ងៃសៅរ៍សប្ដាហ៍មុន តារាចម្រៀង Harry Styles ខ្ទប់មុខទាំងឈឺចាប់ក្រោយកំពុងច្រៀងនិងសម្ដែងសុខស្រាប់តែមានរបស់ហោះមកចំកណ្ដាលមុខ។ តារាចម្រៀងរូបនេះបានក្លាយជាជនរងគ្រោះចុងក្រោយក្នុងចំណោមតារាដែលរងគ្រោះត្រូវជនអនាមិកគប់លើឆាក។
ថ្មីៗនេះតារាចម្រៀងម្ចាស់បទ «As It Was» ស្រាប់តែត្រូវរបស់ម្យ៉ាងគប់មកត្រូវកណ្ដាលមុខដោយជនអនាមិកស្ថិតក្នុងចំណោមអ្នកមកទស្សនាការសម្ដែងខនសឺតរបស់លោក នៅទីក្រុង Vienna ប្រទេសអូទ្រីស ដោយពេលនោះលោកយកដៃខ្ទប់មុខព្រមទាំងបង្ហាញអាការៈឈឺចាប់មុននឹងដើរចុះពីឆាក។
ហេតុការណ៍ដែលកើតឡើងចំពោះ Styles គឺជាសកម្មភាពមួយកំពុងពេញនិយមនិងរីករាលដាលនៅតំបន់អ៊ឺរ៉ុប ដោយតារាជាច្រើនកំពុងក្លាយជាជនរងគ្រោះក្លាយជាផ្ទាំងស៊ីបត្រូវគេគប់ខណៈកំពុងច្រៀងនិងសម្ដែងនៅលើឆាក។ ក្រៅពី Harry Styles តារាមួយចំនួនទៀតដែលជួបរឿងអកុសលមិនខុសគ្នានេះរួមមាន Drake, Bebe Rexha និង Kelsea Ballerini ជាដើម។
រូបភាពដែលតារាចម្រៀងរូបនេះត្រូវរបស់ម្យ៉ាងមិនដឹងថាជាអ្វីគប់ចូលមុខត្រូវបានចែករំលែកជាចេញពីកាមេរ៉ាជាច្រើនដែលហ្វេនទៅទស្សនាការប្រគំតន្ត្រីថតបាន ខណៈដែលតារាចម្រៀងរូបនេះត្រូវចំមុខលោកបានបើកមាត់យ៉ាងធំដោយក្ដីឈឺចាប់ ព្រមទាំងឈប់ដើរប្រមាណ៣វិនាទីមុខនឹងដើរចុះពីលើឆាកដោយយកដៃខ្ទប់មុខទាំងឈឺចាប់។
ក្នុងចំណោមរូបភាពទាំងអស់ រូបភាពដែលចែករំលែកដោយគណនីឈ្មោះ Harryloustan1 បានបង្ហាញយ៉ាងច្បាស់ជាងគេគឺនៅពេលដែល Styles ត្រូវរបស់ម្យ៉ាងគប់ចំកណ្ដាលមុខ៕