សិល្បៈជាតិ៖ ហេតុការណ៍រន្ធត់ចិត្តមួយបានកើតឡើងនៅក្នុងការប្រកួត Miss Grand Cambodia 2023 ខណៈដែលបេក្ខនារីដែលមកពីខេត្តកណ្ដាល គឺបវរកញ្ញា អូ ដាវី នាងត្រូវជិះរទេះរុញជំនួសការដើរបង្ហាញម៉ូដទៅវិញ ជាហេតុធ្វើឱ្យអ្នកគាំទ្រស្លុតចិត្តនិងព្រួយបារម្ភពីនាង។
ហេតុការណ៍នេះបានភ្ញាក់ផ្អើលនៅថ្ងៃទី១១ ខែកក្កដា ឆ្នាំ២០២៣ កន្លងនេះ នៅពេលដែលបេក្ខភាព Miss Grand Cambodia 2023 តំណាងខេត្ត ក្រុង រាជធានី ទាំង ២៥ រូប បានបង្ហាញវត្តមានដើរបង្ហាញខ្លួនក្នុងកម្មវិធី ជំនួបសំណេះសំណាល MEET&GREET នាបរិវេណTHE HERITAGE WALK។ អ្វីដែលធ្វើឱ្យមហាជនចាប់អារម្មណ៍ខ្លាំងជាងគេនោះគឺ បេក្ខនារីដែលមកពីខេត្ត កណ្ដាល បង្ហាញខ្លួននៅលើរទេះរុញ នោះក៏ដោយសារតែនាងរងរបួសជើងខាងឆ្វេងធ្ងន់ ក្រោយត្រូវសត្វសុនកខាំ ៣ ចង្កូម។ ប៉ុន្តែបើទោះបីមានរបួសជើងក៏ដោយ ក៏បេក្ខនារីរូបនេះនៅតែប្រឹងប្រែងបង្ហាញខ្លួន និងតាំងចិត្តយ៉ាងមុតមាំក្នុងការជម្នះឧបសគ្គមួយនេះ។
បន្ទាប់ពីហេតុការណ៍នេះកញ្ញា អូ ដាវី បានរៀបរាប់ពីការតាំងចិត្តរបស់នាងនៅលើបណ្ដាញសង្គមហ្វេសប៊ុកថា ៖«ជាដំបូងនាងខ្ញុំ អូ ដាវី តំណាងឱ្យខេត្តកណ្តាល សូមអរគុណទៅកាន់សំណាក់ពុកម៉ែបងប្អូនទាំងអស់ មិនថាក្នុងឬក្រៅដែលបានបារម្ភ និង សួរសុខទុក្ខពីខ្ញុំ ពិសេសអគ្គនាយិកា អគ្គនាយក និង ក្រុមការងារគ្រប់ជាន់ថ្នាក់ដែលបានបារម្ភយកចិត្តទុក្ខដាក់យ៉ាងកក់ក្តៅ ទោះបីជាស្ថិតក្នុងឧបទ្ទវហេតុយ៉ាងណាក៏នាងខ្ញុំនៅតែខិតខំប្រឹងប្រែងតស៊ូជានិច្ច»។
នៅពេលបានឃើញការតាំងចិត្តរបស់បេក្ខនារីតំណាងឱ្យខេត្តកណ្ដាល លោកស្រី អ៊ឹម សុគន្ធា ជាថ្នាក់ដឹកនាំរបស់ស្ថាប័ន Miss Grand Cambodia បានលើកឡើងថា ៖ «សុំសរសើរដោយចិត្តស្មោះចំពោះបេក្ខនារី Miss Grand Cambodia តំណាងខេត្ត កណ្តាល ចំពោះការតស៊ូ រឹងមាំ អត់ធ្មត់ ទោះឈឺខ្លាំងយ៉ាងណាក៏បេក្ខនារីម្នាក់នេះមិនធ្វើឱ្យកម្មវិធីខូចខាត នឹងមិនអោយបាត់បង់ឱកាសខ្លួនឯងឡើងខំរហូតដល់ចប់កម្មវិធី ជូនពរប្អូនឆាប់ជាសះស្បើយ នេះហើយជាការបង្ហាញនៃភាពរឹងមាំរបស់បេក្ខនារីទាំង25រូបពួកគាត់មិនមែនត្រឹមតែមានសម្រស់ស្រស់ស្អាតទេ ភាពឆ្លាតវៃ ការតស៊ូ ភាពរឹងមាំ គឺជាអ្វីដែលបវរកញ្ញាត្រូវតែមាន»។
សូមជម្រាបថា បេក្ខនារី អូ ដាវី គឺជាបេក្ខភាពបវរកញ្ញាម្នាក់ដែលមានភាពលេចធ្លោគួរឱ្យកត់សម្គាល់នៅក្នុងការចូលរួមប្រកួតបវរកញ្ញា Miss Grand Cambodia 2023 នេះ ។ ហើយកញ្ញាក៏ជាបេក្ខភាពម្នាក់ដែលគ្រប់គ្នាមិនអាចមើលរំលងបាននោះទេ ទាំងសមត្ថភាព រូបសម្រស់ ការតាំងចិត្ដ នឹង ការត្រៀមខ្លួនរបស់កញ្ញាដើម្បីមកប្រជែងដណ្ដើមមកុដក្នុងឆ្នាំនេះ ។ ដោយឡែកមហាជនបានជូនពរឱ្យកញ្ញាឆាប់ជាសះស្បើយឡើងវិញ និងចង់ឃើញកញ្ញាប្រកួតយ៉ាងស្វិតស្វាញនៅខែសីហាខាងមុខ ដែលជាការបើកវគ្គប្រកួតបឋម៕