សហព័ន្ធបាល់ទាត់នៃប្រទេសអ៊ីតាលី ក្នុងទ្វីបអឺរ៉ុបបានពិន័យជាប្រាក់ និងហាមឃាត់មិនឱ្យពាក់ព័ន្ធនឹងបាល់ទាត់ជាច្រើនខែ ចំពោះលោក Andrea Agnelli ដែលជាអតីតប្រធានក្លិបបាល់ទាត់ Juventus ក្រោយរកឃើញថា ប្រធានក្លិបរូបនេះ ប្រព្រឹត្តអំពើពុករលួយ អំឡុងខ្លួនកាន់អំណាច។
បើតាមសារព័ត៌មានរបស់អ៊ីតាលីបញ្ជាក់ថា អតីតប្រធានក្លិប Juventus លោក Andrea Agnelli ត្រូវបានហាមឃាត់មិនឱ្យពាក់ព័ន្ធជាមួយបាល់ទាត់របស់ប្រទេសអ៊ីតាលី រយៈពេល ១៦ខែ និងពិន័យជាប្រាក់ ៦៦,០០០ ដុល្លារអាមេរិក ពីលើថែមទៀតផង។
លោក Agnelli បច្ចុប្បន្នមានវ័យ ៤៧ឆ្នាំ បានចូលដឹកនាំគឺជាប្រធានក្លឹប Juventus អស់រយៈពេលជាងមួយទសវត្សរ៍មកហើយ។ ប៉ុន្តែកាលពីពីខែវិច្ចិការ ឆ្នាំ២០២២ កន្លងទៅ ក្រុមការងារមួយចំនួន នៅក្នុងក្លិបបានលារឈប់ពីការងារជុំវិញការចោទប្រកាន់លើព័ត៌មាន គណនេយ្យក្លែងក្លាយរបស់ក្លិប។
មុនពេលការក្តីសម្រេចពិន័យលើបុរស វ័យ៤៧រូបនេះ ការិយាល័យព្រះរាជអាជ្ញាទីក្រុង Turin បានចាប់ផ្តើម ធ្វើការស៊ើបអង្កេត កាលពីដើមឆ្នាំ២០២៣ កន្លងទៅ ជុំវិញក្លិបដែលរឿងរ៉ាវជុំវិញ លើរបាយការណ៍ហិរញ្ញវត្ថុរបស់ក្លិប Juventus ក្នុងយុគ្គសម័យរបស់លោក Agnelli ដោយសហព័ន្ធរបស់ប្រទេសអ៊ីតាលី បានចោទប្រកាន់ពីបទគណនេយ្យប្រាក់ក្លែងក្លាយ និងរបាយកាណ៍ទីផ្សារ ថែមទៀតផង។
ក្រោយការស៊ើបអង្កេត រដ្ឋអាជ្ញាបានអះអាងថា ភាគីក្លិបបាល់ទាត់ Juventus បានប្រើប្រាស់ប្រាក់ចំណេញដើមទុនជាច្រើន ដើម្បីបិទបាំងចន្លោះប្រហោងក្នុងរបាយការណ៍ហិរញ្ញវត្ថុកាលពីឆ្នាំ២០១៩ ដល់ឆ្នាំ២០២១។
សូមបញ្ជាក់ថា កាលពីខែមករា កន្លងទៅ ក្លិបបាល់ទាត់ Juventus ត្រូវបានកាត់ ១៥ពិន្ទុក្នុងតារាងចំណាត់ថ្នាក់ ពានរង្វាន់ Serie A របស់អ៊ីតាលី ជុំវិញរឿងពុករលួយនេះថែមទៀតផង។
លោក Agnelli បានចាប់ផ្តើមចូលមកគ្រប់គ្រង ក្នុងនាមជាប្រធានក្លិបកាលពីឆ្នាំ២០១០ ហើយក្លិបបាល់ទាត់ Juventus ក៏ធ្លាប់បានឈ្នះជើងឯកអ៊ីតាលី Serie A ចំនួនប្រាំបួនជាប់ៗគ្នារហូតដល់រដូវកាល ២០១៩ ២០២០។ លោកក៏ជាបុគ្គលម្នាក់សំខាន់ដែលមានផែនការរៀបចំការប្រកួតពានរង្វាន់ European Super League មិនបានសម្រេចកាលពីប៉ុន្មានឆ្នាំមុនផងដែរ៕
