ក្រោយសូលទីឡូអង្គរ រំសាយ ប្រធានក្លិបអង្គរថាយហ្គឺរ ប្រកាសស្វាគមន៍អ្នកគាំទ្រ មកកាន់ក្លិបខ្លួន

កាលពីថ្ងៃទី១២ ខែកក្តដា ឆ្នាំ២០២៣ កន្លងទៅ ប្រធានក្លិបបាល់ទាត់នៅខេត្តសៀមរាប គឺលោក Akihiro Kato បានបង្ហោះសារថា «ប្រសិនបើអ្នកគាំទ្រសូលទីឡូអង្គរ ទាំងអស់មកទស្សនាការប្រកួតរបស់ អង្គរថាយហ្គឺរ សូមស្វាគមន៍យ៉ាងកក់ក្តៅ។ ខ្ញុំចង់ទទួលយកអ្នកដែលធ្លាប់ ជាអ្នកគាំទ្រសូលទីឡូអង្គរ»។

សូមបញ្ជាក់ថា ក្លិបបាល់ទាត់សូលទីឡូអង្គរ ដែលមានមូលដ្ឋាននៅខេត្តសៀមរាប និងជាក្រុមស្ថិតនៅលីគលំដាប់ទី២ បានប្រកាសរំសាយក្លិបកាលពីពេលកន្លងទៅ ក្រោមមូលហេតុក្លិបអស់លទ្ធភាព ក្នុងការទ្រទ្រង់កីឡាករ និងការចំណាយផ្សេងៗដោយពុំមានដៃគូជួយសហការឧបត្ថម្ត បន្តទៀត។

គួរឱ្យដឹងពានរង្វាន់លិគកំពូលកម្ពុជា Cambodian Premier League រដូវកាលឆ្នាំ២០២៣-២០២៤ នឹងចាប់ផ្តើមជាផ្លូវការនៅថ្ងៃទី៥ ខែសីហា ឆ្នាំ២០២៣ ដោយមាន១០ក្រុមចូលរួមប្រកួត មានដូចជា វិសាខា គិរីវង់សុខសែនជ័យ ព្រៃវែង ណាហ្គាវើលដ៍ កងយោធពលខេមរភូមិន្ទ ព្រះខ័នរាជស្វាយរៀង ភ្នំពេញក្រោន បឹងកេត
អាយអេសអាយ ដង្កោសែនជ័យ និងអង្គរថាយហ្គឺរ។

កម្មវិធីនៃការប្រកួតសប្តាហ៍ទី១
– វិសាខា ប៉ះ គិរីវង់សុខសែនជ័យ
– ព្រៃវែង ប៉ះ ណាហ្គាវើលដ៍
– កងយោធពលខេមរភូមិន្ទ ប៉ះ ព្រះខ័នរាជស្វាយរៀង
– ភ្នំពេញក្រោន ប៉ះ បឹងកេត
– អាយអេសអាយ ដង្កោសែនជ័យ ប៉ះ អង្គរថាយហ្គឺរ ៕