សិល្បៈជាតិ៖ កំពូលតារាចម្រៀង Rap ជួរមុខរបស់កម្ពុជា ម៉ាន់ វណ្ណដា នឹងត្រូវឡើងច្រៀងនិងសម្ដែងជាលើកដំបូងនៅប្រទេសជប៉ុននាថ្ងៃអាទិត្យ ទី១៦ ខែកក្កដា ខាងមុខនេះ។ នៅក្នុងការសម្ដែងនេះវណ្ណដានឹងចូលរួមច្រៀងនិងសម្ដែងរួមជាមួយកំពូលតារាចម្រៀងរ៉េប Awich ផងដែរ។
វណ្ណដា ធ្លាប់បានចែករំលែកដំណឹងមួយនេះជាមួយនឹងអ្នកគាំទ្រខ្លួនរួចហើយកាលពីថ្ងៃទី១២ ខែមិថុនា ឆ្នាំ២០២៣កន្លងទៅ ដោយលោកបានរៀបរាប់ថា៖«នេះគឺជាលើកដំបូងដែលខ្ញុំបានចេញទៅសម្ដែងនៅប្រទេសជប៉ុន និងបានជួបជាមួយនឹងអ្នកគាំទ្ររបស់ខ្ញុំនៅទីនោះ និងអ្នកគាំទ្រកម្ពុជារបស់ខ្ញុំដែលតែងតែចង់ឃើញខ្ញុំចេញទៅសម្ដែងនៅបរទេស»។ ទីតាំងដែលម្ចាស់បទ «Times To Rise» រូបនឹងឡើងច្រៀងនិងសម្ដែងនោះគឺនៅនៅក្នុងក្លិបកម្សាន្តមួយឈ្មោះ RAISE នាទីក្រុងតូក្យូ។
ដំណឹងដ៏រីករាយនេះក៏ត្រូវបានកញ្ញា ឡរ៉ា ម៉ម (Laura Mam) ដែលជា Big Boss ផលិតកម្ម Baramey បង្ហោះចែករំលែកនៅលើបណ្ដាញសង្គមហ្វេសប៊ុករបស់ខ្លួនកាលពីយប់ថ្ងៃទី១២ ខែកក្កដាម្សិលមិញ ដោយភ្ជាប់ជាមួយនឹងរូបភាព Poster LED របស់ វណ្ណដា និង Awich ដែលកំពុងប្រូម៉ូតផ្សព្វផ្សាយនៅជប៉ុននាខណៈនេះ ដោយភ្ជាប់ជាមួយនឹងពាក្យថា «Japan, Baby»
ការចេញទៅសម្ដែងនៅប្រទេសជប៉ុននេះគឺជាការសម្ដែងលក្ខណៈអន្តរជាតិចុងក្រោយរបស់វណ្ណដា ក្រោយពេលដែលតារាចម្រៀង Hip Hop រូបនេះបានច្រៀងនិងសម្ដែងនៅប្រទេសថៃកាលពីដើមឆ្នាំ២០២៣នេះ នៅប្រទេសថៃ ក្នុងកម្មវិធី Rolling Loud Thailand។