សិល្បៈជាតិ៖ កម្មវិធី Fan Meeting របស់តារាចម្រៀងរ៉េប ងួន ចាន់ដេវីត (G-Devith)លើកនេះមានឈ្មោះថា Fan Meet & Greet by Sting ដែលធ្វើឡើងនៅថ្ងៃទី១៥ ខែកក្កដា ក្នុងបរិវេណរោងភាពយន្ត Prime Cineplex Samai Square ទួលគោក និងផ្តល់ជូនជាពិសេសចំពោះកំពូលហ្វេនចំនួនត្រឹមតែ២០០នាក់ប៉ុណ្ណោះ។
ពិតជាអស្ចារ្យណាស់ អ្នកគាំទ្រភាគច្រើនបានទិញសំបុត្រមកចូលរួមកម្មវិធីនេះសុទ្ធតែយុវវ័យទាំងអស់ដែលពួកគេស្រឡាញ់តន្ត្រីជាស្នាដៃរបស់លោក G-Devith ម្នាក់ៗសុទ្ធតែបង្ហាញពីការពេញចិត្តពេញថ្លើម ហើយសុខចិត្តរង់ចាំជួប Idol របស់ពួកគេតាំងពីម៉ោង ៣ រសៀលមកម្ល៉េះ។ មែនទែនទៅ កម្មវិធី Fan Meeting របស់លោក G-Devith នេះមិនមែនជាលើកទីមួយនេះទេ កម្មវិធីបែបនេះគឺលោកបានធ្វើឡើងម្ដងជាពីរដងរួចមកហើយ ។
ក្រៅពីបានជួបរាក់ទាក់ដោយផ្ទាល់ជាមួយលោក G-Devith ហ្វេនអ្នកគាំទ្រទាំងអស់ក៏ទទួលបានហត្ថលេខានៅលើវត្ថុអនុស្សាវរីយ៍ ថតរូបសែលហ្វីផ្ទាល់ៗ សំនួរចាក់ដោតដោយផ្ទាល់ និងជាពិសេសបានស្ដាប់បទចម្រៀងថ្មីដែលត្រៀមទម្លាក់ជាផ្លូវការបានមុនគេថែមទៀតផង។
នាឱកាសដ៏សប្បាយរីករាយមួយនេះ លោក G-Devith បានប្រកាសខ្លួនថា ឆ្នាំនេះលោកកាន់តែហឹរខ្លាំងជាងមុន ដោយបានបើកទម្លាយពីអាថ៌កំបាំងបទពិសោធន៍ជីវិតទាំងអស់ឱ្យអ្នកគាំទ្របានសួរដេញដោល ហើយសំនួរទាំងអស់នេះ ច្បាស់ណាស់ពួកគេចង់ដឹងបន្ថែមអំពីឯកជនភាពរបស់លោកក្នុងការតស៊ូប្រឡូកសិល្បៈចម្រៀងរ៉េបកន្លងមក។
មានសំណួរជាច្រើនដែលហ្វេនបានសួរទៅកាន់លោក G-Devith ប៉ុន្តែថ្ងៃនេះត្រយងសូមលើកយកសំនួរតែ ៦ ប៉ុណ្ណោះធានាថាខ្លឹមៗ ហើយមានអ្នកគាំទ្រមួយចំនួនមិនធ្លាប់ដឹងអំពីលោក G-Devith ដូចខាងក្រោមនេះ៖
១- តើលោក G-Devith ដើរនៅលើផ្លូវសិល្បៈដ៏ជូរចត់នេះបានដោយរបៀបណាបានជារឹងមាំម្ល៉េះ?
G-Devith ឆ្លើយថា ៖ ជាទូទៅគេមើលងាយ G-Devith ជាដុំថ្ម ប៉ុន្តែមិនដឹងថា ថ្ម Diway ជាគ្រាប់ពេជ្រនោះទេ ។ លោកថា លោកគឺជាមនុស្សម្នាក់ដែលចង់រំលងនូវពាក្យដែលគេនិយាយវាយប្រហារមកលើលោក។ លោកថា បើពិតដូចអ្វីដែលគេតិះដៀលលោកនេះ អ្នកគាំទ្រទាំងអស់គ្នានឹងបានឃើញG-Devitដូចសម្ដីគេថាមែនហើយ។ ប៉ុន្តែសព្វថ្ងៃដូចអ្នកគាំទ្របានឃើញហើយថា G-Devith នៅតែជា G-Devith ហើយ G-Devith គឺមានតែខ្លាំងជាងមុនថែមទៀត។
២-តើមានមូលហេតុអ្វីបណ្ដាលចិត្តឱ្យលោក G-Devith ចូលចិត្តផ្ដល់ឱកាសឱ្យតារាជំនាន់ក្រោយចូលរួមការប្រគំតន្ត្រីលើឆាកតែមួយជាមួយលោក?
G-Devith ឆ្លើយថា៖ សម្រាប់លោក ពីមុនឡើយលោកចង់មានឱកាសបែបនេះណាស់។ លោករំលឹកដល់ការតាមក្ដីស្រមៃដំបូងៗ លោកមានក្រុមរាំមួយឈ្មោះ Silent Heart ហើយត្រូវបានម្ចាស់កម្មវិធីអនុញ្ញាតឱ្យបង្ហាញសមត្ថភាពរាំត្រឹមរយៈពេល ៥ នាទី ក៏ប៉ុន្តែដល់ម៉ោងដែលត្រូវសម្ដែងហើយ បែរជាម្ចាស់កម្មវិធីបដិសេធលែងឱ្យលោកនិងគ្នីគ្នាក្នុងក្រុមឡើងរាំទៅវិញ ។ រួចមកមានសមាជិកក្រុមម្នាក់ស្រក់ទឹកភ្នែក ទើបលោកដាច់ចិត្តទៅសួរដេញដោលម្ចាស់កម្មវិធី ប៉ុន្តែម្ចាស់កម្មវិធីបោះសម្ដីថា បើចង់រាំ ភ្លេងដែលគេកំពុងហ្នឹង ពួកឯងរាំទៅ បានន័យរាំភ្លេងដែលគេកំពុងតែចាក់ចោល។ ការឈឺចាប់មួយនេះ បានធ្វើឱ្យលោកចងចាំមិនភ្លេច ហើយកត់ទុកក្នុងជីវិតថា បើមានឱកាសណាមួយនោះ លោកនឹងផ្ដល់ឱកាសដល់អ្នកជំនាន់ក្រោយគ្រប់គ្នា ដែលចង់តាមចាប់ក្ដីស្រមៃខ្លួនឱ្យក្លាយជាការពិត។ ជាក់ស្ដែងលោកធ្លាប់ផ្ដល់ឱកាសឱ្យក្រុមចម្រៀងរបស់ Ditway Nation និងតារាចម្រៀងពន្លកក្រោយជាច្រើនផ្សេងទៀតរួចមកហើយ។
៣-នៅពេលប៉ះទង្គិចជាមួយតារារ៉េបខ្លាំងៗ តើលោក G-Devith ធ្វើដូចម្ដេចដើម្បីរក្សាបានប្រជាប្រិយភាព និងហ្វេនអ្នកគាំទ្របានច្រើនរហូតដូចសព្វថ្ងៃនេះ?
G-Devith ឆ្លើយថា ៖ សម្រាប់លោក គឺលោកមិនមែនផ្ដោតតែលើការប្រកួតប្រជែងនោះទេ ហើយលោកមិនដែលចាត់ទុកអ្នកដទៃជាគូសត្រូវនោះឡើយ។ ប្រសិនបើលោកឱ្យនាមអ្នកប្រជែងជាគូសត្រូវមួយរយភាគរយ នោះពេលមានឱកាសលោកនឹងស.ម្លាប់.គេចោលមិនខាន។ ប៉ុន្តែក្នុងចិត្តគំនិតរបស់លោកពាក្យថា សត្រូវ គឺមានតែតិចណាស់ត្រឹមតែ ២០ភាគរយទេ ក្រៅពីនោះលោកចាត់ទុកគូប្រជែងគឺជាមិត្ត ព្រោះថា មិត្តបើមើលមុខគ្នាមិនចំ អាចឈប់និយាយរកគ្នាបាន ហើយទុកផ្លូវរស់ឱ្យគ្នាទៅវិញទៅមក ដើរផ្លូវរៀងខ្លួនបាន។ លោកបានប្រកាន់ភ្ជាប់នូវទសពិធរាជធម៌ ហើយជឿលើរឿងបុណ្យបាប អ្នកណាសាងអ្វីគឺទទួលផលនោះ។
៤-ហេតុអ្វីលោក G-Devith ចូលចិត្តបង្កើតឱ្យមានកម្មវិធីសប្បាយជាមួយអ្នកគាំទ្រម៉្លេះ ខណៈមានការរិះគន់ថា Fan Meeting ដដែលៗអាចនឹងសាបប្រជាប្រិយភាព?
G-Devith ឆ្លើយថា ៖ ទស្សនៈរបស់លោកគឺមិនមែនជាតារាចម្រៀងដែលរកលុយមកទុកនោះទេ គឺលោកចូលចិត្តចាយលុយដើម្បីភាពសប្បាយរីករាយ។ មួយទៀតគឺផ្អែកទៅលើអ្នកទ្រទ្រង់កម្មវិធី តើពួកគេមានទស្សនៈរួម និងគោលដៅដូចគ្នាឬទេ? លោកថា ក្រុមហ៊ុន Sting និងលោកមានច្ឆន្ទៈរួមគ្នាមួយ គឺធ្វើកម្មវិធីឱ្យអ្នកគាំទ្របានសប្បាយរីករាយ ហើយរហូតមកទល់ពេលនេះគឺមិនតិចកម្មវិធីទេ ដែលលោកបានរៀបចំសម្រាប់អ្នកគាំទ្រ។
៥- តើ G-Devith ជាមនុស្សបែបណា ហេតុអ្វីចូលចិត្តតែទាមទារការងារនៅម៉ោង ៣ ភ្លឺ?
G-Devith ឆ្លើយថា ៖ ការធ្វើការងាររបស់លោកភាគច្រើននឹកឃើញភ្លាម គឺទាមទារភ្លាមៗមិនទុកយូរ ហើយភាគច្រើនប៉ះតែម៉ោង ៣ ភ្លឺតែម្ដង នោះក៏ដោយសារជាម៉ោងដែលខួរក្បាលមានសភាពស្រឡះល្អ។ មួយវិញទៀត នៅពេលដែលលោក និពន្ធបទភ្លេង ឬនឹកឃើញទំនុកច្រៀងផ្សេងៗ ភាគច្រើនចាប់ពីម៉ោង ៣ ភ្លឺទៅតែម្ដង ដូច្នោះហើយលោកត្រូវតែក្រោកពីដំណេកមកភ្លាមៗ ដើម្បីបន្តធ្វើការងារទាំងពាក់កណ្ដាលភ្លឺបែបនេះ។
៦- មូលហេតុអ្វីលោកចាប់អារម្មណ៍រៀនបាលីសំស្ក្រឹត ជាដំណឹងជាការពិតមែនទេ?
G-Devith ឆ្លើយថា ៖ ការសិក្សាមុខវិជ្ជាមួយនេះគឺជាចំណូលចិត្តរបស់លោក ប៉ុន្តែកន្លងមកលោកគ្មានឱកាសបានសិក្សា។ លោកមានគោលបំណងចង់សាបព្រោះពីអរិយធម៌ វប្បធម៌ ភាសា ដែលខ្មែរមានពីបុរាណទៅដល់អ្នកគាំទ្របានដឹង និងសិក្សាស្រាវជ្រាវបន្ថែម។ ជាក់ស្ដែងដូចជាបទ «មហានគរ» គឺលោកបានដាស់ស្មារតីកូនខ្មែរថា ខ្មែរមានអ្វីដែលអស្ចារ្យច្រើនណាស់ ដែលកូនខ្មែរគួរតែមានមោទនភាព ចង់ដឹងចង់លឺ និងចង់ឈ្វេងយល់អ្វីដែលជារបស់ខ្លួន។ លោកថា លោកចូលចិត្តអានសៀវភៅច្រើនជាង យកពេលវេលាមកឈ្លោះគ្នា។
យ៉ាងណាមិញ ក្រោយបញ្ចប់វគ្គសំណួរចម្លើយជាច្រើនមក អ្នកគាំទ្រកាន់យល់ច្បាស់អំពីទស្សនវិស័យផ្សេងៗរបស់លោក G-Devith ជាមួយនឹងគំនិតថ្មីៗ ដែលពួកគេអាចដកស្រង់រៀនសូត្របានពីបទពិសោធន៍ជីវិតរបស់ G-Devith ។ G-Devith បានសន្យាជាមួយនឹងអ្នកគាំទ្ររបស់ខ្លួនយ៉ាងមុតមាំថា លោកនឹងបន្តផលិតបទថ្មីៗហើយប្លែក ពិសេសគាស់កកាយជាមួយនឹងអ្វីដែលជាកេរ្តិ៍មរតកដំណែលតពីដូនតា មកសិក្សាឈ្វេងយល់បន្ថែមឱ្យបានច្បាស់លាស់ និង យកមកចងក្រងជាចម្រៀងថ្មីៗបន្ថែមទៀតជាកាដូជូនដល់ហ្វេនៗរបស់លោកមិនឱ្យខកបំណងនោះឡើយ។
សូមជម្រាបផងដែរថា កម្មវិធី Fan Meet & Greet by Sting នេះ គឺជាប្រវត្តិសាស្ត្រថ្មីមួយទៀតរបស់តារាចម្រៀងរ៉េប G-Devith ខណៈការលក់សំបុត្រត្រឹមរយៈពេល១ម៉ោងដំបូងប៉ុណ្ណោះ ចំនួនសំបុត្រទាំងអស់បានលក់ដាច់អស់ភ្លាមៗទាំងពាក់កណ្តាលយប់តែម្តង រហូតដល់បណ្តាអ្នកគាំទ្រខ្លះទៀតបានស្នើរសុំឱ្យលោកលក់សំបុត្របន្ថែមទៀត។ ហ្វេនៗប្រមាណជាង 200នាក់ សប្បាយចិត្តជាខ្លាំង ពួកគេស្រែកហ៊ោកញ្ជ្រៀវដែលទទួលបានអារម្មណ៍រំភើបនៅពេលទទួលកាដូពិសេសពីលោក G-Devith ។ តើលើកក្រោយចង់ឱ្យមានកម្មវិធី Fan Meeting របស់ G-Devith បន្តទៀតទេ សូម Comment មតិអ្នកខាងក្រោមនេះ៕