ស្អែកនេះកម្ពុជាទទួលឥទ្ធិពលព្យុះទី៤ «តាលីម» បង្កឱ្យមានភ្លៀង ធ្លាក់ និងខ្យល់កន្ត្រាក់ស្ទើរគ្រប់តំបន់

ភ្នំពេញ៖ កម្ពុជានឹងទទួលឥទ្ធិពលពីជ្រលងព្យុះទី៤ ឈ្មោះ តាលីម (TALIM) និងខ្យល់មូសុងនិរតីក្នុងកម្រិតពីមធ្យមទៅបង្គួរ ចាប់ពីថ្ងៃទី១៩ រហូតដល់ថ្ងៃទី២៥ ខែកក្កដា ឆ្នាំ២០២៣។​ នេះបើតាមក្រសួងធនធានទឹក និងឧតុនិយម ជូនដំណឹងនាថ្ងៃទី១៨​ ខែកក្តដា ឆ្នាំ២០២៣នេះ។

ដោយឡែកក្នុងមហាសមុទ្រប៉ាស៊ីហ្វិក ភាគខាងកើតប្រទេសហ្វីលីពីន សម្ពាធទាបសកម្មមួយ នឹងអាចវិវត្តខ្លួនទៅជាព្យុះថ្មីមួយទៀត ពេលចូលដល់ភាគខាងជើងប្រទេសហ្វីលីពីន។ ស្ថានភាពបែបនេះ នឹងធ្វើឱ្យតំបន់ទំនាបកណ្តាល និងតំបន់ខ្ពង់រាបនៃកម្ពុជា អាចមានភ្លៀងធ្លាក់ក្នុងកម្រិតពីតិចទៅមធ្យម និងបង្គួរលាយឡំដោយផ្គរ រន្ទះ និងខ្យល់កន្ត្រាក់។

សម្រាប់តំបន់មាត់សមុទ្រវិញ អាចមានភ្លៀងធ្លាក់ក្នុងកម្រិតពីបង្គួរទៅច្រើន លាយឡំដោយផ្គរ រន្ទះ និងខ្យល់កន្ត្រាក់ នៅលើផ្ទៃសមុទ នឹងមានខ្យល់បក់បោកខ្លាំង ព្រមទាំងរលកសមុទ្រមានកម្ពស់ខ្ពស់៕

អត្ថបទ៖ សង្គម