កីឡាករបាល់ទាត់ជនជាតិជប៉ុន Reo Nakamura ធ្លាប់ជាសមាជិកក្នុងក្លិប២នៅលីគកំពូលកម្ពុជា Metofone Cambodian League ចន្លោះឆ្នាំ២០១៤-២០១៥ បានប្រកាសព្យួរស្បែកជើង ពីអាជីពកីឡាករបាល់ទាត់ហើយ ក្នុងឆ្នាំ២០២១ នេះ។
បើតាមសេចក្តីប្រកាសនៅលើហ្វេសប៊ុករបស់កីឡាករមកពីទីក្រុង Osaka បានបង្ហោះនៅរសៀលថ្ងៃចន្ទ ទី១៩ខែកក្កដា ឆ្នាំ២០២១ នេះពីការសម្រេចចិត្តលាឈប់ពីអាជីពកីឡាករបាល់ទាត់ ព្រមទាំងអរគុណអ្នកដែលពាក់ព័ន្ធធ្លាប់ជួយរូបគេនាពេលកន្លងមកផងដែរ។ រូបគេបានរៀបរាប់ពីប្រវត្តិផ្សងព្រេងនៅក្រៅប្រទេស ដែលក្នុងនោះមានទាំងកម្ពុជាទៀតផង។
ក្រុមវេស្ទើនភ្នំពេញ (បច្ចុប្បន្នរំសាយ) ជាក្លិបនៅបរទេសដំបូងគេបង្អស់ដែលខ្សែបម្រើ រូបនេះចូលរួមក្រោយចាកចេញពីស្រុកកំណើត គឺនៅរដូវកាលឆ្នាំ២០១៤។ ក្រុមវេស្ទើនភ្នំពេញ នៅកាលនោះចុះបញ្ជីកីឡាករបរទេស៤នាក់គឺReo Nakamura កីឡាករ Privat (បច្ចុបន្នលេងនៅព្រះខ័នរាជស្វាយរៀង) កីឡាករនីហ្សរីយ៉ា Isla Kolax និងកីឡាករកូឌីវ័រ Goze Brizi Dieudonne។
ចូលដល់ឆ្នាំ២០១៥ Reo Nakamuraបានចូលរួមជាមួយក្រុមអាស៊ីអឺរ៉ុប វិញម្តង ដោយកាលនោះអាស៊ីអឺរ៉ុប បានចុះបញ្ជីកីឡាករបរទេសផ្សេងទៀតមានកីឡាករនីហ្សេរីយ់ា George Kelechi, Kenneth Nwafo និងSilva Sunday និងកីឡាករអេហ្ស៊ីប Mohamed Hamza។
ចេញពីកម្ពុជា កីឡាករវ័យ៣០ឆ្នាំស្តើងរូបនេះបានចូលរួមជាមួយក្រុម Lanexang United F.C របស់ឡាវ ក្នុងជើងទី១ ឆ្នាំ២០១៦ ហើយជើងទី២ បានប្តូរទៅចូលរួមក្រុម VSV United ក្នុងខេត្ត Nong Khai ជើងទី២។ ចេញពីតំបន់អាស៊ាន កីឡាករ Reo Nakamura បានចូលរួមក្នុងក្រុម Erchim នៅលីគកំពូលម៉ុងហ្គោលី នៅឆ្នាំ២០១៧ នឹងឈ្នះជើងឯកជាមួយក្រុមនេះផងដែរ។
ចេញពីម៉ុងហ្គោលី កីឡាកររូបនេះបានទៅចូលរួមក្រុម George Telegraph នៅលីគកំពូលប្រទេសឥណ្ឌា ចន្លោះរដូវកាលឆ្នាំ២០១៨-២០១៩ ដោយជួយក្រុមឈរចំណាត់ថ្នាក់លេខ៦ ក្នុងចំណោមសមាជិកទាំង១២ក្រុម។
នៅឆ្នាំ Reo Nakamura បានចេញពីឥណ្ឌា ដោយចូលរួមក្នុងក្រុម Shan United នៅលីគកំពូលនៃប្រទេសមីយ៉ាន់ម៉ា ព្រមទាំងឈ្នះជើងឯកនៅឆ្នាំនោះផងដែរ។ ឆ្នាំនោះរូបគេបានជួយក្រុមនៅមីយ៉ាន់ម៉ា ចូលរួមប្រកួតក្នុងពានរង្វាន់ AFC Cup 2019 ក្រៅពីប្រកួតពានរង្វាន់ក្នុងស្រុក។ ក្រោយចប់រដូវកាលឆ្នាំ២០២០ មក ប្រទេសមីយ៉ាន់ម៉ា មានស្ថានភាពនយោបាយវឹកវរ កីឡាកររូបនេះទំនេរមិនមានក្លិបចូលរួមនោះទេ៕
