ក្លិបបាល់ទាត់វិសាខា បានប្រកាសពីការចុះបញ្ជីសមាជិកថ្មីបន្ថែម១រូបទៀត គឺជាខ្សែប្រយុទ្ធជនជាតិកូរ៉េខាងត្បូង វ័យ២៤ឆ្នាំដែលធ្លាប់ប្រកបអាជីពនៅស្រុកកំណើតផង និងនៅប្រទេសប៊ែលហ្សិក ក្នុងទ្វីបអឺរ៉ុប ផង ដើម្បីត្រៀមខ្លួនប្រកួតក្នុងជើងទី២ នៃពានរង្វាន់លីគកំពូលកម្ពុជា Metfone Cambodian League 2021។
យោងតាមសេចក្តីប្រកាសរបស់ក្លិបវិសាខា នៅរសៀលថ្ងៃចន្ទ ទី១៩ខែកក្កដា ឆ្នាំ២០២១ នេះបញ្ជាក់ថា៖«ថ្ងៃនេះ ពួកយើងមានកិត្តិយសសូមប្រកាសនូវសមាជិកថ្មី ១រូបទៀត ដែលនឹងចូលរួមជាមួយពួកយើង នៅជើងទី២ នៃពានរង្វាន់មិត្តហ្វូនខេមបូឌានលីគ នាពេលឆាប់ៗខាងមុខ គឺខ្សែប្រយុទ្ធសញ្ជាតិកូរ៉េខាងត្បូង Lee Jae Gun»។
បច្ចុប្បន្ន Lee មានវ័យ ២៤ឆ្នាំ ដោយខ្សែប្រយុទ្ធកម្ពស់ ១.៨០ម៉ែត្ររូបនេះ បានផ្ដើមអាជីពដំបូង ជាមួយក្លិប AFC Tubize នៅក្របខណ្ឌលីគទី២ ប្រទេសប៊ែលហ្ស៊ិក ចាប់ពីឆ្នាំ២០១៧-២០១៩។ បន្ទាប់មកទើបផ្ទេរមកលេងនៅទឹកដីកំណើតខ្លួនវិញ ចាប់ពីឆ្នាំ២០១៩ ដល់ឆ្នាំ២០២១ ជាមួយក្លិប Chungnam Asan FC នៃលីគទី២ ប្រទេសកូរ៉េខាងត្បូង មុនផ្ទេរមកក្លិបកីឡាបាល់ទាត់ វិសាខាពេលនេះ ។
ក្លិបបានបញ្ជាក់ថា៖«តាងនាមគ្រួសារបាល់ទាត់វិសាខា សូមសម្ដែងការស្វាគមន៍យ៉ាងកក់ក្ដៅ ចំពោះវត្តមានកីឡាករ Lee Jae Gun ។ ពួកយើងសង្ឃឹមយ៉ាងមុតមាំថា វត្តមានរបស់ Lee នឹងរួមចំណែកជួយក្លិបរបស់យើង ឆ្ពោះទៅរកភាពជោគជ័យថ្មីៗបន្ថែមទៀត ពិសេសឆ្ពោះទៅសម្រេចគោលដៅ ដែលពួកយើងកំពុងទន្ទឹងរង់ចាំទាំងអស់គ្នា»៕