ក្លិបភ្នំពេញក្រោន នឹងត្រូវជួបជាមួយ Young Elephants FC នៅវគ្គជម្រុះបឋម (Primarily Stage) ក្នុងពានរង្វាន់ AFC Cupនៅថ្ងៃទី១៦ ខែសីហា ឆ្នាំ២០២៣ នៅកម្ពុជា។ ខណ:មុនប្រកួតមកដល់កីឡាករ Soe Moe Kyaw សញ្ជាតិមីយ៉ាន់ម៉ា បានលើកឡើងពីចំណាប់អារម្មណ៍ក្នុងការចូលរួមជាមួយភ្នំពេញក្រោន ត្រៀមប្រកួតពានរង្វាន់ AFC Cup ខាងមុខនេះ។
កិឡាករ Soe Moe Kyaw បានលើកឡើងពីចំណាប់អារម្មណ៍ក្នុងការចូលរួមជាមួយភ្នំពេញក្រោន ថា៖ «ភ្នំពេញក្រោនគឺជាក្រុមដែលល្អបំផុតនៅកម្ពុជា ដូច្នេះខ្ញុំរីករាយណាស់ ដែលបានល្អក្នុងក្រុមដែលល្អប្រចាំប្រទេស ខ្ញុំក៏មានមោទកភាពសម្រាប់ខ្លួនខ្ញុំផងដែរ ដែលក្លាយជាកីឡាករមីយ៉ាន់ម៉ាទីមួយរបស់ក្លិប ។ ខ្ញុំដឹងថាក្រុមនឹងជួយខ្ញុំឲ្យមានភាពរីកចម្រើន និងខ្ញុំក៏មានឱកាសក្នុងការលេងពានរង្វាន់ AFC CUP ផងដែរ »។
ក្រុមបាល់ទាត់ភ្នំពេញក្រោន ដែលជាម្ចាស់ជើងឯកពានរង្វាន់លីគកំពូលកម្ពុជា Cambodian Premier League 2022 នឹងតំណាងឱ្យកម្ពុជា ចូលរួមប្រកួតពានរង្វាន់ជើងឯកកម្រិតទី២ប្រចាំទ្វីបអាស៊ី គឺ AFC Cup រដូវកាលឆ្នាំ២០២៣-២៤ ក្នុងកូតាវគ្គជម្រុះបឋម ត្រូវប្រកួតជាមួយ Young Elephant FC ជើងឯកលីគកំពូលឡាវ ក្នុងវគ្គប្រកួតជម្រុះបឋម ក្នុងព្រឹត្តិការណ៍ AFC Cup។
រំលឹកថា ក្លិបបាល់ទាត់ភ្នំពេញក្រោន ក្រោមការដឹកនាំរបស់លោក Oleg Starynskyi បានប្រកាសនាំចូលកីឡាករ Soe Moe Kyaw ជនជាតិមីយ៉ាន់ម៉ា កាលពីថ្ងៃទី១៨ កក្កដា ដើម្បីត្រៀមប្រកួតពានរង្វាន់ AFC Cup ខាងមុខ និងសម្រាប់លីគកំពូលកម្ពុជា Cambodia Premier League រដូវកាល ២០២៣-២៤។
វគ្គជម្រុះបឋមប្រចាំតំបន់អាស៊ាន នេះហៅថា Preliminary ដែលមាន២គូ ត្រូវប្រកួតនៅថ្ងៃទី ១៦ ខែសីហា ឆ្នាំ២០២៣ ក្នុងនោះ៖
គូទី១៖ ភ្នំពេញក្រោន (កម្ពុជា) ប៉ះ Young Elephants (ឡាវ)
គូទី២៖ Yangon United (មីយ៉ាន់ម៉ា) ប៉ះ Kasuka (ប្រ៊ុយណេ)
វគ្គជម្រុះ Play Off Round នឹងធ្វើឡើងនៅថ្ងៃទី២៣ ខែសីហា ឆ្នាំ២០២៣ ដោយ៖
គូទី១៖ Tampines Rovers (សិង្ហបុរី) ប៉ះ អ្នកឈ្នះរវាង ភ្នំពេញក្រោន និងYoung Elephants
គូទី២៖ PSM Makassar (ឥណ្ឌូណេស៊ី) ប៉ះ អ្នកឈ្នះរវាង Yangon United និង Kasuka។
គួរបញ្ជាក់ថា នៅចុងខែកក្កដា នេះដែរ ភ្នំពេញក្រោន នឹងត្រូវជួប វិសាខា ដណ្តើមពានរង្វាន់ខេមបូឌានស៊ូបភើខាប់ ឆ្នាំ២០២៣ ដែលការប្រកួតនឹងប្រព្រឹត្តិទៅនៅអាទិត្យ ទី៣០ ខែកក្កដា ឆ្នាំ២០២៣ នាពហុកីឡដ្ឋានជាតិ (ស្តាតអូឡាំពិក) វេលាម៉ោង ៦:០០ ល្ងាច៕