សិល្បៈជាតិ៖ រឿងដែលតារាចម្រៀងលំដាប់ពិភពលោក Jennie BP ត្រូវបានព្រះសង្ឃ បដិសេធ មិនឱ្យចូលថតក្នុងព្រះវិហារ នៅវត្តមួយកន្លែងនៅកូរ៉េបានផ្ទុះការចាប់អារម្មណ៍ក្រោយមានការទៅសម្ភាសន៍មួយរបស់តារាចម្រៀង Jo Kown ដាក់បង្ហោះនៅលើឆាណែល Youtube ។
ព្រះសង្ឃអង្គនោះបានមានសង្ឃដីកាទម្លាយមូលហេតុពិតនៅពីក្រោយការដែលព្រះអង្គមិនអនុញ្ញាតឱ្យ Jennie ចូលថតរូបភាពវីដេអូ Vlog នៅក្នុងព្រះវិហារថា ដោយសារតែព្រះអង្គយល់ថាទីអារ៉ាមគឺជាកន្លែងស្ងប់ស្ងាត់ដើម្បីហ្វឹកហាត់និងអប់រំចិត្ត ដូច្នេះព្រះអង្គមិនចង់ឱ្យព្រះវិហារ និងវត្តអារ៉ាមក្លាយជាកន្លែងផ្សាយពាណិជ្ជកម្មនោះទេ មួយវិញទៀតប្រជាប្រិយភាពរបស់តារារូបនេះល្បីល្បាញកម្រិតពិភពលោក ហេតុនេះអ្នកគាំទ្ររបស់ Jennie មកពីគ្រប់ទិសទីច្បាស់ជានឹងសម្រុកទៅវត្តកាន់តែច្រើនរហូតដល់កកស្ទះមិនខាន។
ក្រោយសង្ឃដីការបស់ព្រះសង្ឃពន្យល់ពីមូលហេតុដែលមិនអនុញ្ញាតឱ្យ Jennie ចូលថតក្នុងវត្តត្រូវបានផ្សាយចេញ មានសាធារណជនជាច្រើនបានសម្ដែងអារម្មណ៍ហួសចិត្ត និងអស់សំណើចជាខ្លាំង។ រឿងដែល Jennie មិនអាចចូលថតក្នុងវត្តត្រូវបានគេយកជជែកវែកញែក ដើម្បីរកចំណុចគោលមួយទាក់ទងនឹងការកំណត់ព្រំដែនរវាងជំរកសាសនា និងពិភពនៃការផ្សព្វផ្សាយពាណិជ្ជកម្មបែបកម្សាន្ត។
រឿងនេះក៏បង្កឱ្យកើតមានសំនួរទៅលើការទទួលខុសត្រូវរបស់តារាៗនិងអ្នកផលិតមាតិកាតាមអនឡាញ ស្ដីពីសក្ដានុពលនៃទីសក្ការៈទាក់ទងទៅនឹងពាណិជ្ជកម្មនៅពេលដែលពួកគេផលិតអ្វីក៏ដោយដែលមានពាក់ព័ន្ធនឹងសាសនាឬវិញ្ញាណ៕
ប្រភព៖ kpopstarZ
