សិល្បៈជាតិ៖ តារាចម្រៀង ជី ដេវីត បានបញ្ចេញសារថ្មីៗក្ដៅព្រមានចំពោះអ្នកដែលប្រើប្រាស់អាកប្បកិរិយាពាលយកទឹកកកគប់ដាក់ខ្លួន ខណៈកំពុងតែច្រៀងនិងសម្ដែងនៅលើឆាកឱ្យប្រញាប់ចូលខ្លួនសុំទោសលោកជាបន្ទាន់ ដោយទុកពេលឱ្យជននោះរយៈពេល៨ម៉ោងរាប់ចាប់ពីការបង្ហោះនៅលើផេកផ្លូវការរបស់ខ្លួន។
ដំបូងឡើយម្ចាស់បទ «មហានគរ» មិនបានប្រកាន់ខឹងនឹងបុគ្គលដែលគប់ទឹកកកដាក់ខ្លួននោះឡើយ ប៉ុន្តែក្រោយបានមើលវីដេអូពីកាំមេរ៉ាសុវត្ថិភាពរួច ធ្វើឱ្យលោកក្ដៅស្លឹកត្រចៀក ហើយបានប្រកាសប្រើវិធានការក្ដៅចំពោះជនបង្ករូបនោះ។ នៅព្រឹកថ្ងៃទី១ ខែសីហា លោក ជី ដេវីត បានផុសរៀបរាប់ពីក្ដីឈឺចាប់របស់លោកនៅលើផេកផ្លូវការដោយរៀបរាប់យ៉ាងលម្អិតថា:
«ថ្ងៃនេះបន្ទាប់ពីខ្ញុំបានមើល Security Video ខ្ញុំពិតជាតក់ស្លុតនឹងហួសចិត្តជាមួយអាកប្បកិរិយាគួរឱ្យខ្ពើមរអើមពោរពេញដោយការមើលងាយជិះជាន់តម្លៃមកលើរូបខ្ញុំជាអ្នកសិល្បៈខ្លាំងណាស់ គឺហួសពីការស្មាន។ និយាយដោយស្មោះត្រង់ក្នុងពេលនេះចិត្តខ្ញុំក៏ចង់លើកលែង ក៏មិនចង់បន្ត សឹងតែថាឱ្យកន្លងហួស ហើយក៏ចប់ទៅចុះ ប៉ុន្តែដោយកម្លាំងអ្នកគាំទ្រនិងមហាជន ខ្ញុំមិនអាចប្រើប្រាស់ចិត្តប្រណីរបស់ខ្ញុំចំពោះមនុស្សដែលមានចិត្តពាលដូចអ្នកបាននោះទេ វាហាក់ដូចជាមិនគប្បីទាល់តែសោះ បើខ្ញុំនៅតែចចេស ចង់លើកលែង។ ខ្ញុំជាមនុស្សរឹងមាំគ្រប់បញ្ហា តែខ្ញុំក៏មានបេះដូងឈឺចាប់ នឹងទង្វើថោកទាបបែបនេះដែរ ដោយហេតុខ្ញុំផ្ទាល់បានជួបរឿងនេះ ខ្ញុំនឹងក្រោកឈរជាសិល្បករម្នាក់ដើម្បីលុបបបំបាត់ការមើលងាយ មើលថោកដល់សិល្បករ និងសិល្បការិនីម្នាក់ ដើម្បីលុបបំបាត់ការមើលងាយ មើលថោក ដល់សិល្បករ និងសិល្បការិនីដទៃទៀត ក៏ដូចជាក្រោកឈរ ដើម្បីមហាជន និងអ្នកគាំទ្ររបស់ខ្ញុំ។ ខ្ញុំសូមអរគុណបងប្អូន ខ្ញុំពិតជាមានភាពកក់ក្ដៅពីអ្នកគាំទ្រដែលឈឺឆ្អាល សុខទុក្ខរបស់ខ្ញុំ ខ្ញុំសង្ឃឹមថានឹងមានវិធានការចំពោះជននេះ ហើយខ្ញុំក៏សង្ឃឹមថាជននេះនឹងចូលខ្លួនសុំទោសជាសាធារណៈចំពោះអ្នកគាំទ្ររបស់ខ្ញុំ និងមហាជន ពីទង្វើថោកទាបរបស់ខ្លួន ហេតុដែលខ្ញុំនិយាយដូចនេះ ពិតណាស់ពាក្យសុំទោសរបស់ជននេះ ចំពោះខ្ញុំគឺជាវាមិនមានតម្លៃអ្វីអាចផ្សះផ្សារអារម្មណ៍ឈឺចាប់របស់ខ្ញុំបានទេ បើផ្អែកទៅឥរិយាបថអ្នកក្លាហានក្រោមមេឃរបស់គេ។ ខ្ញុំនឹងផ្ដល់ជូន Video ពេញសម្រាប់បងប្អូនបើគ្មានដំណោះស្រាយក្នុងពេល៨ម៉ោង រាប់ចាប់ពីការផុសរូបមួយសន្លឹកនេះទៅ។ ការពិតខ្ញុំមិនចង់បន្សល់ទុកដានឈឺចាប់នៅក្នុង Page របស់ខ្ញុំទេ នេះទឹកកក ចុះបើកៅអី ចុះបើដប កែវ ចាន ចុះបើមិនត្រូវតែខ្ញុំហើយថែមទាំងត្រូវបងប្អូនអ្នកដែលបានមកគាំទ្រខ្ញុំ ? ទោះជាឈាមខ្មៅមួយតួខ្លួនរបស់អ្នកក៏មិនអាចសងគ្រប់ផង។ក្នុងរូបភាពខាងក្រោមនេះជាផ្នែកមួយនៃអាកប្បកិរិយារបស់បុរសកំណាចក្នុងអំឡុងពេលដែលខ្ញុំកំពុងច្រៀងនៅម៉ោង (១២:៤១ នាទីរំលងអធ្រាត្រឈានចូលថ្ងៃទី ៣០ ខែកក្កដា ឆ្នាំ២០២៣) ជនបង្កគឺបុរសសង្ហាលើកម្រាមដៃកណ្ដាលនោះឯង។ ខ្ញុំសូមអរគុណដល់ PUB ដែលបានសហការផ្ដល់ជា Video ដល់រូបខ្ញុំ ខ្ញុំពិតជាអរគុណចំពោះតឹកតាងដ៏សំខាន់នេះ។ ដោយក្ដីគោរពស្រលាញ់ចំពោះបងប្អូន និងមហាជន ពីខ្ញុំបាទ ងួន ចាន់ដាវីត។
ការលើកឡើងដ៏វែងអន្លាយនេះ ត្រូវបានអ្នកគាំទ្រ អ្នកស្រលាញ់យុត្តិធម៌ក្នុងសង្គម និងអ្នកស្អប់ខ្ពើមអំពើអសីលធម៌ សម្ដែងការគាំទ្រយ៉ាងពេញទំហឹង ដោយមានអ្នកខ្លះបានសុំឱ្យតារាចម្រៀងល្បីចាត់ការទៅតាមច្បាប់។ មនុស្សជាច្រើនបានបង្ហាញក្ដីព្រួយបារម្ភខ្លាចក្រែងបើសិនបណ្ដោយឱ្យជននេះរួចខ្លួននឹងក្លាយជាគំរូមិនល្អមួយសម្រាប់សង្គម ហើយធ្វើឱ្យអ្នកផ្សេងទៀត មិនក្រែងរអាហើយនាំគ្នាត្រាប់តាម ព្រោះគេមើលឃើញថារឿងបែបនេះបានផ្ទុះកក្រើកធ្វើតាមៗគ្នានៅក្នុងសង្គមបរទេសទៅហើយ បើសិននៅកម្ពុជាមិនប្រញាប់ទប់ស្កាត់ទេនោះ ក្រែងលរីករាលដាលក្នុងចំណោមយុវវ័យ ដែលជាវ័យត្រូវការចាំបាច់ការបង្ហាត់បង្ហាញ កែតម្រូវនិងតម្រង់ទិស៕
