សិល្បៈអន្តរជាតិ៖ តារាចម្រៀង-តារាសម្ដែងរាងតូចច្រឡឹងរបស់កូរ៉េ IU តស៊ូណាស់ទម្រាំអាចបោះជំហានចូលប្រឡូកក្នុងវិស័យសិល្បៈ។គេនៅចាំបានថាតារាស្រីរូបនេះធ្លាប់ទៅប្រកួតចម្រៀង២០កន្លែងប៉ុន្តែលទ្ធផលសុទ្ធតែបរាជ័យទាំងអស់ ដោយក្នុងចំណោមនោះរួមទាំងផលិតកម្ម JYP Entertainment ផងដែរ។ និយាយដល់រឿងនេះ ស្ថាបនិក JYP នៅតែមិនអស់ចិត្តហើយចិញ្ចឹមចិត្តសោកស្ដាយដែលក្រុមហ៊ុនលោកបែរជារបូតគ្រាប់ពេជ្រដ៏មានតម្លៃនេះ។
ទោះជាមាគ៌ាសិល្បៈដំបូងរបស់ IU ឬ Lee Ji Eun មិនរោយដោយស្រទាប់ផ្កាកុលាប ប៉ុន្តែមកដល់បច្ចុប្បន្ននេះនាងគឺជាអាយដលកូរ៉េដែលមានឈ្មោះបោះសំឡេង អាចនិយាយបានថាកេរ្តិ៍ឈ្មោះនាងបានឡើងដល់ចំណុចកំពូលឬជាតារាទោលដែលមានឥទ្ធិពលឈានមុខគេផងដែរ។ តារាស្រីដែលជោគជ័យទាំងការងារ ថែមទាំងអាចនិយាយបានថាមានសំណាងក្នុងរឿងស្នេហាព្រោះអាចក្ដោបបេះដូងប្រុសស្អាតបបូរមាត់ព្រែក Lee Jong Suk ដែលជារាជបុត្រក្នុងក្ដីសុបិនរបស់នារីជាច្រើនរូប។
ជារឿយៗ JYP ឬ Park Jin Young រមែងរម្លឹកពីឈ្មោះរបស់ IU នៅក្នុងបទសម្ភាសន៍ជាច្រើននាពេលកន្លងមក៖ «ទ្រូងរបស់ខ្ញុំស្ទើរតែប្រេះ រាល់ពេលដែលខ្ញុំឃើញ IU» ការលើកឡើងរបស់ម្ចាស់ផលិតកម្មយក្សមួយរបស់កូរ៉េនេះគឺបង្ហាញយ៉ាងច្បាស់ថាលោកនៅតែសោកស្ដាយដែលក្រុមការងារក្នុងផលិតកម្មមិនជ្រើសរើសយកដុំពេជ្រដ៏មានតម្លៃមួយគ្រាប់នេះមកកែច្នៃ។ JYP បានខឹងយ៉ាងខ្លាំងចំពោះបុគ្គលិកដែលទទួលខុសត្រូវការងារ Audition របស់លោក នៅពេលដែលលោកដឹងថា IU មិនជាប់ក្នុងការប្រកួតចម្រៀងក្នុងផលិតកម្ម JYP។
IU គឺជាតារាមួយដួងដែលមានទេពកោសល្យនិងសមត្ថភាពពហុជំនាញអាចធ្វើបានច្រើនទម្រង់ មិនថាជាការច្រៀង ការសម្ដែង ឬលេងឧបករណ៍តន្ត្រីនោះឡើយ នាងតែងតែធ្វើបានយ៉ាងល្អលើសពីការរំពឹងទុករបស់អ្នកគាំទ្រជានិច្ច។ អ្នកគាំទ្រសង្ឃឹមថា IU និង Lee Jong Suk នឹងឆាប់មានដំណឹងល្អ ទោះជាទើបចាប់ផ្ដើមស្នេហាក្ដី ប៉ុន្តែមិត្តភាពរបស់អ្នកទាំងពីរដែលមានចំពោះគ្នាគឺមានច្រើនឆ្នាំកន្លងមកហើយ៕