រូបភាពគូស្នេហ៍ភក្ដីតាយាយមួយគូ ដែលកំពុងតែត្រូវបានចែករំលែកបន្តគ្នាយ៉ាងខ្លាំងនៅលើបណ្ដាញសង្គមនោះ ក៏ធ្វើឱ្យអ្នកនាង ខាត់ សុឃីម ក្ដុកក្ដួលរំជួលចិត្តរហូតបង្ហោះជាសំណេរនៅលើហ្វេសប៊ុករបស់ខ្លួនដូចគ្នាដែរ។
កាលពីថ្ងៃទី២០ ខែកក្កដា ឆ្នាំ២០២១ ម្សិលមិញនេះ អ្នកនាង ខាត់ សុឃីម តារាពហុជំនាញរបស់កម្ពុជាបានយករូបភាពលោកតា និង លោកយាយមួយគូ ដោយតាមដឹងលោកយាយគឺមានជំងឺកូវីដ-១៩ ចំណែកលោកតាមិនមាននោះទេ តែលោកតាមកតាមមើលថែលោកយាយ។ ក្នុងរូបភាពនោះលោកតាសំរាកនៅលើឥដ្ឋដៃក្ដាប់ភរិយាបណ្ដូលចិត្តយ៉ាងណែនហាក់ផ្ដល់កម្លាំងចិត្តនិងបញ្ជាក់ថាមិនទៅណាឆ្ងាយ ខណៈដែលលោកយាយកំពុងសម្រាកលើប៉ៅអ៊ីមានឧបករណ៍អុកស៊ីសែនជំនួយដង្ហើម។
អ្នក ខាត់ សុឃីម បានយករូបភាពគូស្នេហ៍ភក្ដិីខាងលើមកបង្ហោះព្រមជាមួយនឹងសំណេរខ្លីតែមានន័យថា៖ «គូស្នេហ៍ភក្ដី យាយកើតជំងឺ COVID តានៅមើលថែយាយ។ តាស្រលាញ់យាយណាស់ សំរាន្តក៏កាន់ដៃយាយរហូត ជូនពរ យាយនិងតាឆាប់ជាពីជំងឺដ៏សាហាវនេះ ការថែទាំ និងយកចិត្តទុកដាក់ បារម្ភ ដែលចេញពីក្ដីស្រលាញ់ ជាថ្នាំដ៏ពូកែសម្រាប់អ្នកជំងឺ»។
មហាជនបានចូលមកជូនពរ និង គោរពសរសើរចំពោះគូស្នេហ៍ភក្ដីមួយគូយ៉ាងច្រើនរហូតធ្វើឱ្យការផុសខាងលើរបស់អ្នកនាង ខាត់ សុឃីម មាន Like ចំនួន ៧.៧K ការបញ្ចេញមតិ Comment ២២៤ និងមានចំនួនចែករំលែកបន្ត ២.៦K ដង៕