ឯកសណ្ឋានក្រុមជម្រើសជាតិកម្ពុជាដែលផលិតដោយម៉ាកយីហោក្នុងស្រុក វរ្ម័ន Varaman ឥឡូវនេះគឺមានដាក់តាំង&លក់នៅក្នុងហាង Premier Football (Suntec City) ដែលមានទីតាំងស្ថិតនៅក្នុងផ្សារទំនើប Suntec City ប្រទេសសិង្ហបុរី ។ នេះជាហាងក្រៅប្រទេសដំបូងគេបង្អស់ដែលជាដៃគូរបស់ វរ្ម័ន Varaman។ បងប្អូនដែលរស់នៅក្នុងប្រទេសសិង្ហបុរី អាចរកទិញឯកសណ្ឋានក្រុមជម្រើសជាតិកម្ពុជាបាននៅទីតាំងនេះ។
រំលឹកថា កាលពីថ្ងៃទី២៣ ខែមីនា ឆ្នាំ២០២៣ ក្រុមហ៊ុន Varaman (វរ្ម័ន) បានប្រកាសថាក្រុមជម្រើសជាតិកម្ពុជាទាំងក្រុមបាល់ទាត់បុរស និងនារី នឹងប្រើឯកសណ្ឋានផលិតដោយ Varaman (វរ្ម័ន)។ កិច្ចព្រមព្រៀងជាមួយ Varaman (វរ្ម័ន) ចាប់ផ្តើមជាផ្លូវការពីខែមិថុនាឆ្នាំ២០២២ រហូតដល់ខែមិថុនាឆ្នាំ២០២៦ សម្រាប់ការឧបត្ថម្ភគ្រប់ឯកសណ្ឋានការប្រកួតការហ្វឹកហាត់និងការធ្វើដំណើរដែលក្រុមបាល់ទាត់ជម្រើសជាតិកម្ពុជាត្រូវការ។
VARAMAN (វរ្ម័ន) គឺជាម៉ាកក្នុងស្រុកថ្មី បង្កើតឡើងជាមួយគោលបំណង ចង់ឱ្យក្រុមជម្រើសជាតិកម្ពុជាប្រើប្រាស់ឯកសណ្ឋានដែលរចនា និងផលិត នៅក្នុងព្រះរាជាណាចក្រកម្ពុជា ជាផលិតផលដែលផលិតដោយដៃបងប្អូនខ្មែរយើងផ្ទាល់ ដើម្បីប្រើប្រាស់ក្នុងពេលប្រកួតប្រជែងលើឆាកអន្តរជាតិ។
ម៉ាក VARAMAN (វរ្ម័ន) គឺបានបំផុសគំនិតចេញពីព្រះបរមនាមព្រះមហាក្សត្រខ្មែរមួយព្រះអង្គ ដែលគួរឲ្យកោតស្ញប់ស្ញែង គឺព្រះបាទជ័យវរ្ម័នទី៧ ក្នុងសម័យកាលដ៏រុងរឿងបំផុតនៃប្រវត្តិសាស្ត្រខ្មែរ។ ពាក្យនេះក៏ជាពាក្យសំស្ក្រឹតមួយ ដែលមានន័យថាអាវក្រោះ ដែលអត្ថន័យនេះ ប្រៀបបានទៅនឹងឯកសណ្ឋានក្រុមជម្រើសជាតិកម្ពុជាយើងជាអាវក្រោះការពារ ក្នុងពេលប្រកួតជាមួយអន្តរជាតិ៕