កាន់តែកៀកថ្ងៃប្រកួតផ្ដាច់ព្រ័ត្រ និង រកឃើញម្ចាស់មកុដប្រចាំឆ្នាំ២០២៣ហើយ សម្រាប់កម្មវិធីប្រកួតសម្រស់ដ៏ធំកម្រិតពិភពលោក Miss Grand Cambodia ឆ្នាំ២០២៣។ នៅក្នុងឱកាសនៃការប្រកួតវគ្គបង្ហាញម៉ូដឈុតហែលទឹក Swimsuit កាលពីរាត្រីថ្ងៃទី៧ ខែសីហា កន្លងទៅ អ្នកស្រី អ៊ឹម សុគន្ធា ND (National Director Miss Grand Cambodia) បានប្រាប់អ្នកសារព័ត៌មានដោយសុទិដ្ឋិនិយមអំពីការតស៊ូព្យាយាមមិនខ្លាចនឿយហត់របស់បេក្ខនារីទាំងអស់ ដែលធ្វើឱ្យអ្នកស្រីអត់ទ្រាំមិនកោតសរសើរមិនបាន។ ជាងនោះទៀត អ្នកស្រីថែមទាំងទម្លាយពីខ្ទង់ចំណាយដ៏ច្រើនមហាសាលនៃការរៀបចំកម្មវិធីនេះផងគឺមានចំនួនរហូតដល់ទៅជាងកន្លះលានដុល្លារឯណោះ។
អ្នកស្រីបានឱ្យដឹងផងដែរថានៅក្នុងរយៈពេលជាង៤ខែ នៃការសម្ងំហ្វឹកហាត់បង្កើនសមត្ថភាពបេក្ខនារីទាំង២៥រូបមានការអភិវឌ្ឍល្អប្រសើរដូចៗគ្នា ចំណែកបើសួរថាមានបេក្ខនារីរូបណានៅក្នុងដួងចិត្តហើយឬនៅ? អ្នកស្រីបានបញ្ជាក់ថាមកទល់ពេលនេះមិនទាន់មាននៅឡើយទេ គឺត្រូវរង់ចាំតាមដានសមត្ថភាពបេក្ខនារីទាំងអស់នៅវគ្គបន្តទៀតដូចជាវគ្គ បង្ហាញឈុតតំណាងជាតិ វគ្គប្រកួតបឋម និងវគ្គផ្ដាច់ព្រ័ត្រ។
គេសង្កេតឃើញថាសន្ទុះគាំទ្រនិងពាក្យលើកសរសើរបានលាន់កងរំពងទាំងនៅមុខឆាកនិងនៅលើបណ្ដាញសង្គម បន្ទាប់ពីវគ្គប្រកួតបង្ហាញឈុតហែលទឹករបស់បេក្ខនារីទាំង២៥ រាជធានី-ខេត្ត បញ្ចប់ទៅដោយជោគជ័យរហូតអ្នកស្រី អ៊ឹម សុគន្ធា បានបង្ហាញពីចំណាប់អារម្មណ៍របស់ខ្លួនថា៖ «នាងខ្ញុំពិតជារំភើបណាស់ ដែលបើក Facebook មក ឃើញបងប្អូនហ្វេនៗសរសើរបេក្ខនារីទាំង២៥រូបមិនដាច់ពីមាត់ទាំង ស្អាត ឆ្លាត រឹងមាំ ក្លាហាន ទោះជាមិនទាន់បាន១០០% តែនេះជាការចាប់ផ្ដើមពីចំណុច ០»។
សូមជម្រាបជូនថានៅសល់តែមួយសប្ដាហ៍ទៀតប៉ុណ្ណោះ នឹងរកឃើញម្ចាស់មកុដប្រចាំ២០២៣ហើយ នៅក្នុងនោះនៅសល់ចំនួន៣វគ្គធំៗទៀតដែលបេក្ខនារីត្រូវត្រៀមប្រកួតរួមមានវគ្គ ការប្រយតឈុតតំណាងជាតិ ថ្ងៃទី១៦ ខែសីហា ការប្រកួតវគ្គប្រកួតបឋមថ្ងៃទី១៨ ខែសីហា និងការប្រកួតវគ្គប្រកួតផ្ដាច់ព្រ័ត្រថ្ងៃទី១៩ ខែសីហា ខាងមុខនេះ៕