សិល្បៈជាតិ៖ នៅទីបំផុតតារាចម្រៀង ឱក សុគន្ធកញ្ញា កំពុងមានផ្ទៃពោះកូនទី ២ សមតាមផែនការដែលបានគ្រោងទុកមែន ប៉ុន្តែមើលទៅសភាពពោះរបស់អ្នកនាងនៅមិនទាន់ខ្ទាតធំនៅឡើយទេ។ យ៉ាងណាមិញ ដំណឹងនេះត្រូវបានតារាចម្រៀងស្រីរូបនេះទម្លាយនូវវីដេអូ Vlog ដែលបានបង្ហោះនៅលើបណ្ដាញសង្គមយូធូប។
តាមរយៈវីដេអូ Vlog របស់អ្នកនាង ឱក សុគន្ធកញ្ញា គេបានឃើញថា អ្នកនាង និងស្វាមី និងកូនប្រុស បានធ្វើដំណើរទៅពិនិត្យពោះនៅក្នុងមន្ទីរពេទ្យ Bumrungrad ប្រទេសថៃ និងបានឱ្យកូនប្រុសអ្នកនាង អូនតូច ឆលី ឱ្យស្ដាប់ពោះរបស់អ្នកនាងដែលរាងប៉ោងបន្តិចនោះ ហើយកូនប្រុសអ្នកនាងបញ្ជាក់ថា មាន Baby គឺជាកូនស្រី។ តែយ៉ាងណាមិញ កូនទី២ ដែលនៅក្នុងផ្ទៃនោះ អ្នកនាង ឱក សុគន្ធកញ្ញា នៅមិនទាន់បានបញ្ជាក់អំពីភេទនៅឡើយទេ។
មែនទែនទៅ អ្នកនាង ឱក សុគន្ធកញ្ញា ធ្លាប់បានព្លយប្រាប់អំពីគម្រោងយកកូនទី ២ នេះ តាំងពីអំឡុងពេលដែលអ្នកនាងធ្វើជាគណៈកម្មការនៅក្នុងកម្មវិធីប្រឡងចម្រៀង Cambodian Idol រដូវកាលទី ៤ ដោយអ្នកនាងអះអាងថា នេះគឺជាពេលវេលាចុងក្រោយហើយដែលអ្នកនាងអង្គុយលើកៅអីគណៈកម្មការ Cambodian Idol ព្រោះអ្នកនាងអាចនឹងដកឃ្លាមួយរយៈពេលសិន។
យ៉ាងណាមិញ ដោយសារតែពោះនៅមិនទាន់ខ្ទាតធំនៅឡើយ ទើបគេមើលឃើញថា អ្នកនាង ឱក សុគន្ធកញ្ញា សព្វថ្ងៃនេះនៅបន្តប្រឹងប្រែងលើការងារសិល្បៈជាធម្មតា តាមរយៈការធ្វើជាគ្រូបង្វឹកនៅក្នុងកម្មវិធីប្រឡង The Voice Cambodia រដូវកាលទី៣ ជាដើម។ បើតាមការព្យាករណ៍របស់ហ្វេនអ្នកគាំទ្រឱ្យដឹងថា អ្នកនាង ឱក សុគន្ធកញ្ញា នឹងមិនប្រលែងការងារកណ្ដាលទីនោះទេ បានន័យថា អ្នកនាងនៅតែធ្វើជា Coach បង្ហាត់កូនក្រុមទាំងច្រៀង និងរាំ រហូតដល់ថ្ងៃកៀកសម្រាលកូនទី២ ទើបអ្នកនាងផ្អាកពីសិល្បៈ ដូចការបង្កើតកូនទី១ដែរ។ អ្នកគាំទ្រកំពុងរង់ចាំអ៊ុតមើលថា កូនទី២ដែលនៅក្នុងផ្ទៃអ្នកនាង ឱក សុគន្ធកញ្ញា គឺជាកូនប្រុស ឬកូនស្រី?
គួររំលឹកដែរថា តារាចម្រៀង ឱក សុគន្ធកញ្ញា បានរៀបការជាមួយលោក អ៊ឹង សុខលី កាលពីថ្ងៃទី១៦ ឧសភា ឆ្នាំ២០១៩ ដែលពេលនេះអ្នកទាំងពីរមានកូនប្រុសម្នាក់ឈ្មោះ អ៊ឹង បញ្ញាបុត្រ ហៅឆលី ដែលមានអាយុជាង៤ឆ្នាំហើយ៕
សូមទស្សនាវីដេអូខាងក្រោមនេះ៖