ក្រុមបាល់ទាត់ព្រៃវែងអែហ្វស៊ី និងក្រុមបាល់ទាត់វិសាខា សុទ្ធតែរកបានជ័យជម្នះរៀងៗខ្លួននៅរាត្រីថ្ងៃសៅរ៍ ទី១២ ខែសីហា ឆ្នាំ២០២៣ ក្នុងសប្ដាហ៍ទី២នៃពានរង្វាន់លីគកំពូលកម្ពុជា Cambodian Premier League 2023-24 នេះ។
ក្រុមព្រៃវែងអែហ្វស៊ី បានតាមទាន់កំណត់ត្រារបស់ណាហ្គាវើល កាលពីសប្ដាហ៍ទី១កន្លងទៅ ជាក្រុមដែលរកបានជ័យជម្នះលើគូប្រកួត ដោយទាត់បញ្ជូលទីច្រើនគ្រាប់ ពោលគឺយកឈ្នះលើក្រុមម្ចាស់ផ្ទះ ISI ដង្កោសែនជ័យ ដោយលទ្ធផល ៥-០ លើទីលានកីឡដ្ឋាន AIA Stadium។
ណាហ្គាវើល សប្ដាហ៍មុនយកឈ្នះក្រុមព្រៃវែងអែហ្វស៊ី ៥ទល់៤។ ប៉ុន្តែថ្ងៃនេះព្រៃវែង យកឈ្នះគូប្រកួត៥គ្រាប់ដែរ ថែមទាំងរក្សាមិនឱ្យគូប្រកួតតបតបាន (Clean Sheets)។
៥គ្រាប់របស់ក្រុមមកពីភាគខាងកើតប្រទេសមួយនេះ រកបានដោយកីឡាករ ផាន សុផេន ចំនួន២គ្រាប់ កីឡាករជប៉ុន TAKESHITA MASATOSHI ចំនួន២គ្រាប់ និងប្រធានក្រុមជនជាតិជប៉ុន SO OMAE១គ្រាប់។ លោក ឡុង ឬទ្ធា បានជួយឱ្យក្រុមខ្លួនជាប់ជាក្រុមទី៦ ដែលរកបានពិន្ទុ នៅដើមរដូវកាលនេះ ខណៈ៤ក្រុមក្នុងចំណោម១០ ជាសមាជិក CPL នៅមិនទាន់រកបានពិន្ទុនៅឡើយ។
ចំណែកការប្រកួតមួយគូទៀតនៅទឹកដីខេត្តកំពង់ស្ពឺ នោះគឺក្រុមជើងឯករងឆ្នាំចាស់ វិសាខា បានយកឈ្នះម្ចាស់ផ្ទះណាហ្គាវើល ដោយលទ្ធផល៤-១។ ៤គ្រាប់នេះបានរុញឱ្យវិសាខា ឈរកំពូលតារាងបណ្តោះអាសន្ន មាន៦ពិន្ទុ និងគ្រាប់បាល់ច្រើនជាងព្រះខ័នរាជស្វាយរៀង ដោយរង់ចាំមើលលទ្ធផលនៃការប្រកួត២គូទៀតនៅថ្ងៃអាទិត្យជាបន្ត។
៤គ្រាប់របស់ក្រុមភ្ញៀវរកបានដោយកីឡាករប្រេស៊ីល Jonata De Oliveira Bastos, ស៊ិន កក្កដា, ស៊ិន សុផាណាត់ ម្នាក់១គ្រាប់ និង១គ្រាប់ទៀតជាការធ្វើអោយចូលទីខ្លួនឯងដោយអចេតនា របស់កីឡាករ Bektur Amangeldiev ជនជាតិកៀគីស្ថាន ក្រុមណាហ្គាវើល។ ចំណែក១គ្រាប់វាយបករបស់ណាហ្គាវើល រកបានដោយកីឡាករ Bektur Amangeldiev។
ដូច្នេះលទ្ធផលនៃការប្រកួតសប្ដាហ៍ទី២ នេះមាន៖
– ព្រះខ័នរាជស្វាយរៀង ២-១ ភ្នំពេញក្រោន
– ISI ដង្កោសែនជ័យ ០-៥ ព្រៃវែងអែហ្វស៊ី
– ណាហ្គាវើល ១-៤ វិសាខា
ចំណែកកម្មវិធីប្រកួតថ្ងៃអាទិត្យ ទី១៣ ខែសីហា ឆ្នាំ២០២៣ មាន៖
-បឹងកេត Vsអង្គរថាយហ្គឺរ នៅពហុកីឡដ្ឋានជាតិ
-គិរីវង់សុខសែនជ័យVsកងយោធពលខេមរភូមិន្ទ នៅកីឡដ្ឋានគីរីវង់