សិល្បៈជាតិ៖ កំពុងតែមានការចាប់អារម្មណ៍និងផ្ទុះការចែករំលែកពីសំណាក់អ្នកលេងបណ្ដាញសង្គម ដោយសារតែមានកុមារអូទីស្សឹមមួយរូបអាចច្រៀងបទចម្រៀង២បទរបស់កំពូលតារាចម្រៀង ម៉ាន់ វណ្ណដា មិនតែប៉ុណ្ណោះ សាមីខ្លួន វណ្ណដា ថែមទាំងរលីងរលោងទឹកភ្នែកដោយសារតែរំភើបពេកផងដែរ។
ថ្មីៗនេះលោក ម៉ាន់ វណ្ណដា តារាចម្រៀងយុវវ័យបែប HipHop ដ៏ពេញនិយម បានចូលរួមក្នុងយុទ្ធនាការ «ដំណើរពីបេះដូង» ឬ «Journey From Heart»ដែលជាកម្មវិធីចែករំលែកក្ដីស្រលាញ់ និងរួមចំណែកជួយដល់កុមារអូទីស្សឹមនៅកម្ពុជា ដើម្បីប្រមូលផ្ដុំថវិការជួយដល់ការសាងសង់អគារសិក្សាបន្ថែមសម្រាប់កុមារអូទីស្សឹម។ នៅក្នុងឱកាសនោះ កុមារាអូទីស្សឹមមួយរូបបានបញ្ចេញសមត្ថភាពដោយអាចច្រៀងចម្រៀង២បទរបស់វណ្ណដា គឺបទ «Solo Again» និងបទ «កំលោះស្រុកស្រែ» នៅចំពោះមុខតារាចម្រៀងដែលជាអាយដលរបស់ខ្លួនផងដែរ។
យោងតាមការលើកឡើងរបស់លោក ចាន់ សារិន នាយកវិទ្យាល័យអប់រំពិសេសក្រុងតាខ្មៅ បានរៀបរាប់នៅលើបណ្ដាញសង្គម កាលពីពេលថ្មីៗនេះ ឆ្លើយតបទៅមនុស្សមួយភាគតូចដែលបានរិះគន់ចំពោះកូនសិស្សរបស់លោកថាច្រៀងវ៉ល់ៗស្ដាប់មិនបានថា៖ «ផ្ទុះក្នុងបណ្តាញសង្គម តិកតុកថ្មីៗនេះ ដោយមានសិស្សអូទីស្សឹមរបស់ខ្ញុំម្នាក់បានខំច្រៀងចម្រៀងអាដលរបស់គាត់២បទ ដោយមានសំឡេងគាំទ្រ៩០% ពីមហាជនគ្រប់ស្រទាប់យុវវ័យ តែបែជាមាន ១០% បានជារិះគន់ទៅវិញថា កុមារអូទីស្សឹមម្នាក់នេះ ច្រៀងស្តាប់មិនបាន វ៉ល់ៗ ។ កូនសិស្សរបស់ខ្ញុំម្នាក់បានច្រៀងចម្រៀង២បទរបស់លោក វណ្ណដា ជាអាដលរបស់គាត់ គឺបទ Solo Again និងបទកំលោះស្រុកស្រែ ខណៈដែល ម្ចាស់បទនេះគឺ លោក ម៉ាន់ វណ្ណដា បានមកជួបពួកគេដោយផ្ទាល់នៅវិទ្យាល័យអប់រំពិសេសក្រុងតាខ្មៅតែម្តង ដោយលោក វណ្ណដា មានក្តីរំភើប លាយឡំ និងទឹកភ្នែករលីងរលោងដោយលោកមិននឹកស្មានថា កុមារអូទីស្សឹមម្នាក់នេះ អាចច្រៀងចម្រៀងគាត់បាន។ ខ្ញុំសូមជម្រាបជូនថា កុមារអូទីស្សឹមមានចំនុចពិសេសមួយដែលអ្នកផ្សេង ពិបាកនឹងធ្វើបាន ពិសេសត្រង់ថា បើគាត់ពូកែអ្វីមួយហើយ គឺច្បាស់លាស់បំផុត ចំពោះប្អូនដែលបានរិៈគន់ ខ្ញុំមិនបន្ទោសទេ មកពីប្អូនមិនយល់ តែសូមប្អូនរៀនស្វែងពីមនុស្សដែលមានអូទីស្សឹមឡើងវិញ សូម្បីតែអំពូលភ្លើងដែលយើងកំពុងប្រើបច្ចុប្បន្ន ក៏ជាស្នាដៃមនុស្សអូទីស្សឹមជាអ្នករកឃើញមុនគេដែរ បើគ្មានពួកគាត់ទេ ពិភពលោកមកទល់និងពេលនេះ ប្រហែលនៅតែប្រើចង្គៀងប្រេងកាតនៅឡើយទេ ។ សូមចូលរួមចែករំលែកក្តីស្រឡាញ់ពេញបេះដូង និងចងចាំស្នាមញញឹមរបស់កុមារអូទីស្សឹមទាំងអស់នេះជាមួយយើងទាំងអស់គ្នានៅពេលអ្នកសម្រាកពីការងារ ហើយខ្ញុំជឿថា អ្នកនិងមានសេចក្តីសុខក្នុងចិត្ត ពេលឃើញពួកគេញញឹមមករកអ្នកនៅវេលានោះ ។ ដោយសេចក្តីស្រលាញ់រាប់អានដ៏ជ្រាលជ្រៅបំផុត ចាន់ សារិន នាយកវិទ្យាល័យអប់រំពិសេសក្រុងតាខ្មៅ»
កម្មវិធី «ដំណើរពីបេះដូង» ឬ «Journey From Heart» គឺជាផ្នែកមួយជួយលើកកម្ពស់ឱ្យសាធារណជន ងាកមកចាប់អារម្មណ៍ពីកុមារអូទីស្សឹម ព្រោះពួកគេទាំងអស់ក៏ត្រូវការក្ដីស្រលាញ់ និងការយកចិត្តទុកដាក់ខ្ពស់ពីមនុស្សគ្រប់គ្នា និងសង្គមជាតិទាំងមូលផងដែរ៕
