ក្រុមបាល់ទាត់អង្គរថាយហ្គឺរ (Angkor Tiger FC) សមាជិកលីគកំពូលកម្ពុជា Cambodian Premier League 2023-24 នឹងសាងសង់កីឡដ្ឋានផ្ទាល់ខ្លួន ក្នុងក្រុងសៀមរាប ខណៈតាមផែនការការសាងសង់នេះនឹងប្រើពេលប្រមាណ១០ខែ។
ក្លិបបាល់ទាត់អង្គរថាយហ្គឺរ និង ក្រុមហ៊ុនសាងសង់ Fuxin Steel Buildings បានធ្វើការចុះហត្ថលេខាអនុស្សរណៈនៃ ការសាងសង់កីឡដ្ឋានថ្មី នៅព្រឹកថ្ងៃទី១៤ ខែសីហា ឆ្នាំ២០២៣ ក្រោមវត្តមាន លោក កាំង សេន នាយកគ្រប់គ្រង នៃក្រុមហ៊ុន Fuxin Steel Buildings លោក Satoshi Saito នាយកប្រតិបត្តិ នៃក្រុមហ៊ុនខេមបូឌានព្រីមៀរលីគ និង លោក Akihiro Kato ប្រធានក្លិបបាល់ទាត់អង្គរថាយហ្គឺរ ព្រមទាំងថ្នាក់ដឹកនាំនិងភ្ញៀវកិត្តិយស ក្នុងរាជធានីភ្នំពេញ។
តាមការបញ្ជាក់នេះតំណាងក្រុមហ៊ុនសាងសង់បញ្ជាក់ថា ជំហានដំបូងកីឡដ្ឋាននេះអាចផ្ទុកអ្នកគាំទ្របានប្រមាណ៥០០០នាក់ ដោយចាប់ផ្ដើមសាងសង់ពីខែតុលា ឆ្នាំ២០២៣ និងគ្រោងរួចរាល់នៅអំឡុងខែសីហា ឆ្នាំ២០២៤ ខាងមុខ។
សូមបញ្ជាក់ថានាយកគ្រប់គ្រងក្រុមហ៊ុនFuxin Steel Buildings លោក កាំង សេន ក៏ជាប្រធានក្លិប ISI ដង្កោសែនជ័យ ក្នុងពានរង្វាន់លីគកំពូលកម្ពុជា Cambodian Premier League 2023-24 ផងដែរ ដោយក្លិបនៅតាមបណ្តោយផ្លូវវេងស្រេង មួយនេះ បានចុះបញ្ជីលោកជាកីឡាករក្នុងក្រុមទៀតផង ខណៈលោកជាកីឡាករមានវ័យចំណាស់ជាងគេបើធៀបទៅនឹងកីឡាករផ្សេងទៀតទាំង១០ក្រុម ដែលកំពុងប្រកបអាជីពនៅរដូវកាលនេះ។
សម្រាប់ក្រុមអង្គរថាយហ្គឺរ ជាក្រុមបង្កើតឡើងដំបូងដោយអ្នកវិនិយោគទុនជប៉ុន នៅចន្លោះឆ្នាំ២០១២ ខណៈនៅឆ្នាំ២០១៣ ក្រុមនេះដណ្តើមបានសិទ្ធិពីក្របខ័ណ្ឌក១ (ជំនាន់នោះមិនទាន់មានលីគទី២ នៅឡើយទេ) ឡើងមកលីគកំពូលកម្ពុជា នៅឆ្នាំ២០១៤ រហូតដល់បច្ចុប្បន្ន។ បង្កើតឡើងដំបូងក្លិបនេះមានឈ្មោះជា TriAsia Phnom Penh ហើយក្រោយមកក៏ប្តួរជា Cambodia Tiger និងចុងក្រោយនេះឈ្មោះ អង្គរថាយហ្គឺរ។
នៅឆ្នាំ២០១៧ ក្រុមអង្គរថាយហ្គឺរ បានចាកចេញពីរាជធានីភ្នំពេញ ទៅឈរជើងនៅលើទឹកដីខេត្តសៀមរាប ដោយដំបូងឡើយប្រើប្រាស់កីឡដ្ឋានស្វាយធំ ឬ កីឡដ្ឋានខេត្ត និងប្តួរមកប្រើប្រាស់កីឡដ្ឋានហនុមាន វិញក្រោយកីឡដ្ឋាននេះសាងសង់រួចរាល់ មកទល់បច្ចុប្បន្ន៕