សិល្បៈជាតិ៖ គួរឱ្យកត់សម្គាល់ខ្លាំងមែនទែន បន្ទាប់ពីសម្ងំរកស៊ីស្ងាត់ៗបានមួយរយៈ ស្រាប់តែសិល្បការិនីពហុជំនាញ ខាត់ សុឃីម ចេញមកសម្ញែងទ្រព្យចុងក្រោយឱ្យបានមហាជនបានឃើញ នោះគឺរថយន្ត LeXus សេរីចុងក្រោយដែលមានតម្លៃជិត ៣០ ម៉ឺនដុល្លារដែលតម្លៃនេះគេអាចទិញបានវីឡាប្រណីតបានមួយកន្លែង។ នេះសបញ្ជាក់ថា ការងាររកស៊ីផ្ទាល់ខ្លួនរបស់អ្នកនាងទាំងផ្នែកលក់ផលិតផលថែរក្សាសម្រស់ ការលក់អចលនទ្រព្យ និងអាជីពសិល្បៈផ្នែកតន្ត្រីបុរាណសម័យ កំពុងតែរើបមានយីអ៊ុនឡើងខ្ពស់ត្រដែត។
បើគេចាំមិនខុសទេនេះ កាលពីអំឡុងឆ្នាំ ២០២០ អ្នកនាង ខាត់ សុឃីម បានបង់ខាតទ្រព្យជិត ១លានដុល្លារដែលឧកញ៉ាមួយរូបបោកយកទៅអស់ដើម្បីបោះទុនវិនិយោគអចលនទ្រព្យ និងបណ្ដាក់ភាគហ៊ុន តែចុងក្រោយគ្មានទាមទារមកវិញបានសូម្បីតែមួយ ១កាក់មួយសេន ដោយឧកញ៉ារូបនេះនិងបក្សពួកមួយចំនួនកំពុងជាប់ក្នុងការឃុំឃាំង។ នៅគ្រានោះ សារព័ត៌មានក្នុងស្រុកបានផ្សព្វផ្សាយថា អ្នកនាងលក់ផ្ទះជាច្រើនល្វែង និងលក់លៃឡុងហាងសម្អាងការ គ្រឿងសម្អាងការ ដែលអ្នកនាងខំកវែកកឆ្នាំងមករាប់សិនឆ្នាំមកហើយ ដើម្បីប្រមែប្រមូលលុយមកបង់ខាតក្នុងបោះទុនវិនិយោគនេះ។ ណាមួយទៀតគ្រានោះស្ថានភាពប្រទេសក៏ត្រូវប្រឈមជាមួយការអុកឡុកពីជំងឺកូវីដ ដែលធ្វើក្រុមហ៊ុន និងអ្នករកស៊ីមួយចំនួន ត្រូវបិទទ្វារបង់ខាតទុនមិនតិចទេ។
ដោយឡែក នៅពេលដែលប្រទេសជាតិបានធូរស្បើយខ្លះពីស្ថានភាពជំងឺកូវីដ គេស្រាប់តែឃើញអ្នកនាង ខាត់ សុឃីម បង្ហាញជំហថ្មីពីបាតដៃទទេមកវិញក្នុងការរកស៊ីលក់ផលិតផលថែរក្សាសម្រស់។ មហាជនអ្នកគាំទ្រមួយចំនួនបានស្ញើចសរសើរអ្នកនាងខាត់ សុឃីម ថាពិតជារក្សាជំហរបានរឹងមាំ មិនបាក់ទឹកចិត្ត ឬទន់ជ្រាយទោរទន់ទៅតាមយថាកម្មឡើយ ពោលគឺអ្នកនាងខំប្រឹងប្រែងក្រោកឈរផលិតកម្មវិធីប្លែកៗនៅលើបណ្ដាញសង្គមដើម្បីទាញចំណាប់អារម្មណ៍មហាជន ដូចជាកម្មវិធី «ទ្រព្យលោកពុក» ជាដើម។ នៅពេលនោះដែរ អ្នកនាងខំប្រឹង Live លក់ផលិតផង និងចេញច្រៀងផង ដើម្បីសន្សំលុយទម្រាំមានសល់ដល់សព្វថ្ងៃ។ នៅចុងឆ្នាំ ២០២១ គេបានឃើញអ្នកនាង ខាត់ សុឃីម និងក្រុមគ្រួសារចេញទៅច្រៀងនៅសហរដ្ឋអាមេរិក ហើយក្នុងឆ្នាំដដែលនោះ តារាពហុជំនាញរូបនេះបានបង្ហាញទ្រព្យគប់ចិត្តមួយយ៉ាងថ្មីសន្លាងនោះគឺ រថយន្ដទំនើបLexus Lx 570 តម្លៃជាង២០ម៉ឺនដុល្លារទិញជិះយ៉ាងរំភើយ។
បើតាមការដឹងត្រួសៗ ពេលនេះអ្នកនាង ខាត់ សុឃីម មានក្រុមហ៊ុនក្នុងដៃមួយចំនួនដូចជា ក្រុមហ៊ុនផលិតផលថែរក្សាសម្រស់ Mochy Cosmetics ក្រុមហ៊ុនដីឡូខាត់សុឃីមផ្លូវ៥១ និងក្រុមហ៊ុន ចាចា លក់គ្រឿងសង្ហារឹម ដែលទើបសម្ពោធថ្មោងថ្មី រួមទាំងក្រុមវង់ភ្លេងបុរាណខ្មែរត្រកូលខាត់ជាដើម។ ទោះជាកន្លងមក អ្នកនាង ខាត់ សុឃីម រងការប្រមាថពីមាត់អ្នកដទៃ ប៉ុន្តែពេលនេះអ្នកនាងបានធ្វើឱ្យគ្រប់គ្នាភ្លឺភ្នែកថា ការខិតខំប្រឹងណាស់ ទើបគឺជាការបង្កើតឱកាសលាភសំណាងឱ្យមនុស្សដែលចេះតស៊ូក្នុងជីវិត។ ក្រៅពីបង្ហាញរថយន្តLexus Lx 600 ពណ៌ខ្មៅដែលអ្នកនាង ខាត់ សុឃីម ទិញជិះហើយនោះ អ្នកនាងក៏បានសម្ញែងផ្ទះមួយល្វែងកំពស់ ៣នាន់ ដែលគេជឿថា អាចជាក្រុមហ៊ុនឬឃ្លាំងស្ដុកអីវ៉ាន់របស់ក្រុមហ៊ុនអ្នកនាង។ ហើយមហាជនភាគច្រើនជឿជាក់ទៀតថា ពេលនេះអ្នកនាង សុឃីម ពិតជាមានលុយមិនធម្មតាមែន អាចនិយាយបានថា អ្នកនាងបានកែប្រែជីវិតពីដុនដាបឱ្យក្លាយជាសេដ្ឋីនីម្ដងទៀតដោយសោយសុខលើគំនទ្រព្យ។
ទន្ទឹមជាមួយការសម្ញែងរថយន្ត Lexus Lx 600 នេះ តារាស្រីពហុជំនាញត្រកូលខាត់រូបនេះក៏បានបង្ហើបដំណឹងថា ខ្លួនកំពុងត្រៀមចាកចេញទៅកាន់សហរដ្ឋអាមេរិករយៈពេល៣សប្ដាហ៍ ដើម្បីជួបជុំម្ដាយនិងប្អូនស្រីដែលកំពុងរស់រកស៊ីនៅទីនោះផង និងឆ្លៀតច្រៀងសម្ដែងសិល្បៈពេលខ្លីដើម្បីកើបលុយបន្ថែមផង។ ហើយតាមដំណឹងពីអ្នករស់នៅសហរដ្ឋអាមេរិកបានឱ្យដឹងថា ផលិតផលថែរក្សាសម្រស់ Mochy Cosmetics របស់អ្នកនាងខាត់ សុឃីម កំពុងតែមានទីផ្សារត្រូវប៉ាន់ខ្លាំងនៅទីនោះផងដែរ៕
