ក្រុមបាល់ទាត់ភ្នំពេញក្រោន ដែលជាម្ចាស់ជើងឯកពានរង្វាន់លីគកំពូលកម្ពុជា Cambodian Premier League 2022 នឹងតំណាងឱ្យកម្ពុជា ទទួលជើងខ្លាំង Young Elephants នៃពានរង្វាន់ជើងឯកកម្រិតទី២ប្រចាំទ្វីបអាស៊ី គឺ AFC Cup រដូវកាលឆ្នាំ២០២៣-២៤ ក្នុងកូតាវគ្គជម្រុះបឋម នៅថ្ងៃទី១៦ ខែសីហា កីឡដ្ឋាន Smart RSN។
គ្រូ Young Elephants លោក Satysagara ញញើតកីឡាករ២នាក់របស់ភ្នំពេញក្រោន៖
វគ្គជម្រុះបឋមប្រចាំតំបន់អាស៊ាន នេះហៅថា Preliminary ដែលមាន២គូ ត្រូវប្រកួតនៅថ្ងៃទី ១៦ ខែសីហា ឆ្នាំ២០២៣ ក្នុងនោះ៖
គូទី១៖ ភ្នំពេញក្រោន (កម្ពុជា) ប៉ះ Young Elephants (ឡាវ)
គូទី២៖ Yangon United (មីយ៉ាន់ម៉ា) ប៉ះ Kasuka (ប្រ៊ុយណេ)
វគ្គជម្រុះ Play Off Round នឹងធ្វើឡើងនៅថ្ងៃទី២៣ ខែសីហា ឆ្នាំ២០២៣ ដោយ៖
គូទី១៖ Tampines Rovers (សិង្ហបុរី) ប៉ះ អ្នកឈ្នះរវាង ភ្នំពេញក្រោន និងYoung Elephants
គូទី២៖ PSM Makassar (ឥណ្ឌូណេស៊ី) ប៉ះ អ្នកឈ្នះរវាង Yangon United និង Kasuka
ក្នុងនាមជាម្ចាស់ផ្ទះក្រុមនៅរាជធានីភ្នំពេញ មួយនេះអាចលក់សំបុត្រអោយអ្នកគាំទ្របានតែនៅតំបន់ RSN Stand (តំបន់មានកៅអី) ប៉ុណ្ណោះ ចំណែក៣ផ្នែកផ្សេងទៀតមិនទាន់ស្របតាមការកំណត់ របស់សហព័ន្ធបាល់ទាត់អាស៊ី (AFC)។
សេចក្តីបញ្ជាក់របស់ក្លិបភ្នំពេញក្រោន លើហ្វេសប៊ុករបស់ខ្លួននៅថ្ងៃទី១៤ ខែសីហា ឆ្នាំ២០២៣ ពោលគឺ២ថ្ងៃមុនការប្រកួត ក្លិបបញ្ជាក់ថា៖«សំបុត្រទស្សនាការប្រកួត AFC Cup 2023-24 រវាងក្រុមភ្នំពេញក្រោន និងក្រុម Young Elephants មានចំនួនកំណត់ត្រឹមតែ RSN Stand (តំបន់មានកៅអី) តែប៉ុណ្ណោះ»។
សំបុត្រនៃការប្រកួតនេះបានដាក់លក់នៅ៖
១. លើ App របស់ LIVE. by Wonderpass (សម្រាប់អ្នកដែលបានទិញសំបុត្រប្រភេទទី២រួចហើយគឺនឹងត្រូវប្តូរទៅប្រភេទទី១ វិញដោយមិនទាមទារការចំណាយបន្ថែមនោះទេ)
២. កីឡដ្ឋាន ស្មាត អ អេស អិន Smart RSN Stadium ចាប់ពីថ្ងៃទី១៥ ខែសីហា ឆ្នាំ២០២៣ វេលាម៉ោង ៩.០០ ព្រឹក។
ក្លិបបានបញ្ជាក់ពីមូលហេតុដែលខ្លួនមិនអាចលក់សំបុត្រនៅ៣ច្រកជុំវិញកីឡដ្ឋាន Smart RSN ថា៖«ការកំណត់នេះដោយសារតែ AFC មានលក្ខខណ្ឌតម្រូវឲ្យក្លិបម្ចាស់ផ្ទះត្រូវមានរចនាសម្ព័ន្ធគ្រប់គ្រាន់ ខណៈដែល ភ្នំពេញក្រោន បានបញ្ជាទិញកៅអីសម្រាប់បំពាក់នៅ Stand ទាំងបីទៀតរួចរាល់ហើយប៉ុន្តែមិនទាន់អាចដំឡើងបានទាន់ពេលវេលានោះទេ»។
អ្នកឈ្នះរវាង ភ្នំពេញក្រោន ទល់នឹង Young Elephants នឹងមានឈ្មោះឡើងទៅជួបក្រុម Tampines Rovers របស់សិង្ហបុរី ក្នុងវគ្គPlay-off round មុនឡើងដល់វគ្គចែកពូល៕