សិល្បៈជាតិ៖ ការប្រកួត Miss Grand Cambodia ឆ្នាំ ២០២៣ បានឈានដល់វគ្គប្រកួតឈុតតំណាងជាតិហើយ ក្នុងនោះដែរ មហាជនអ្នកគាំទ្រជាច្រើនបានចោលក្រសែភ្នែកចាប់អារម្មណ៍ទៅលើឈុតអាគមពណ៌ខ្មៅចំនួន៣ខេត្ត ដែលបានដាស់ជំនឿបែបអរូបិយ ឱ្យសណ្ដំវិញ្ញាណអ្នកទស្សនាព្រឺព្រួចគ្រប់គ្នា។ ដើម្បីជាក់ច្បាស់ថាមានឈុតណាខ្លះនោះ តស់! មកតាមដានទាំងអស់គ្នា៖
១-អ៊ិន លក្ខិណា- Miss Grandប៉ៃលិន ៖ ឈុត«ដែនដីនៃមន្តអាគម»
ខេត្តប៉ៃលិន ជាខេត្តសាសនាមួយដែលមានរឿងអាថ៌កំបាំង ជាច្រើនមានជំនឿប្លែកៗ រួមទាំងមន្តអាគម..។ ឈុត National Costume មួយបែប Fashionដែលត្រូវជ្រើសរើសយកពណ៌ខ្មៅមកធ្វើជាឈុត និយាយអំពីត្បូងនិលស្រោបមាស រឺនិលបើកភ្នែក រួមផ្សំជាមួយនឹងយន្តខ្មែរ ៨ទិស ដើម្បីបង្ហាញឱ្យឃើញពីការចារលើខ្លួនដែលខ្មែរមានតាំងពីយូរណាស់មកហើយ មានលក្ខណៈខុសគ្នាជាច្រើនបែបទៅតាមប្រភេទយ័ន្តដើម្បីការពារខ្លួនពីសត្រូវ ឬអមនុស្ស។ ថាមពលនៃផ្លូវងងឹត អាថ៌កំបាំង មន្តសណ្ដំនៃកែវភ្នែក ការជឿជាក់ ភាពជាម្ចាស់ឥទ្ធិពលដែលស្ត្រីមាន បង្ហាញទាំងអស់នៅក្នុងឈុតតែមួយ ទៅសណ្ដំចិត្តឱ្យមនុស្សគ្រប់គ្នាងាកមកចាប់អារម្មណ៍មើលត្បូងនិលដែលកែច្នៃរួចហើយ។ តំឡើងឈុត និងច្នៃ៖ ស្គរគ្រាប់ ។
២-ប៊ុន លក្ខណា- Miss Grand ខេត្តត្បូងឃ្មុំ ៖ «ក្របីស្នាទៈប្រក់ពល»
កាលពីដើមនៃសម័យកាលមុន មុនប្រជាជនខ្មែរមានជំនឿលើរឿងមន្តវិជ្ជា គ្រូអាគមជាពិសេសប្រភេទគ្រូធ្មប់ ដែលមានមន្តវិជ្ជាការខាងខាបហៅសត្វក្របីឫសត្វគោដើម្បីធ្វើពិធីផ្សេងៗដូចជា សម្រាប់ធ្វើទ័ព ការពារស្រុកភូមិ កំចាយពួកចោរប្លន់អ្នកស្រុក និងសត្រូវឈ្លានពានខេត្ត នៅក្នុងមន្តវិជ្ជាខ្មៅនៃត្រកូលគ្រូនោះគេតែងតែប្រើនៃសត្វក្របី ស្នែងកោងស្រួច គួចក្រយៅខ្នង ចំណងដោយខ្សែសីមា ចារជាយ័ន្ត ជាន់នៅលើស្មា ប្រើស្នាបាញ់ជាអាវុធ ក្រៅពីក្របីអាគមហើយគ្រូធ្មប់នោះនៅមានបរិវាជាច្រើនទៀតបូករួមទាំង ព្រាយហោះព្រាយហើរ ព្រាយបណ្ដើរកូនខ្ចី ស្រីខ្មៅសំពោងសក់ធំ ប្រជុំដោយគ្រឿងដង្វាយថ្វាយដល់វិញ្ញាណនៃអាណាចក្រមន្តអាគម ដើម្បីសម្រេចនៃពិធីទាំងមូលឱ្យជោគជ័យក្នុងក្បួនប្រយុទ្ធ…។ ដោយឡែកបច្ចុប្បន្នមន្តវិជ្ជាការខ្មៅនេះមានគេប្រើទៅជារបៀបការពារអាសនៈ គេទៅវិញហៅឈ្មោះមន្តអាគមនេះថា( ស្នឹងស្នែងស្នាទៈ) ។ រចនាឈុតដោយ ៖ រាជិនីនំបញ្ចុកខេត្តត្បូងឃ្មុំ គូររូបដោយ៖ គីម ម៉ឹស រៀបចំឈុតដោយ៖ មីតសំអាងការខ្មែរឥស្លាម ៖ សរសេរអត្ថបទដោយ៖ វង្ស មុនីរយដាវសាវឌី។
៣-ស៊ូ ស្រីនីត- Miss Grand កំពង់ធំ ៖ ឈុត«មន្តអាគមនៃយន្តខ្មែរ»
ខេត្តកំពង់ធំ គឺជាអតីតរាជធានីខ្មែរនាសម័យចេនឡា ហៅថា ឥសានបុរៈ និងជាខេត្តមួយស្ថិតនៅចំកណ្ដាលនៃព្រះរាជាណាចក្រកម្ពុជា ដែលត្រូវបានគេទទួលស្គាល់ថា ជាប្រទេសដែលមានអរិយធម៌ដ៏រុងរឿង និងមានភាពចំណាស់ជាងគេនៅក្នុងភូមិភាគអាស៊ីអាគ្នេយ៍។ បើនិយាយអំពីជំនឿសាសនាវិញ បុព្វបុរសខ្មែរមានប្រើមន្តអាគមតាំងមុនសម័យមានជំនឿលើព្រហ្មញ្ញសាសនា និងព្រះពុទ្ធសាសនាហូរចូលមកម្ល៉េះ ដែលនេះជាមរតកដ៏មានតម្លៃរបស់ដូនតាខ្មែរបានបន្សល់ទុកឱ្យកូនចៅជំនាន់ក្រោយ។ ឈុតមានចង់បង្ហាញអំពីមន្តអាគមខ្មែរ ដែលមានដូចជា ៖ អាវតេជៈ កន្សែងយ័ន្ត សាក់ខ្លួន កថា អាថ័ន អាព័ទ្ធ មន្តសណ្ដំ បំបាំងកាយ មេចាយ មហាសង្កំ មហារំអិល ធ្មប់ កូនក្រក ជាដើម។ ខ្មែរបុរាណមុនពេលចេញធ្វើសឹកសង្គ្រាម ខ្មែរតែងតែមានជំនឿលើមន្តអាគម ដោយជឿថា ជាការផ្ដល់នូវឥទ្ធិពល អំណាច ភាពក្លាហាន បំបាត់ភាពភ័យខ្លាចអាចតតាំងយកជ័យជម្នះលើសត្រូវ។ រចនា៖ អម្រុង រ័ត្ន និងគូររូប៖ ផានិត។