សិល្បៈជាតិ៖ បើទោះបីជា ការប្រកួត Miss Grand Cambodia 2023 បានបញ្ចប់ក៏ពិតមែន ប៉ុន្តែមហាជននៅតែដក់អារម្មណ៍ជាប់ជាមួយឈុតតំណាងជាតិក្នុងឆ្នាំនេះ ដែលបានរចនាម៉ូដឡើងប្រណីតភាព និងគួរឱ្យគយគន់ជាទីបំផុត។ តស់! ថ្ងៃនេះយើងមករំលឹកអំពីឈុតតំណាងជាតិទាំង ៨ ដែលបាន រចនាបែបសហសម័យលំនាំរឿងព្រេង និងទេវកថាដូចតទៅ៖
1-កុយ អេនណា – Miss Grand ក្រចេះ៖ ឈុត «អំណាចស្ដេចគ្រុឌក្រចេះក្រុង»
ស្ដេចគ្រុឌ ត្រូវបានប្រជាជនខ្មែរស្គាល់ថាជាសត្វក្នុងទេវកថា ដែលមានឫទ្ធានុភាព យ៉ាងខ្លាំងខ្លាបំផុតមួយក្នុងចំណោមសត្វអាទិទេព ផ្សេងទៀត ហើយមានដំណាលថាជាសត្រូវជាមួយពស់នាគរាជផងដែរ។ ដោយមើលឃើញពីសក្ដានុពលពី អង្គទេវនេះ ទើបយោងតាមប្រកាសលេខ 2040 ប្រ.ក ចុះថ្ងៃទី 7 ឧសភា ឆ្នាំ2018 ស្ដីពីការបង្កើតនិងដាក់រូប គ្រុឌ និងនាគ ជានិមិត្តសញ្ញាតំណាងខេត្តក្រចេះនេះផ្ទាល់តែម្ដង។ ក្នុងនោះ តួអង្គគ្រុឌតំណាងឱ្យសភាវៈល្អ គ្រប់គ្រងដែនដី ក្លាហានការពារធម្មជាតិ និងខ្យល់។
នាគ៖ តំណាងឱ្យភាពត្រជាក់ត្រជុំ គ្រប់គ្រងព្រះភិរុណ និងព្រះអគ្គី។ ពណ៌មាស ៖ តំណាងឱ្យភាពសម្បូររុងរឿង។ ពណ៌បៃតង ៖ តំណាងឱ្យការអភិវឌ្ឍនិង មោទកភាព។ រចនានិងតំឡើងដោយ ៖ គឹម សាម៉ុន គូររូប៖ សៀង វាសនា។
2- ហេង កនិកា – Miss Grand តាកែវ ៖ ឈុត «ចៅស៊ីផាន់»
រឿងរាមកេរ្តិ៍ គឺជាស្នាដៃដ៏ល្បីល្បាញក្នុងប្រវត្តិសាស្ត្រនៃអក្សរសិល្ប៍ខ្មែរ ។ រឿងរាមកេរ្តិ៍ សិល្បករបានបង្កើតជានូវសិល្បៈនានាជាច្រើនតាមរយៈតួអង្គ ផលិតបានជា របាំល្ខោនខោល ល្ខោនស្បែក មានខ្មុក មានចម្លាក់ជាដើម…។ល។ តួយ៉ាង តួអង្គ « ចៅស៊ីផាន់ » ជាឈ្មោះតួអង្គមួយនៅក្នុងរឿងរាមកេរ្តិ៍មានលក្ខណៈរាងខ្លួនជាសត្វមាន់ រីឯក្បាលជាយក្ស ជាបុត្រារបស់ក្រុងរាពណ៍ កាលរាពណ៍ទៅស្រឡាញ់គ្នាជាមួយនឹងមាន់។ ឈុតនេះយើងឆ្នៃឡើងដោយរំលេចនូវក្បូរក្បាច់រចនាបថតាមគំនូរចម្លាក់ប្រាសាទនានា មានមុខខ្មុកជាដើម រួមបញ្ចូលគ្នាតែមួយ សបង្ហាញពីភាពសម្បូរបែបនៃសិល្បៈខ្មែរយើងដែលដូនតាបានបន្សល់ទុកដល់យើងសព្វថ្ងៃនេះ ។ ឈុតនេះរចនាដោយក្រុមក្មេងវត្ត។
3-ប៉ោ លីនណា – Miss Grand ស្វាយរៀង៖ ឈុត «រាជសីហ៍សិរីក្រុងកម្ពុជាធិបតី»
រាជសីហ៍តំណាងក្សត្រ ដែនដីខេមរាក្រុងកម្ពុជ ជាសត្វមានរិទ្ធិតេជោសមស័ក្ដិ គ្រងរាជបុរៈតាំងប្រសើរថ្លៃ។ ហត្ថាទាំងទ្វេតាំងព្រះខ័នរាជ្យសុខសាន្ដតេជោអំណរ ដឹងគុណខ្ពង់ខ្ពស់ដល់ព្រះនគរ ក្សត្រាជំហរគ្រងរាជបុរី។ រាជសីហ៍គឺជាសត្វមានរិទ្ធអំណាចខ្លាំងពូកែមានអនុភាពលើសសត្វដ៏ទៃៗ ដោយមើលឃើញរាជតេជះ សីហ៍ទើបព្រះមហាក្សត្រខ្មែរជ្រើសតាំងយកដាក់ក្នុងព្រះសឹង្គា នៃទង់ព្រះមហាក្សត្រនៃយើងតំណាងឱ្យអង្គក្សត្ររក្សាទឹកដី។ ចំនែកគុបភ្លើងកាន់ក្នុងដៃ តំណាងឱ្យការរង់ចាំអស់រយៈពេល64ឆ្នាំក្នុងការ ធ្វើជាម្ចាស់ផ្ទះSEAGAME ឆ្នាំ២០២៣ ដោយឡែកភ្លើងអគ្គីជ័យក៏ត្រូវបានប្រទានដោយព្រះមហាក្សត្រ នៃយើងជាមហាកិត្តិយសប្រសើរក្រៃលែងបំផុត។ ច្នៃម៉ូតនឹងតំឡើងដោយ៖ លោក លី សុភក្ត្រារដ្ឋហ្វូង និងគូររូបដោយ៖ Maxime Grayson (ម៉ាហ្សីមី ហ្គាយស៊ុន)។
4- វ៉ាត ចិន្តា – Miss Grand បន្ទាយមានជ័យ៖ ឈុត «ល្ខោនស្រមោល»
ល្ខោនស្រមោលស្បែកមាន ២ ប្រភេទ គឺល្ខោនស្បែកតូច និងល្ខោនស្បែកធំ។ ល្ខោនស្បែកតូចជាចម្លាក់ដែលឆ្លាក់នៅលើស្បែកគោ មានទំហំតូចៗ ហើយជាប្រភេទសិល្បៈប្រជាប្រិយ មានលក្ខណៈសម្ដែងរឿងជាច្រើន ដូចជារឿងនិទាន រឿងប្រវត្តិសាស្ត្រ ឬទាក់ទងនឹងបច្ចុប្បន្នភាពសង្គមទៀតផង។ វាជាចម្លាក់ដែលធ្វើចលនាកម្រើកបាន ដូចជាការលើកដៃ លើកជើង ឬហាមាត់និយាយ និងច្រៀងរាំបានផងដែរ។
ដោយឡែកល្ខោនស្បែកធំ ជាប្រភេទសិល្បៈសក្ការៈ មានទំហំធំ ដែលសម្ដែងមានលក្ខណៈហ្មត់ចត់ ស្រគត់ស្រគំ សម្ដែងរឿងសាសនា (សម្ដែងតែរឿងរាមកេរ្តិ៍មួយគត់)។ ល្ខោនស្រមោលស្បែកធំ មានដើមកំណើតប្រហែលកើតឡើងមុនសម័យអង្គរ ដោយយោងតាមសិលាចារឹកលេខ K.១៥៥ នៅគោករកា នៅស.វទី ៩ ហើយត្រូវបានបញ្ចូលជាសម្បត្តិបេតិកភណ្ឌវប្បធម៌អរូបិយនៃមនុស្សជាតិនៅថ្ងៃទី ២៥ វិច្ឆិកា ២០០៥។ ឈុតនេះត្រូវបានតំឡើង និងកែច្នៃឡើងក្នុងបំណងជួយផ្សព្វផ្សាយ និងលើកតំឡើងល្ខោនស្រមោលស្បែកទៅកាន់ពិភពលោក ម៉្យាងទៀតដើម្បីឱ្យកូនខ្មែរជំនាន់ក្រោយបានស្គាល់ និងចូលរួមអភិរក្សសិល្បៈរបស់ជាតិសាសន៍ខ្លួន។ តំឡើងឈុតដោយ៖ លោក សាយ ធារ៉ា គូររូបដោយ៖ លោក អាន សាមួន
5-ម៉ៅ ប៊ុនស័ករង្សី- Miss Grand ព្រះវិហារ ៖ ឈុត «អាទិទេពសុវណ្ណ ព្រះស្រីសិខរីស្វរៈ»
ឈុតដែលកំពុងបង្ហាញឡើងក្នុងទម្រង់ជាទេពអប្សរ ទ្រង់គ្រឿងអម្ពរ ព្រះកាយពណ៌មាសឆ្អិន នាកណ្ដាលនៃស្រទាប់បុស្បាយ៉ាងធំសម្បើម ប្រកបដោយពន្លឺចែងចាំងនារាត្រីកាល យ៉ាងអំណាច ប្រកបដោយទឹកមុខស្រទន់ មោះមុត យ៉ាងក្រៃលែង ដែលប្រដូចនឹងអង្គប្រាសាទព្រះវិហារ ដែលកំពុងឈរបង្អួតប្រាណនៅតាមបណ្ដោយនៃជួរភ្នំដងរែកនៃខេត្តព្រះវិហារ ដែលហាក់ដូចជាកំពុងតែដង្ហោយហៅ ការចាប់អារម្មណ៍នៃប្រជាជនខ្មែរទាំងឡាយឱ្យកាន់តែយកចិត្តទុកដាក់លើសម្បត្តិវប្បធម៌ដ៏មានតម្លៃដ៏មហាសាលមួយនេះ ហើយតែងតែស្ថិតនៅក្នុងក្រអៅបេះដូង រហូតតទៅ ។ រចនានិងតំឡើងដោយ ៖ គឹម សាម៉ុន។
6-ម៉ែន ណងនិត – Miss Grand ព្រះសីហនុ ៖ ឈុត «សុវណ្ណទេពីមុន្នីសាគរ»
អ្នកការពារដែនសមុទ្រ បានរចនាច្នៃប្រឌិតឡើងក្រោមទម្រង់នៃតួអង្គទេពី មួយអង្គ ជាតំណាងឱ្យអ្នកឃុំគ្រង ថែរក្សាដែនទឹក ព្រមទាំងបានផ្តល់នូវវារិដែលមិនចេះរីងស្ងួតដល់សព្វសត្វ ក្នុងការរស់រានមានជីវិតនៅលើដែនប្រឹថពីពសុន្ធរានេះ ជាងនេះទៅទៀតព្រមទាំងបានពាំនាំភោគទ្រព្យដ៏មានតម្លៃ ជាប្រភពនៃអាហារ និងការប្រើប្រាស់ផ្សេងៗ ផ្តល់ជាសំណើមដល់ភាវៈមានជីវិតទាំងឡាយលើផែនដី នេះតាមដំណើរនៃវដ្ដសន្ធិដែលមិនចេះឈប់។
តាមរយៈឈុតពស្ត្រនេះ បានតំណាងជាសំឡេងប្រៀបដូចមហាវារិ ដែលជាមគ្គមួយដ៏ត្រកាលដែលបានតំណាងនូវការតភ្ជាប់ពីទ្វីបមួយទៅកាន់ទ្វីបមួយទៀតនៅលើសកលលោកយើងនេះបង្កើតបានជាចក្រវាឡ និងសព្វសត្វ។ នៅទីណាៗ មហាវារិ ដ៏មានគុណូបការៈដ៏មានតម្លៃ សម្រាប់ជីវិត ទោះជាស្ថិតនៅទីណាៗ ក្នុងការចាប់បដិសន្ធិក្រោមការតាក់តែង នៃធម្មជាតិ បុថុជ្ជនគ្រប់ៗរូបសុទ្ធតែមានតម្លៃ និងសេចក្តីថ្លៃថ្នូរក្នុងនាមជាមនុស្សជាតិមួយរូបដ៏ប្រពៃ។ សូមបញ្ឈប់នូវការរើសអើងភេទ ចាប់ពីពេលនេះតទៅ មនុស្សពុំអាចជ្រើសរើសយោនយកកំណើត ប៉ុន្តែមនុស្សអាចជ្រើសរើសបដិបទា ជាបែបណាក្នុងសង្គមជាតិ។
7-ចន កនីកា – Miss Grand សៀមរាប៖ ឈុត «ឈុតអប្សរាស្រីសួគ៌»
ដកស្រង់ចេញពីកំពូលបាកាននៃប្រាសាទអង្គរវត្តដែលជាទីកន្លែងអច្ឆរិយសំណង់គ្មានពីរក្នុងលោក។ ឈុតស្រីសួគ៌ នាចម្លាក់នៃប្រាសាទអង្គរវត្ត ស្ថាបត្យកម្ម អស្ចារ្យ នាសតវត្សទី១២ របស់ព្រលឹងជាតិខ្មែរ ជារចនាបថ ស្រីសួគ៌ ១ក្នុងចំណោម រចនាបទ ស្រីសួគ៌ទាំង១១០០ នៃប្រាសាទអង្គរវត្ត ដ៏ល្បីល្បាញ ទូទាំងពិភព របស់ជនជាតិខ្មែរ ដែលត្រូវបានជ្រើសតាំង មករំលេចចេញពីភាពអស្ចារ្យ ប្រណិត នឹងស៊ីវិល័យ នៃជនជាតិខ្មែរគ្រប់សម័យកាល។ ទាំងនេះជាមោទកភាពជាតិ របស់យើងជាអ្នកស្នងតំណែងបន្ត ពីមរតកជាតិ នៃជនជាតិយើងទាំងអស់គ្នា ។ តំឡើងនិងរចនា ចំប៉ីស – Nora costumes។
8- រិទ្ធី សុមនាមរកដ- Miss Grand មណ្ឌលគិរី ៖ ឈុត «ព្រះរាជធីដានង្គ័លជ័យ»
ព្រះរាជពិធីបុណ្យច្រត់ព្រះនង្គ័លមានតាំងពី បុរាណនៅក្នុងទំនៀមទម្លាប់ខ្មែរ។ ពិធីនេះតែងប្រារព្ធឡើងនៅថ្ងៃ ៤រោច ខែពិសាខ ជារៀងរាល់ឆ្នាំ ចំណែកនៅក្នុងគម្ពីរបាលីហៅថា វប្បមង្គល មានន័យថា «មង្គលសាបព្រោះបណ្ដុះដាំ» ដែលជាព្រះរាជពិធីសំខាន់មួយក្នុងចំណោមព្រះរាជពិធីសំខាន់ៗប្រចាំឆ្នាំ។
អត្ថន័យនៃព្រះរាជពិធីនេះ ត្រូវបានអ្នកជំនាញវប្បធម៌ខ្មែរលើកឡើងថា ច្រត់ព្រះនង្គ័ល ជាមង្គលចម្រើននៃការសាបព្រោះបណ្ដុះដាំក្នុងរដូវភ្លៀងរបស់ប្រជាជនព្រះរាជពិធីនេះធ្វើឡើងដើម្បីផ្សងមើលប្រផ្នូលក្នុងស្រុកទៅតាមការទស្សន៍ទាយដោយផ្អែកសំខាន់លើតួអង្គ “គោឧសភរាជ” នៅពេលដែលតួអង្គគោឧសភរាជដោះចេញរួចឱ្យផឹកនិងស៊ីអាហារចំនួនប្រាំពីរយ៉ាងដែលរៀបដាក់នឹងតុប្រាក់ធំៗ តាំងនៅទីមុខព្រះពន្លា ដែលមានដូចជាគ្រាប់សណ្ដែកមួយតុ គ្រាប់ពោតមួយតុ គ្រាប់ស្រូវមួយតុគ្រាប់ល្ងមួយតុនឹងទឹកមួយតុព្រះរាជពិធីបុណ្យនេះប្រារព្ធឡើងដើម្បីប្រកាសពីដំណើរមកដល់នៃរដូវធ្វើស្រែចម្ការរបស់ប្រជារាស្ត្រក្នុងនគរ និងដើម្បីផ្សងប្រផ្នូលពីភោគផលកសិកម្មនាឆ្នាំខាងមុខគោលបំណងនៃឈុតនេះគឺចង់អោយពិភពលោកនឹងយុវជនជំនាន់ក្រោយបានស្គាល់ពីពិធីបុណ្យព្រះនង្គ័លបូករួមនឹងការលើកស្ទួយវិស័យកសិកម្មនៅប្រទេសកម្ពុជាផងដែរ។ ច្នៃឈុតដោយ៖ Piseth sb design។
