ការប្រកួតពានរង្វាន់លីគកំពូលកម្ពុជា Cambodian Premier League បានឈានដល់សប្តាហ៍ទី៤ ហើយ ដោយនៅរសៀលថ្ងៃទី២៧ ខែសីហា ឆ្នាំ២០២៣ នេះ មានការប្រកួត ៤គូពិសេស នៅ៤ទីលានផ្សេងគ្នា ខណៈមាន២គូ នឹងប្រកួតដំណាលគ្នានៅពេលរសៀល និង២គូទៀតនឹងប្រកួតនៅពេលយប់។
កម្មវិធីការប្រកួតនៅថ្ងៃទី២៧ ខែសីហា ឆ្នាំ២០២៣៖
- អង្គរថាយហ្គឺរ ប៉ះ កងយោធពលខេមរភូមិន្ទ ម៉ោង ៣ៈ៤៥ នាទីរសៀល នៅកីឡដ្ឋានហនុមាន (ខេត្តសៀមរាប)
- គិរីវង់សុខសែនជ័យ ប៉ះ ព្រៃវែង អេហ្វស៊ី ម៉ោង ៣ៈ៤៥ នាទីរសៀល នៅកីឡដ្ឋានគិរីវង់ (ខេត្តតាកែវ)
- ណាហ្គាវើលដ៍ ប៉ះ ភ្នំពេញក្រោន ម៉ោង ៦ៈ០០ នាទីយប់ នៅកីឡដ្ឋានខេត្តកំពង់ស្ពឺ
- បឹងកេត ប៉ះ វិសាខា ម៉ោង ៦ៈ០០ នាទីយប់ នៅពហុកីឡដ្ឋានជាតិ(អូឡាំពិក)។
លទ្ធផលការប្រកួតថ្ងៃទី២៦ ខែសីហា ឆ្នាំ២០២៣
ចំណាប់អារម្មណ៍គ្រូបង្វឹករបស់វិសាខា
ក្លិបបាល់ទាត់វិសាខា នឹងជួបជាមួយក្លិបបាល់ទាត់បឹងកេត នៅល្ងាចថ្ងៃនេះ សម្រាប់សប្ដាហ៍ទី៤ ក្នុងពហុកីឡដ្ឋានជាតិអូឡាំពិក វេលាម៉ោង ៦:០០នាទីល្ងាច ខណ:មុនការប្រកួតមកដល់ លោក Simon Mcmenemyគ្រូបង្វឹកក្លិបបាល់ទាត់វិសាខា បានបង្ហាញចំណាប់អារម្មណ៍ ក្នុងសន្និសិតសាព័ត៌មាននៅល្ងាចថ្ងៃទី២៦ សីហា។
លោក Simon Mcmenemy បាននិយាយមុខប្រកួតថ្ងៃស្អែកថា៖ «ការប្រកួតនេះ គឺជាជំនួបដ៏តានតឹងមួយ ។ ទោះបីជាពួកយើងបានចាប់ផ្ដើមល្អសម្រាប់ ៣ប្រកួតដំបូង តែការប្រកួតនេះ កាន់តែលំបាកថែមទៀត ដោយសារគោលបំណងរបស់យើង ត្រូវរក្សាចំណាត់ថ្នាក់កំពូលតារាង។ អ៊ីចឹងវាជាការប្រឈមមួយ ព្រោះបឹងកេត ក៏ជាក្រុមល្អមួយដែរ»។
គ្រូបង្វឹក មានវ័យ សញ្ជាតិស្កុតឡេនរូបនេះ បានបន្តថា៖«ទោះពួកយើងធ្លាប់លេងមិត្តភាពជាមួយពួកគាត់ ២/៣ប្រកួតក៏ដោយ ក៏យើងមើលឃើញបឹងកេត ជាបេក្ខភាពប្រកួតប្រជែងមួយដ៏លំបាក ដោយសារពួកគាត់មានកីឡាករល្អ ពិសេសគ្រូល្អ ។ ដូច្នេះមានន័យថា ថ្ងៃស្អែក គឺជាការប្រកួតដែលយើងត្រូវតែលេងឲ្យខ្លាំងអស់ពីលទ្ធភាព ដើម្បីរក្សាតំណែងកំពូលតារាងរបស់យើង»។
គួរឱ្យដឹងថា ពានរង្វាន់លីគកំពូលកម្ពុជា Cambodian Premier League រដូវកាល ២០២៣-២៤ មាន១០ក្រុមចូលរួម ដោយក្រុមទាំង១០ ប្រើប្រាស់រូបមន្តប្រកួតវិលជុំសន្សំពិន្ទុចំនួន៣ជុំ ដោយក្រុមលេខ១ដល់លេខ៤មានឈ្មោះឡើងទៅជុំបន្ត ខណៈការប្រកួតរដូវកាល ឆ្នាំ២០២៣-២០២៤ នេះនឹងដំណើរការដល់ខែឧសភា ឆ្នាំ២០២៤៕