សិល្បៈអន្តរជាតិ៖ អ្នកដឹកនាំភាពយន្តភាគ «Moving» បានទម្លាយមូលហេតុពិសេសដែលលោកតម្រូវឱ្យតួឯកប្រុសស្រី (Jo In Sung និង Han Hyo Joo) ថតឈុតឆាកថើបគ្នាតែនៅឱកាសពិសេសៗនិងថ្ងៃបុណ្យសំខាន់ៗ។
កាលពីពេលថ្មីៗនេះវីដេអូសម្ភាសន៍ Han Hyo Joo និង Jo In Sung ត្រូវបានបង្ហោះចែករំលែកនៅលើបណ្ដាញសង្គម Youtube របស់ឆាណែល Harper’s Bazaar កូរ៉េ។ អ្វីដែលគួរឱ្យចាប់អារម្មណ៍នៅពេលដែលតួឯកស្រី Han Hyo Joo រំលឹកអនុស្សាវរីយ៍ក្នុងពេលថតភាពយន្តភាគនេះ។ តារាស្រីរូបនេះបានលើកឡើងថារឿងភាគនេះជាភាគវែងមានរហូតដល់ទៅ២០ភាគ ដូច្នេះពួកគេចាប់ផ្ដើមថតតាំងពីរដូវក្ដៅឆ្នាំចាស់ហើយបញ្ចប់នៅរដូវក្ដៅឆ្នាំថ្មី។ «ពួកយើងទាំងអស់គ្នាត្រូវចំណាយពេលវេលាជាមួយគ្នាទាំងថ្ងៃបុណ្យ Christmas និង ថ្ងៃបុណ្យចូលឆ្នាំថ្មី។ អ្នកដឹកនាំប្រហែលជាគិតថាពួកយើងគ្រប់គ្នាសមនឹងទទួលបានអារម្មណ៍រីករាយក្នុងថ្ងៃបុណ្យ Christmas។ គាត់ស្នើសុំឱ្យក្រុមការងារលេងហ្គេម Secret Santa ដូច្នេះពួកយើងបានលេងហ្គេមនេះពេញរយៈពេល១សប្ដាហ៍។ ពេលនោះម្នាក់ៗរីករាយណាស់»។ Jo In Sung ក៏ពេញចិត្តដែរចំពោះរឿងនេះលោកបាននិយាយថា៖ «ពួកយើងស្និតស្នាលនឹងក្រុមការងារដោយសារតែការលេងហ្គេមនោះ» ចំណែក Han Hyo Joo បានលើកឡើងដែរថា «នៅថ្ងៃបុណ្យ Christmas និងនៅថ្ងៃទី៣១ធ្នូ និងថ្ងៃទី១មករា ពួកយើងនៅកន្លែងថត។ ខ្ញុំពិតជាឆ្ងល់ណាស់ តើអ្នកដឹកនាំមានចេតនាធ្វើបែបនេះឬក៏យ៉ាងណា» ខណៈដែល Jo In Sung បានឆ្លើយតបដែរថា៖ «មែន! នោះគឺជាផែនការរបស់គាត់» ឮដូច្នេះ Han Hyo Joo បានសួរទាំងឆ្ងល់ថា «គាត់ចង់ឱ្យពួកយើងថតឈុតថើបគ្នានៅថ្ងៃបុណ្យនិងថ្ងៃពិសេសៗ? ហេតុអ្វី?» ព្រោះតែមានចម្ងល់ចំពោះរឿងនេះ Han Hyo Joo បានទាមទារឱ្យអ្នកដឹកនាំ Park In Je ដែលបានមកលើកទឹកចិត្តអ្នកទាំងពីរក្នុងឱកាសផ្ដល់បទសម្ភាសន៍នោះពន្យល់។ ចម្លើយរបស់អ្នកដឹកនាំថ្វីត្បិតតែខ្លីប៉ុន្តែបានធ្វើឱ្យអ្នកគ្រប់គ្នាផ្ទុះសំណើច លោកគ្រាន់តែឆ្លើយតបថា៖ «ព្រោះអ្នកទាំងពីរមិនទាន់មានម្ចាស់បេះដូង»
ក្រោយអ្នកដឹកនាំឆ្លើយចប់ Jo In Sung ញញឹមហើយនិយាយថា៖ «យ៉ាងណាក៏ដោយត្រូវអរគុណដល់អ្នកដឹកព្រោះពួកយើងគ្រប់គ្នារីករាយ យើងបានញ៉ាំអាហារពេលល្ងាចជាមួយគ្នាជាញឹកញាប់ និងបានផឹកស្រានៅកន្លែងថត វាគឺជាការចាយពេលវេលាក្នុងឱកាសពិសេសដូចជា Christmas និងចូលឆ្នាំ ដ៏ពិសេសមួយ។»
អ្នកទស្សនាបានបង្ហាញការពេញចិត្តជាខ្លាំងចំពោះចម្លើយរបស់ Director ដោយម្នាក់ៗបានសរសើរលោកថា លោកគឺជាមនុស្សកំប្លែងជាដើម៕
ប្រភព៖ kbizoom