ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានប្រោសព្រះរាជទានព្រះរាជសាររំលែកទុក្ខយ៉ាងក្រៀមក្រំ និងសំដែងការសោកស្តាយយ៉ាងជ្រាលជ្រៅ ក្នុងព្រះបរមនាមព្រះអង្គផ្ទាល់ និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ព្រះរាជវង្សានុវង្សកម្ពុជា និងប្រជាជាតិកម្ពុជាទាំងមូល ជូនចំពោះ ឯកឧត្តម Xi JinPing ប្រធានាធិបតី នៃសាធរណរដ្ឋប្រជាមានិតចិន ចំពោះការទទួលរងគ្រោះធម្មជាតិទឹកជំនន់ នៅក្នុងខេត្ត Henan ដែលបានបណ្តាលឲ្យបាត់បង់អាយុជីវិតប្រជាជន ខូចខាតហេដ្ឋារចនាសម្ព័ន្ធ និងផ្តល់ផលប៉ះពាល់ជាច្រើន ។
ជំនន់ទឹកភ្លៀងដ៏អាក្រក់មិនធ្លាប់មាន នៅខេត្តហឺណាន ប្រទេសចិន បានសម្លាប់មនុស្សយ៉ាងហោច ២៥នាក់ និងមនុស្សរាប់សែននាក់ជម្លៀសចេញពីផ្ទះ នៅក្រុងហ្សេងចូវ ហើយផ្លូវសំខាន់ៗ ត្រូវបានជន់លិចដោយជំនន់ទឹកភ្លៀង។ ទន្ទឹមនឹងនេះ មនុស្សជាង១លាននាក់បានរងផលប៉ះពាល់ដោយសារជំនន់ទឹកភ្លៀងនេះផងដែរ។
ប្រទេសចិនបានហៅវិបត្តិធម្មជាតិនេះថា ជាគ្រោះធម្មជាតិ នៃជំនន់ទឹកភ្លៀងដ៏អាក្រក់បំផុតក្នុងប្រវត្តិសាស្រ្តចិន ដែលមិនធ្លាប់មានតាំងពី ១ ០០០ឆ្នាំមុនមកម៉្លេះ។
ចិនតែងរងគ្រោះទឹកជំនន់ជាញឹកញយនៅរដូវវស្សា ដោយពេលខ្លះគ្រោះមហន្តរាយនេះបានផ្តាច់ជីវិតមនុស្សអស់ជាច្រើន និងជាច្រើនពាន់នាក់ផងកាលពីឆ្នាំ១៩៩៨ នៅតំបន់ទំនាបទន្លេយ៉ង់សេ។ ចំណែកក្រុងហឺណាន់ និងក្រុងលឿយ៉ាន ដែលនៅជាប់ទន្លេលឿង ក៏ធ្លាប់មានប្រវត្តិរងគ្រោះទឹកជំនន់ស្លាប់មនុស្សច្រើនដែរ។ បើតាមអ្នកវិទ្យាសាស្ត្រ ជាមួយនឹងការប្រែប្រួលអាកាសធាតុ គ្រោះទឹកជំនន់នឹងកាន់តែកំណាចឡើងៗ នៅចិន ក៏ដូចជានៅលើពិភពលោកទាំងមូល៕
