តារាចម្រៀងដែលបច្ចុប្បន្នបានអភិវឌ្ឍក្លាយជាសហគ្រិនមួយរូប លោក ខាន់ ជែមស៍ បានចេញមកបង្ហាញចំណាប់អារម្មណ៍របស់ខ្លួននៅលើបណ្ដាញសង្គម ដោយក្ដីមោទកភាពថា រយៈពេលជាង២០ឆ្នាំមកនេះ លោកអាចវិវត្តខ្លួនបានលក្ខណៈលោតផ្លោះពីកម្មករទូក មកជាតារាចម្រៀងល្បី និង ជាសហគ្រិនដ៏ជោគជ័យមួយរូបថែមទៀត។
នៅក្នុងសំណេរសារសព្ទរបស់លោក ខាន់ ជែមស៍ តារាចម្រៀងល្បីនៅផេកហ្វេសប៊ុកផ្លូវការរបស់លោកកាលពីថ្ងៃទី២២ ខែកក្កដា ឆ្នាំ ២០២១ តារាចម្រៀងកូន ៤ រូបនេះ បានរៀបរាប់ពីជីវិតតស៊ូរបស់ខ្លួនដោយក្ដីមោទនៈ ព្រមទាំងលើកទឹកចិត្តឱ្យមនុស្សមានការតស៊ូប្រឹងប្រែងថា រយៈពេល២៣ ឆ្នាំរាប់ចាប់តាំងពីឆ្នាំ ១៩៩៨ មក លោកគឺជាកម្មករចុះទូកនៅប្រទេសថៃ រហូតចូលដល់ឆ្នាំ២០០២ លោកបានធ្វើជាអ្នកចម្រៀងតាមបៀរហ្គាឌិន ដើរលើវិថីជាអ្នកចម្រៀងបាន៥ឆ្នាំ រូបលោកក៏មានឱកាសបានក្លាយជាតារាចម្រៀងក្នុងផលិតកម្ម និង ចុងក្រោយក្នុងឆ្នាំ២០២១ នេះតែម្ដង អាចចាត់ទុកថាជាជោគជ័យមួយធំក្នុងជីវិត ព្រោះមិនត្រឹមតែជាតារាចម្រៀងល្បីនោះទេ តែលោកក៏បានក្លាយជាសហគ្រិនមួយរូបផងដែរ។
ហើយនេះគឺជាការរៀបរាប់ទាំងស្រុងរបស់លោក ខាន់ មករា ហៅ ខាន់ ជែមស៍ នៅលើបណ្ដាញសង្គមហ្វេសប៊ុក «ឆ្នាំ ១៩៩៨ ជាកម្មករចុះទូកនៅប្រទេសថៃ ឆ្នាំ ២០០២ ជាអ្នកចំរៀងប្រចាំនៅបៀរហ្គាឌិនឆ្នាំ ២០០៧ មានវាសនាបានក្លាយជាតារាចំរៀងល្បី ឆ្នាំ២០២១ ជាតារាចំរៀងផងជាសហក្រិនផង ខ្ញុំពិតជាមានមោទនភាពចំពោះខ្លួនឯងណាស់.!! មិនថាពីមុនយើងជាអ្វី សូមឲ្យយើងមានក្តីស្រមៃអោយធំ នឹងមានការខិតខំប្រឹងប្រែងតស៊ូយ៉ាងពិតប្រាកដថ្ងៃណាមួយយើងនឹងជោគជ័យ ជាក់ជាមិនខាន ស៊ូៗណាបាទ
»។
លោក ខាន់ ជែមស៍ គឺជាតារាចម្រៀងដ៏មានឈ្មោះបោះសំឡេងមួយរូបប្រចាំផលិតកម្ម សាន់ដេ បច្ចុប្បន្នលោកគឺជាសហគ្រិនមួយរូប ដោយបានបើកហាងលក់ធុងបាសនាំចូលពី ចិន និងថៃជាមួយនឹងដៃគូមានឈ្មោះថា W.CC បន្ថែមលើនោះលោកក៏បានរកស៊ីតាមអ្នកឡានលក់នូវសាប៊ូលាងមុខផងដែរ៕
