សហព័ន្ធកីឡាបាល់បោះអន្តរជាតិ (FIBA) បានជូនដំណឹងពីកាលវិភាគប្រែប្រួលថ្មីនៃការប្រកួតជើងឯកបាល់បោះប្រចាំទ្វីបអាស៊ី ជាពិសេសគឺព្រឹត្តិការណ៍ដណ្តើមជើងឯកបាល់បោះបុរសប្រចាំទ្វីបអាស៊ី 2021 FIBA Asia Cup ដោយលើកពេលទៅធ្វើនៅឆ្នាំ២០២២ វិញ ព្រោះតែស្ថានភាពកូវីដ-១៩ នៅប្រទេសឥណ្ឌូណេស៊ី ដែលជាម្ចាស់ផ្ទះកំពុងតែរីករាលដាលខ្លាំង។
បើតាមលិខិតដែលចេញផ្លូវការនៅថ្ងៃសុក្រ នេះរបស់ FIBA បញ្ជាក់ថាការលើកពេលទៅខែកក្កដា ឆ្នាំ២០២២ នេះគឺក្រោយពេលទីផ្សារចុះបញ្ជីកីឡាករប្រកួត FIBA Basketball World Cup Asia Qualifiers ដែលត្រៀមប្រកួតជម្រុះប្រចាំទ្វីបរួចរាល់ផងដែរ។
គិតត្រឹមពេលនេះពានរង្វាន់បាល់បោះបុរសជើងឯកប្រចាំទ្វីប 2021 FIBA Asia Cup រកឃើញក្រុម១៣មុនគេ ឡើងទៅរង់ចាំ ខណៈក្រុមចំនួន៦ ចែកជា២ពូលផ្សេងទៀត ត្រូវប្រកួតជម្រុះគ្នាយក៣ក្រុមឡើងទៅតាមក្រោយ ដោយការប្រកួតធ្វើឡើងនៅ សីហា ឆ្នាំ២០២១។
ក្រុមដែលមានឈ្មោះឡើងដូចជា៖
*ម្ចាស់ផ្ទះ៖ឥណ្ឌូណេស៊ី
*ពូល A៖ ហ្វីលីពីន និងកូរ៉េខាងត្បូង
*ពូល B៖ ចិន និងជប៉ុន
*ពូល C៖ អូស្ត្រាលី និងនូវែលហ្សេឡង់
*ពូល D៖ លីបង់ និងបារ៉ែន
*ពូល E៖ ស៊ីរី និងអ៊ីរ៉ង់
*ពូល F៖ កាហ្សាក់ស្ថាន និងហ្សកដានី
ដូច្នេះក្រុមដែលមានចំណាត់ថ្នាក់លេខ៣ នៅតាមពូលនីមួយៗចំនួន៦ក្រុមត្រូវបែងចែកជា២ពូល ដោយស្វែងរកក្រុមខ្លាំងចំនួន៣ក្រុមមានឈ្មោះឡើងទៅបំពេញ១៦ក្រុម ជាមួយក្រុមទាំង១៣ដែលកំពុងរង់ចាំ។ វគ្គជម្រុះនេះគ្រោងធ្វើនៅខែសីហា មានដូចជា៖
ពូល A៖ ឥណ្ឌូណេស៊ី,តៃវ៉ាន់,ហ្គាម
ពូល B៖ ឥណ្ឌា,អារ៉ាប៊ីសាអ៊ូឌីត,ប៉ាឡេស្ទីន
ពានរង្វាន់ជើងឯកប្រចាំទ្វីប 2021 FIBA Asia Cup នឹងប្រកួតនៅចន្លោះថ្ងៃទី១៦ ដល់២៨ខែសីហា ឆ្នាំ២០២១ខាងមុខ ខណៈពាននេះរៀបចំឡើងរាល់២ឆ្នាំម្តង គិតចាប់តាំងពីឆ្នាំ១៩៦០ មកម៉្លេះ ស្របពេលក្រុមចិន ឈ្នះជើងឯកបាន១៦លើក ច្រើនជាងគេ ហើយហ្វីលីពីន ឈ្នះ៥លើក អ៊ីរ៉ង់ ឈ្នះ៣លើក កូរ៉េខាងត្បូងនិងជប៉ុន ឈ្នះម្នាក់២លើក និងអូស្រ្ដាលី ឈ្នះ១លើក ផងដែរ។
ការផ្លាស់ប្តូរកាលវិភាគប្រកួតនេះក៏បូកជាមួយការប្រកួត៖
-បាល់បោះនារីជើងឯកប្រចាំទ្វីប The FIBA Woman’s Asia Cup 2021 ឈុត A ធ្វើឡើងនៅហ្សកដានី ពីថ្ងៃទី២៧ កញ្ញា ដល់៣ តុលា ឆ្នាំ២០២១
-បាល់បោះនារីជើងឯកប្រចាំទ្វីប The FIBA Woman’s Asia Cup 2021 ឈុត B ធ្វើឡើងនៅហ្សកដានី ពីថ្ងៃទី៧ដល់១៣ ខែវិច្ឆិកា ឆ្នាំ២០២១