សិល្បៈអន្តរជាតិន៖ កាលដើមខែកក្កដា ឆ្នាំ២០២៣ កន្លងមកមានសេចក្ដីរាយការណ៍ថាភាពយន្តកូរ៉េខាងត្បូងជាង១០០រឿង មិនចាក់បញ្ចាំងដោយសារតែបញ្ហាដើមទុននិងការផលិតភាពយន្តច្រៀនហូរហៀរទីផ្សារ ទោះជាមានតារាសម្ដែងល្បីៗមានកេរ្តិ៍ឈ្មោះបោះសំឡេងមកសម្ដែងក៏មិនអាចជួយបានដែរ។ ក្រុមអ្នកផលិតបានប៉ាន់ប្រមាណថាឆ្នាំក្រោយឬឆ្នាំ២០២៤ ការផលិតភាពយន្តកូរ៉េនឹងមានការថយចុះមកត្រឹម១ភាគ៣ ធៀបនឹងការផលិតបច្ចុប្បន្ន អាស្រ័យដោយសារកត្តាផលិតភាពយន្តមានច្រើនហូរហៀរកាលពីពេលកន្លងមក។
បញ្ហានេះបានធ្វើឱ្យមនុស្សជាច្រើនជាពិសេសអ្នកនិយមចូលចិត្តទស្សនាភាពយន្តកូរ៉េចាប់ផ្ដើមព្រួយបារម្ភថារឿងភាគថ្មីៗដែលមានគម្រោងថតនៅក្នុងពេលបច្ចុប្បន្ននេះ អាចនឹងជួបវិបត្តិនេះដែរឬអត់? ឧទាហរណ៍ដូចជារឿងភាគបែប Fantasy លាយឡំនឹងមនោសញ្ចេតនាស្នេហា A Good Day To Be a Dog សម្ដែងដោយតារាប្រុសរូបសង្ហា Cha Eun Woo និងតារាសម្ដែងស្រី Park Gyu-Young ដែលបានថតចប់តាំងពីដើមខែមេសា តើអាចនឹងជួបនឹងវិបត្តិដែរទេ?
ថ្មីៗនេះអ្នកគាំទ្រហាក់ធូរទ្រូងដោយសារតែទទួលបានដំណឹងថារឿងភាគខាងលើបានកំណត់កាលបរិច្ឆេទបញ្ចាំងនៅដើមខែតុលាខាងមុខនេះនៅលើកញ្ចក់ទូរទស្សន៍ MBC ដោយការចាក់ផ្សាយនឹងធ្វើរឿងនៅរៀងរាល់ថ្ងៃពុធ។
គួរដឹងថាភាពយន្ត A Good Day To Be A Dog គឺជាភាពយន្តភាគជាស៊េរីប្រភេទរ៉ូមែនទិក បែប Fantasy ដែលដកស្រង់ចេញពី Webtoon ល្បី ដោយសាច់រឿងបរិយាយពីតួអង្គស្រីឈ្មោះ Han Hae Na សម្ដែងដោយ Park Gyu-Young គឺជាគ្រូបង្រៀនភាសាកូរ៉េនៅវិទ្យាល័យដែលប្រែក្លាយជាសត្វសុនខនៅពេលដែលនាងថើបគ្នា ចំណែកតួឯកប្រុស Jin Seo Won សម្ដែងដោយ Cha Eun Woo គឺជាគ្រូបង្រៀនគណិតវិទ្យានៅវិទ្យាល័យដែលមានជំងឺខ្លាចសត្វសុនខ ដោយសារតែមានស្រមោលខ្មៅតាំងពីតូច។